فصلية مع وقف التنفيذ

8-9

#فصلية ،،،مع وقف ألتنفيذ

#بقلمً / فراقد حسن علي

،،،،،،،،،،،،،،،،،،،،،،،،،،،،،،،،،،،

#ألبارت (8)

خالد /وكعدوا شيوخ العشاير للفصل
وحكموا حكمهم  الظالم

-ومثل ماقرروا عمامي
وقرر وياهم شيخ عشيرتنه
فصلوا اهل عدنان ابن المدير
بدل فصل لثلاث شغلات صارن اربعة

-وهن
١-دوست البيت لان عدنان طفر علينه ،
٢-ولان تكشف على امي وهي نايمه بالسطح
٣-ولان داس بيتنه وخوفنه أحنه الصغار وجنه نايمين
٤-وياخذون من عدهم مراه فصليه
لان بسبب ابنهم ماتت امي جميله
وصارتنله فضيحة بالمنطقه

-وبعد نقاشات طويله وعريضه
وكلها نقاشات باطله وحكم باطل
حتى الله وكتبه ورسله
مايرضون بهج حكم ظالم

-بعد ما خيروا بيت أهل عدنان
لو يكتلون عدنان بدال امي جميله
ويشلون من المنطقه

-لو يدفعون فلوس فصل عن ثلاث شغلات
وياخذون مراه من عدهم فصليه بدال امي جميله

-عاد بكعدة  الديوان الظالم
قرروا فلوس وفصلية
وهي (وركاء )أخت عدنان بنت المدير
شدوا عليها الرايه بكعدتهم الظالمه

-ومن تنشد عليها الرايه وينحلف عليها
لازم تكون باكر (بنت)
يعني ميصير الفصليه تكون مطلقه أو ارمله
ترجع على اهلها

-ولازم تكون خاليه من الامراض ،،
ومابيها عاهه مثلا عوره او عرجه او خرسه
يعني سالمه من كل عله

-ولازم عمرها يكون مناسب
من عمر (١٨) سنه لحد (٢٥) سنه
علمود تكون قادره على الحمل والولاده

-ومن تنشد عليها الرايه
سواء كانت قابله بالرجال أو لا
غصبن عنها تصيرله زوجة
عسى  ما كان شايب تقبل بي

-وبعض العشاير من ياخذون فصليه
و محد يرضى من شبابهم او زلمهم المتزوجين
يتزوجوها فتبقى معلگه ومشدوده عليها الرايه
تحت أسم الفصليه لافلان عشيره
عود اذا مر الوقت ومحد رضى بيها من زلهم ياخذها
يفكون عنها الرايه ويطلقون سراحها

-ومعروفه عند الكل الفصليه
متورث من ميراث زوجها
وتكون حالها حال الخدامه

-وركاء الفصليه أخت عدنان ابن المدير مالك
بسنه  ٢٠٠٢ جان عمرها ٢٠ سنه
يعني هي مواليد ٨٢

-وهي عشيرتها معروفه بالبصرة
واصلا هم عشيرتهم قبيلة والهم سمعتهم وصيتهم
معروفين على مستوى العراق ودول الخليج

-من وره طيش اخوها عدنان
شافوها  ل (وركاء ) الحل الأنسب
عن طريق مسمى ''الفصلية"
وانطوها لعشيرةابوي  جواد كـ"دية"
حتى تفض النزاعات بين العشيرتين