فصلية مع وقف التنفيذ

4

#فصلية_مع_وقف_ألتنفيذ

((قصة حقيقة ))

#fraqidhassan

#فصلية ،،،مع وقف ألتنفيذ

#بقلمً / فراقد حسن علي

،،،،،،،،،،،،،،،،،،،،،،،،،،،،،،،،،،،

ألبارت (4)

جميله/سيارات الزفه شويه افترت بمدينه صدام
وبعدين توجهت لبيت جواد بالاولى

-ماكو بقلبي لا خوف ولاحزن ولا فرح
حسيت نفسي خاليه من اي شعور

-بجيت من دخلت لبيت جواد
لان هنا صدك احتاجيت امي
صح امي ابتسام اجت ويايه
بس كل بنيه بهج يوم تريد امها وياها

-جناينهم  شفتهن حبابات
بالذات دنيا جبيره وعاقله ورزنه
يمكن تطلع بعمر امي او شويه اصغر

-عذراء وسعاد خطيه يضحكن بيه
لان يشوفني ابجي عبالهن خايفه من جواد
مايدرن بيه اني ابجي على ماهر وظل بالي عنده

-ودني لغرفتي امي ابتسام ودنيا
اباوع غرفه الاخشاب عاديه ويمكن مستخدمه
سالت دينا كالت /هي نفس غرفته العرس بيها
بس صبغها لان قبس اخذت فلوس بدالها

-وأجت هاي الحية عفاف وجان تكلي /
اسمعي جميله
انتظرج نص ساعه واجى اخش عليج
واريد بياضج بيدي
منو يكول هذا الكردي ماضحك عليج
من جنتي ترحين بيتهم
نفس ماضحك ابو فراس على امج

-يالله فوك القهر والضيم انوب الحجي اليوجع
مااعرف ارد على عفاف ومااعرف شحجي
وبعدني صغيره مااعرف ادافع عن نفسي
ظليت بس ابجي

-دنيا كالتلي /لا تبجين حبيبه ولا تخافين من جواد
والله حباب وقلبه طيب احسن من كل أخوانه
حنين حتى علينه وعلى جهالنه
مو عاد انتي مرته ويخوفج وياأذيج

-هن طلعن ودخل جواد للغرفه
والله هو شكله حلو يشبه لاعب الطوبه
ليث حسين بس اسمر بعد شويه

-بس شنو جسمه ويه جسمي
نص عدل ،،اني كصيره وشويه سمينه
وهو طويل وعنده ضخامه وصاحب جتاف

-بس كل هل صفات مو بعيني
اني هوايه حلمت وتخيلت رجلي هو ماهر
ابد مافكرت بغير واحد يصير رجلي

-لا حاجاني ولا حاجيته
بقى كاعد على طرف الجربايه
ودنك راسه على الكاع وخلاه بين ايديه
وانوب طلع باكيت جگياره سومر الازرك
وشخاطه دجله ودخن جگاره وره جگاره
يمكن دخن ٣ جگاير وابد ما حاجاني

-بعدين داس الچگاره الثالثه جوه رجله
وتقدم عليه خفت من عنده وطفرت من مكاني
جنت كاعده على الطرف الثاني من الجربايه
وكفت على طولي وبديت أرجع ليوره

جواد/لا تخافين أبوي أنتي
بس لازم بهذا اليوم أحبن على راسج
لان أصبحتي زوجتي امام الله والناس