'Na ha ke ngoana, ha ke mokalia-thole.
Ba bangata ba ntse ba nseba, ba ipotsa na ebe ke mang.
Ba bolelleng ke setsokotsane, Thojan'a Tebeleng.
Khaitseli ea monna e mosehla morontlhotlho.
Ke morali'a maqheku.
Ngoanabo selallane lehakoe la pelo eaka.
Ngoanabo selloane motho oa ho rata ho thabisoa.
ke ngoana bafo, batho ba ho sireletsa sechaba ho se teboho.
Ke setloholo sa Bakuena
Ke ngoana ho baleha t'sobotsi tsa 'mae a nka tsa ntatae.
Ke ngoana ho futsa banna.
Ba bolelleng.
Ke mokhuts'oane ba tsela ea ho tlooa haeso Mat'sekheng hoea ha 'Mamosa le Molapo.
Ha se fela ke sa holeng Thojan'a Tebeleng,
Khale ke hlasela lithota ke ingoetsoe.
Ke tlile ke kakatetse lithoto ke hlometse marumo.
Ke tlooa koana Sephokong Tsitsa Thabatelle Mapantsoleng.
Ka fihla ka jaka mona ha habo Linare.
Ha bare na ke mang, o ba joetse ke motho oa lineho, hobane
Eitse ke sale tlaase koana makhooeng,
Ka lora nkhono Kholu a lla,
are ho 'na, "li kae lingoloa tsa Sesotho?"
ka nyoloha ke matha.
Ka siea bana ba Chaka morao.
Ba ntse ba leka ho mpotsa bare,
"Thope o bolelang ha ore leru le oele?"
Ka fihla ke matha hae Lesotho.
Ka hloa Thaba-Bosiu ke sa hetle,
Ka fihla ka ikokobetsa ka pele ho lebitla la Morena Moshoeshoe,
kare, "Morena bona le 'na ke hlabile."
Ha ba le botsa na ke mang,
Ba bolelleng, 'na ke ngaka matsetsela,
Ba bolelleng ke ngoana balimo motla le serame.
Ba bolelleng ke Thojan'a Tebeleng, Khaitseli ea Marebele.
Ba bolelleng hore 'na ke ngoan'a Mosotho ke bua Sesotho.
YOU ARE READING
KHETSI
Poetryke hlokometse ka moo ho leng thata kateng ho fumana lingoloa tsa sesotho marang-rang mona. kahona ke ile ka khetha ho nka bohato ka etsa POKELLO EA LITHOTHOKISO TSE KHUT'SOANE. Tsena ke tse ling tsa lithothokiso tseo ke li ngotseng. ke utluile ke la...
