الياسمين الذابل

البارت الثاني عشر

الياسـمين_الـذابل
#دعــاء

#البارت_الثاني_عشر

يزن : قربها يمي حرك بداخلي كل المشاعر الي جنت خافيها من زمان  تحجي بس ماحس اسمع الها جانت عندي رغبه اضمها لصدري وابقيها طول اليل بحضني
بستها وصرت اتبادل وياها المشاعر واحاسيس تراودني من يوم ضعت بعيونها
هي بقت واكفه .. مستسلمه .. صافنه .. مامنعتني
و بالحظه حسيتها بدلتني هلاحساس ..
احس شكو شفره بداخلي نفكت وعرفت شنو معنى هلانجذاب ..

تالي بعدتني خلت اديها بصدري ومدنكه راسها وهي تكول لاا يزن
باوعتلي ..ماريد هلشي يصير ولا اريده يتكرر ..

راحت بسرعه وطلعت وسدت الباب لا حاولت امنعها ولا حاولت احجي وياها ولا ردت ابرر الي صار ...

لان جان احساس كلش حلو .. ابتسمت ورجعت تمددت ع فراشي وبالي بس عيونها .. خوفها. خجلها ارتباكها .. شفايفها .. لمستها .. يالله منج ياسمين

ياسمين : من جذبني اله وبوسني جمدت قيدني بشعور عمري ماجربته ..
لاكدرت ابتعد ولا كدرت امانعه كل الي كدرت اسوي ابدله الاحساس الي يحس بي ناحيتي ..

لحظات حسيت ع نفسي اني نجرفت هواي وره هلمشاعر دفعته واني كلبي يدك حيل وجسمي يرجف ابتعدت واني ماكدر اباوع بوجهه ..

كعدت بالحمام واني اباوع لنفسي خليتي ايدي على شفتي .. ابتسمت ..
جاي اهتمله .. ويعجبني قربه .. احب احجي وياه ..
شنو سالفتج ياسمين ..

دگة گلبي من يتقرب مني ورجفة جسمي اذا لمسني كلشي غير ..
عمري ماحسيت بهذا الشعور حتى ويه ايمن ...

ماردت ادخل للغرفه لان قربه كام يوترني بزايد  ..

رحت كعدت بالحديقه هدوء اليل والسماء ونجومها الي تلمع خلني اسرح بفكري وخيالي وعالم مابي بس اني ويزن ..

تالي رحت للغرفه شفته نايم دخلت بهدوء اندسيت بفراشي وبالي الي صار قبل شوي بعدها نمت ... كعدت ع صوت يزن وهو يصيح
- ياسمين .. ياسمين
فتحت عيوني جان كاعد ع جربايته ولابس ملابسه العسكريه .. كمت بكسل واني افتح بعيوني واسده لان جانت بعيوني النومه
- صباح الخير
- صباح النور .. سويج السياره وين .. مارجعه سليم من اخذه امس
- لا رجعه انت راح داوم ..بعدها اجازتك مخلصت
- اي عادي .. يله جيبي 

كمت من مكاني جنت ضامته نطيته اله وكلتله راح اسويلك ريوك
- ماكو داعي رجعي نامي
- انت تعبان ليش تريد تروح لدوام ..
- الكعده بالبيت تعبني اكثر
- براحتك .. راح اسويلك ريوك على السريع

نزلت خدرت جاي وسويتله بيض عيون لان هو هيج يحبه اجه للمطبخ كال خليلي هنا حتى اروح تاخرت
خليت البيض ع طاوله وصمون
جبتله جبن كال شيلي ماريد صبيتله جاي وكعد ياكل

- ماراح تتريكين
- ماحب اكل من الصبح
- لعد شوكت الظهر؟!
- من اجوع اكل

خلص غسل و اخذ سلاحه وخلاه بخصره واني اباوعله كلشي بي يجذب حتى ملامحه القاسيه والزي العسكري يزيده اناقه وجمال انتبه علي اباوعله ..
نزلت عيوني وسويت روحي اخذ الصحن وارتب الطاوله
- اذا كعدت امي وسالت كلها راح لدوامه لا تقلق وتتصل كل شوي راح اكون مشغول صارلي فتره تارك المقر
- ان شاء الله ..
تحرك بخطوات قليله وصحت يزن ..
لتفتلي ... ديري بالك على نفسك