فرح....يوم اللي صار أبشع شي بحياتي هوة انو جنت اني وعمتي وام عمار والبنات وريم كليتنة دنمشي بالسوك ولمحت ذولة الثنين مرة ثانية ديمشون ورانة شكولهم ضلت ابالي ولهذة السبب اذكرتهم وعرفتهم ضلو هم يمشون ورانة بس هل مرة لازمين المبايلات ويخابرون اني أحس كلبي نغزني منهم مدري ليش بس من سوء حضي محجيت شي ومشيت وصلنة للقطاع مال الشارع كالت أم عمار تريد تروح لاقاربهة فأفترقنة وراح البنات وريم وام عمار ومشينة اني وعمتي وملاك بأيدي فشوية تمشينة وملاك بجت فأني محضرتلهة نساتل بالجنطة ومن هاي السوالف انطيت ملاك لعمتي وأخذت الجنطة دا اطلعلهة فجأة
حسيت بسيارة وكفت بصفي وصلة انخلت علة خشمي وحلكي وانجريت لداخل السيارة واسمع صوت هوسة وبجي ملاك وصياح عمتي وبعدهة فقدت
ما ادري شكد وكعدت لكيت روحي بغرفة مبينة مال حيوانات تكرمون مبينة من الريحة البيهة وادية مربطة وعيوني مسدودة ورجلية هم وحلكي مربوط بوصلة وجسمي متكسرة فد مرة ضليت أحاول احرك روحي وافك الحبال بس مكدرت ضلت دموعي تجري ونوحي منكطع
ما اعرف ليش
ليش هيج يصير بية مصارلي هواي كلة كم شهر ورجعتلي مصيبة أكبر من القبلهة لساتني عروس وانخطفت
ما ادري شنو مسوية يا ربي شنو مسوية والله ما مأذية أحد ولا مأذية حتة حشرة صغيرة
من أعماق كلبي طلعت صرخة بسكوت ييييااااا الللللللللله
ييييااااا الللللللللله
ضلت هل الكلمات تطلع من كلبي للسمة ضليت استنجد بالله وأهل البيت لأن مالي غيرهم بهل المصيبة شوية وطب أحد انشالت الوصلة من عيوني وشفت كدامي جميلة وامهة
يارب لهنا يوصل الحقد والغل والله اني ممأذيتهن شوية وحجت جميلة......
صكر.....كنت بالدوام عدنة مهمة ولازم نكملهة فجأة دك تلفوني بالبداية انطيتة رفض بس ضل يدك أكثر من مرة شلتة شفتة ابوية وحسام والولد أكثر من مرة داكين علية
رجع دك علية حسام رديت علية ويريتني ما رديت
حسام....صكر اسمعني واهدة لتعصب لأن السالفة مهمة
صكر....حسام احجي بدون مقدمات شكو يمعود
حسام.....صكر فرح انخطفت وهسة منعرف حتة أثر الهة
صكر.....شنوووووو صدك تحجي
.....هنا من كلي ماحسيت علة روحي لمن وكع التلفون مني واتهشم
ضابط.....شفت الرائد صكر وكع منة التلفون ووجهة غدة ليمون رحتلة أركض
....سيدي خير خو مابيك شي
صكر.....بأسرع ما يمكن طلع دورية شرطة والحكني بسرعة
.....صار سيدي
صكر.....امرتهم يطلعون دورية شرطة ويجون وراية لأن السالفة مو مال صفنة وانة كلبي محترك علة فرحتي يالله كلشي ولا تفجعني بيهة أخذني ولا يصير بيهة شي والله العضيم ميبقة بية حيل أعيش حياتي وراهة كلشي ولا فرح ياعلي ياعلي الصبر يالله
طلعت بسرعة وعصام من سمع هم وراية طلع بالسيارة وأول مكان رحتلة هوة عصابة اني شاك بيهم لأن عندي عداوة وياهم وصلنة وطبيت وبيدي سلاحي وجماعتي والجيش طبو وراية مهتميت اذا اصوب لو أي شي لأن كل فكري وعقلي هسة مشغول بحبيبة كلبي أخاف متأذاية وحق العباس أبو فاضل لو مأذيهة لا افنيهم فني وحتة جثث متبقة للي مأذيهة يالله يامحمد ياعلي كلت هل تلث كلمات وطبيت ليجوة بعد ما دفرت باب مكانهم برجلي وفتت لكيت ريحة المشروب مالية المكان والبنات بملابس فاضحة بشكل تتمركص وهذولة سكارة ومفهين علة ذني خرب
جريت أكبر رأس بيهم وسحل كعدتة علة الكرسي شمرت علية سطل مي جابوليا هوة شوية صحة حجيت ويا
صكر......لك كلب احجي وين اخذتو مرتي احجي ساقط كلب....وهوة يخلي السلاح علة راسة ويسحب أقسام
الرجال......والله مأخذت أحد بس نزل السلاح
صكر وهوة يضربة بالسلاح علة راسة.....لك احجي لا افصل راسك عن جسمك ولتجذب وين اخذتوهة
الرجال.....والله ما....
...مكمل وصكر نام فوكا ودك كتل بحيث الرجال اختنك ومكدر يتنفس
.....صكر....فقدت اعصاب بشكل اجة عصام ووخرني منة بالكوة وأخوه للسيارات وإني ضليت اروح واجي وإني براسي الف فكرة وفكرة هذة جان حجة لو خافية هوة لأن أول تالي هوة إعدام لو سجن مؤبد ومن صفنتلة استنتجت هذة الخنيثة ميطلع منة هيج شي وهوة يدري بية لو خليتة براسي شسوي فضليت اضرب اخماس باسداس منو اليجرء ويسويهة
صكر.....عصام أمشي للمكان اللي خطفوهة بي هل العارات ارد تقرير عنة مفصل وبالحرف الواحد
عصام.....حاضر سيدي
....ركض عصام للسيارة وإني هم بسيارتي شخطتهة ومشيت دلوني علة المكان بالضبط نزلت من السيارة ضليت افتر بي صاير مكان بفرع بي بيوت وأشجار ضليت اطب بين البيوت والفروع فجأة درت وجهي و لمحت كامرة حاطيهة ابيت
أي يالله بلكي مصورة الصاير امرتهم يجيبوهة دخلنة لهذة البيت أهلة استقبلونة بوجوه مخطوف لونهة لأن نص الجيش طب للبيت اخذنة الكامرة وحطيناهة علة اللابتوب شفت شلون جرهة هل الجلاب لحبيبتي عاينتهم وإني أحس كلبي تكطع ويمكن لو هسة الزم اللي سواهة وحق العضيم افني عن الوجود وحق كل حرف بالقرأن لا اكطعة تكطع
عاينتهم مغطين وجوهم بالكامل ورقم السيارة مبين هذي الخطأ اللي مسوي وهوة الرقم مشايلي وهذة الدليل راح ياخذهم للجحيم بس استغربت من هذة الخطأ فسألته أهل البيت شوكت حط الكامرات كالو البارحة بالليل يعني هذولة العارات ميدرون اصلا اكو كامرات لأن صايرات بمكان بالزاوية ممبين بالواجهة مالت البيت اخذنة التسجيل للمركز والولد والضباط والجنود وياية معافوني أبد
من وديناهة الكامرة كالو يرادلهة يوم كامل علما يعرفون مكان السيارة ضليت الوب منا ومنا رجعت للبيت اعاين البيت وحشة بدونهة اعاين علة كل زاوية وكتر أذكر صورتهة أحس العبرة خنكتني طلعت برة ركبت السيارة وشخطتهة وإني أحس نضري غوش من الدموع مسحت عيوني ومشيت بكل سرعتي بالسيارة أسوق وما اعرف وين الوجهة وين اخذتني السيارة ما ادري مسافة ووكفتهة اعاين الدنية ليلت وإني بنص منطقة صحراء ما اعرف شلون أخذت عيني النومة نمت وشفت بالحلم رجال جبير اجاني لحيتة بيضة وبيدة سيف الإمام علي ع
وكلي انو اني اللي بي سببة أقرب الناس الية وراح يجيني اللي يدليني عليهم وراح اني فزيت عركان وما ادري الساعة شكد من عاينت المبايل جانت الساعة بالاربعة الفجر
وية ما ردت اطفي المبايل اجاني مسج من رقم غريب كلي
تعال أخذ جثة مرتك الساعة بالسبعة الصبح بفلان مكان اني من قريته أحس حيل مضل بية وقوتي كلهة راحت
فجأة اذكرت كلام هذة الرجال اللي معرفتة منو وجان شايل سيف الإمام علي وشوي كصير وإني سامع الإمام علي كصير
يالله ياااااااعللييييييي
صحت ياعلي أكثر من مرة وراح اروح والإمام بضهري إنشاء الله هوة يوكفلي من بعد الله
شخطتهة السيارة وكبل للشركة طبيت وكتلهم يطلعولي مكان هذة الرقم وإني ادعي ميغلقة أو يكسر السيم كارت والحمدلله بآخر اللحضة بعد مطلع المكان انغلق الرقم
ياعلي ياعلي الإمام وكفلي بهاي
طلعت بالسيارة طاير للمركز اجاني الضابط يركض اطاني عنوان السيارة وراح أي يابو فاضل اجاني العنوان وية عنوان الرقم مطابقات رحت أركض للسيارة بس هسة هاي مالت القوات الأمنية وية الجيش اللي اخذتة وياية مرة ثانية وإني هل مرة كلني امل الكاهة بهذاك المكان....
فرح.....بعد ما شالو الربطة عن عيني اجت جميلة ودفرتني ابطني وامهة واكفة تضحك طلعن ثنيناتهن واستلموني كتل بحيث أحس رجلية وضهري تكسرن من الضرب لأن جانو معلكين ادية ووجهي للحايط وأسمع صوت السوط من ينزل علة ضهري أحس ملابسي كلهة أتملخت علية والضرب كام ينزل مباشر علة لحم جسمي صوتي راح وانبح وإني اصيح مرة ياعلي مرة كافي ومرة اصيح باسم حبيبي صكر أوف يصكر وينك عني ضلو علة هل حالة يمكن ساعتين تكميل عافوني بعدهة وطلعو وإني الم جسمي ينهش بية وريكي وحلكي يابس أريد مي بس ماكو كلشي يمي ضليت نايمة بالكاع مثل الميتة ما اكدر احرك ايد ولا رجل رجلية كطعوهن بخشبة ويمكن كسروهن هم وراسي مجروح والدم ماليني ما اعرف شكد ضليت علة هاي الحالة بس لمن طلعت الشمس انفتحت الباب وطبت
جميلة وامهة
جميلة.....ها يفرح هه عبالج اعوفج تتهنين بعيشتج بعد ما كسرتيني وحطمتيني بعد ما زوجوني لواحد سكير بعد ما انتي اخذتي صكر واتهنيتي بي لا ابد واليوم موتج علة ايدي
فرح....راحت أخذت سجينة واجتي كمت ارد اشرد منهة وإني رجلية بالكوة وكفت عليهن اني وصلت للباب سمعت صوت سيارات بس محسيت غير شي اخترق بطني والدم كام ينزل مني مثل الشلال اذكرت بهاي اللحضة اهلي عيالي واذكرت ملاك وصكر ااااااااااه يا صكر رجعت انعادت علية بهاي اللحضة كل لحضة عشتهة ويا كل لحضة اني نايمة بحضنة حسيت خلص انتهيت ويمكن لهنا وتنتهي حياتي
وكعت للكاع والباب انفتح لمحت صكر واكف كدامي نطقت آخر كلمة وهية احبك صكر بعد ما صرت بحضنة.........يتبع
مرحبا حبايب كلبي شلونكم وهذة بارت حاولت قدر الإمكان اطولة ونزلت اليوم علمود فضولكم اكيد بحيث ملابس المدرسة كتلهة لأمي جيبيهن علة ذوقج وإني مطلعت وياهة نضفت البيت وكعدت اكتبلكم
واذا جابتهن وطلعن مو حلوات بعد ما اكتب لأن علمودكم بقيت بالبيت فأدعو يطلعن حلوات ويعجبني ههههههههههه احبكم 😉😆😉
اريدكم تتفاعلون هواي هواي وانطوني رأيكم لأن اكيد رأيكم يهمني ياحلويين وها لتنسون تكتبون بالتعليقات توقعاتكم للي راح يصير هل ياترى فرح راح تموت😔😔 وجميلة شراح يصير بيهة هل مرة وصكر شنو راح يسوي احجونة يلة حبايب
لتنسون ترة كاتبتكم تعشقكمممممممممم هواي هواي فديتكم فدي😙😙😍😍😍😍😍😍😍😍😍😍😍😍😍😍😍
