فصلية مع وقف التنفيذ

7

#فصلية ،،،مع وقف ألتنفيذ

#بقلمً / فراقد حسن علي

،،،،،،،،،،،،،،،،،،،،،،،،،،،،،،،،،،،

#ألبارت (7)

جميله /طر الفجر ولفحنه ضوه الشمس
وجواد نزل صلى وتوكل على باب الله
ومشى للعلوة ومناك يروح للسوك على باب رزقه
ما يتريك الصبح بس اصبله جاي ويطلع

-من صعدت رضعت أفنان ورجعت نمت
بعدها الشمس مو قويه ويظل فئ الستاره
مفي على الجهال يتاخرون بكعدتهم يلا ينزلون

-بس غفيت واسمع الجهال تصارخ
حررررررامي ،،حرررررامي

-أسم الله يمه شبيكم
شلت راسي وخالد فز وكف على طوله

-أشوف ولد شاب يريد يطفر على سطح
جيرانه الورانه بيت المدير من اهل البصرة

خالد /زيد هو الكاعد وشاف الولد
وصاح حرامي انعام وافتخار عاطن وياه
لان بليل نخوف الجهال يلا ينامون
انكلهم اجاكم الحرامي (أبو طبر )

-الولد هو الخاف مو الجهال الخافو من عنده
خبصوا الدنيا بالصريخ حرامي ،،حرامي

-ارتبك يصعد على الستاره ويرد يطيح
ميندل دربه شلون يصعد ويطفر

-ثواني ومنعرف منين صعد عمي سامي
وجلب بالولد وهو يفك بروحه يريد
يطفر على بيت المدير

عدنان /يبا بس حل عني انا موش حرامي
هذا بيتي انا عدنان ابن المدير مالك
انا جاركم

سامي/وشعندك طافر على بيتنه
ومتكشف على مرة أخوي

عدنان /يبا والله لا وصلت يم المرا
ولا تكشفت عليها

-انا ابن جاركم المدير
وصارلنه سنتين جوارين

-يبا أنا فرار والأمن  ب ٢ بليل كبسوا بيتنه
وطفرت على بيتكم ولبدت بالبيتونه
وضيعت نفسي بين الفرش (الزوالي )والغراض

سامي /بوووووووووويه يعني من الليل انت خاتل بيتنه
ومستغفلنه وتكشفت على مراة أخوي

عدنان /يبا بالله العظيم مادخلني بالمرا
لبدت عدكم شردت من كبست الامن

خالد/الولد يسولف ويبرر بموقفه
وعمي سامي مجلب بخوانيكة

-على الصوت والهوسه صعدوا
باقي الموجودين بالبيت
وصارت سالفة شكبرها وشكدها

-عمي سامي وعمي سعدون
بعدهم ماطالعين على ابواب رزقهم
بس أبوي جواد وعمي سلمان يشتغل تكسي
طلعوا من بعد الاذان

جتفوا الولد ونزلوا من درجنه
وطلعوا من باب بيتنه واخذوا لاهله
بالفرع الورانه

-شنو دقايق وتقريبا ساعه ب ٧ الصبح
فرعنه كل الزلم واكفه بالشارع ويباوعون علينه

-ولان صوت الجهال عالي  لم القطاع
وكلها نايمه بالسطوح فصوت مسموع