يا تعب السنين
# لهيب خالد
في بداية كل سنة جديده يتحرك الأب قاضي وهوه بمرضه وتعبه بس علمود يوفر الأكل لعائلته كانت الساعة الستة الصبح والجو بارد ثلج وصل لشغله صاحله رجال عمره بالاربعين كال
هادي : يابه انته يرجال صعد الطابوك بسرعة
قاضي : ...
صعد الحجي قاضي وهوه يشيل بالطابوك مجموعة وره مجموعة لحد ما عثر على درجة او وكع هوه والطابـوك بلكع بده يون من الوجع لحد ما صاح والتمت عليه الخلفة
ياسمين
دخلت المطبخ علمود اساعد امي بتحضير الغده باوعت لكدرية الطبخ جان الاكل شوربة عدس بقيت صافنة باوعت لأمي
ياسمين : بربج يمه هم عدس هم عدس مو بطني عدست ما يصير هالشكل تغير شوية
غزرتني اختي فضيلة وهي تعض شفتها حتى اسكت درت وجهي على المكان البي امي ماكو ماهيه فجأة سمعت صوت فضيلة وهي عصبية تكول
فضيلة: بعد بعد شبقيتي اكو شي نسيتي تكولي!
ياسمين: يابه بالله مو متقصده يعني بس لأنو مليت كل يوم غده عشة شوربة عدس عبالي شوية اكو تغير تدرين شنو بقى بس الريوك هم لازم نسوي مرگة عدس ههههه
فضيلة: من صدك انتي ما تحسين لج يالخبلة فهمي ما عدنه فلوس ما عدنه لو عدنه جان اشترينه ثلاجة غير هاي المهجومة الخربانة لو عدنه جان ما كعدنه متلهفات على ياهو اليتقدم جان ما نتظرنه العريس ولا تركنه الدراسة لو عدنه ما جـان كل يـوم طالعة تجدين بالشوارع لو محمد يبيع علاليگ 😒
ياسمين: الله يخلصني من هالعيشة هاي حتى روحي طكت!
عفتها ورحت سمعت صوت بجي بالحمـام جان صوت امي وهيه تشهك وتبجي صوتها عالي حيل بس هيه تكتمه بأيدها ضلت تبجي لدقايق خفت اروح ادك الباب وتصيح عليه وتطردني هواي احتمالات اجت ببالي لذلك بقيت واكفه اسمعها وكل حسره اجرها جانت تسحب روحي وياها!
بالسـوگ جان محمد يفتر بين العالم وهوه يبيع علاليـك وكف يم عائلة صغيره اب ام طفلة ضل يجر بقميص الرجال وهوه يكول
محمد: علاكه عمي علاكه عمي اخذها والله رخيصة عمي علاكه
التفت الرجـال بعصبية ودفع الولد حيل وكع محمد بلكع كدام العالم طلع من المحل الوره محمد شاب بالعشرين راح للشاب الدفعه وصاح بعصبية
فؤاد: لك ليش دفعته هيج جاي يشتغل ما ضرك بشي لييش!!!
الرجل: لزكة عمي علاكه وعمي علاكه من نعلاله ابوك وابو العلاكه يا ****
وكتها صار عصبي فؤاد وراح للرجال وضل يضرب بي بوكسات ودفرات بلكع والشباب محد تقرب لأنو جانو يعرفـون منو الحق ومنو الباطل ابتعد فؤاد عنه بعد ما شبعه كتل وكال
