سرح العزبه من فيرالله وغيض الدنيا كله ف راسه ٥ من دبشه (اغنامه) ميتات ويعرف انهن بخير من يومين يسرحن ويركض ولا فيهن شر
مصبح بغيض يصيح ( هرنات) للعامل عشان يفتح البوابه : فتحح علهو... استغفرالله اصبحنا واصبح الملك لله
العامل بخوف من الهرن الواضح من صاحبه ان مايبشر بخير فتح البوابه الحديد المتهالك : سلام عليكم ارباب
مصبح: وانت خلييت فيها سلاام !!!!
بركن قريب من الدرس ( الشبك) : كييف مااتن ! شو ياهن ؟!! ووينهم!
العامل : بابا هزا موت فليل انا شلي قبل ساعه ودي بعيد وين زباله" اكرمون"
مصبح بغيض : مووت فلييل هاا؟؟ تبا تلحقهو؟ عنبووك زاااد جانك تبيعهو وتقول مووت .. ٥ ماتو ف نفس الوقت ؟!
العامل بخوف : بابا مافي بيع كيف بيع غنم ميت ؟
مصبح : يعلك تلحقهوو والله ان دريت انهو مبيوعات والله ماتم فهالدار تسمع؟!
العامل نزل راسه وبعده خايف : بابا مافي بيع مافي
مصبح مسح ع ويهه من الغيض اللي لبسه ومسح بكف ايده ويهه : ماعليه .. من يموت شي حطه ف يونيه وعقه عدال الدرس وبشوف كم يموت منهن
خلاه ولا سمع العامل شو همس يتمشى ف عزبته بمهل ويتفقد الحلال .. وصله مسج طلع تلفونه بتعب وفتحه
..: صباح الخير يا ويه الخير
مصبح ابتسم وفخاطره: محلى صباحي وانتي فيه
رد تلفونه فمخباه بدون لا يرد لانه انشغل بالحلال
——-
ف احد بيوت الشعبيه ف ليوا
عفرا لعيالها: اليوم عقب الغدا بنروح العين اللي بيروح يتجهز من الحين
خليفه: كانكو بتباتون هب ساير
عفرا لفت ع ريلها : ليش عاد؟
خليفه : انتي ادرى اني ماداني جوهو سيره ورده زين
عفرا استغفرت ربها بهمس وعدلت يلستها بضيج
حس بها خليفه ونش : بروح الميلس ، وعينه ع سهيل : نش
سهيل وعينه ع امه : يلا
مع توتر الاجواء سلمى حبت تلطف الجو : امي اتصلي ع شيخه وقوليلها ان بنروح بوظبي اشتقت لعفاري
عفرا بضيج: سمعتي ابوج شو قال ! ماشي مبيت سيره عالفاضي
سلمى : مب لازم نبات بنغير جو وبنرجع
عفرا : نقطع خط ونرجع هلكانين لا ثاني يوم
سلمى بدت ملامح الضيج ع ملامحها البريئه : اللي تشوفونه
عفرا : فجي التلفزيون نسافر ونحن محلنا
سلمى ابتسمت ونفذت طلب امها : صدقج
الصمت ساد المكان الا صوت التلفزيون
سمعو صوت يهال عند البوابه يصارخون كانه بينهم حرب اهليه
سلمى ضحكت وعرفت اصواتهم: يوج قوم يأجوج ومأجوج
عفرا ضحكت: ذكري ربج
دخلت شيخه وهي تسحب سعيد من ايده : السلام عليكم ، عتييجج والله ان ما يلست عن اخوك لقرصك
عفرا بيتسامتها: خليهم كل اليهال جي
شيخه راحت لمها تبوس راسها بحنيه : تعبت يامايه كل يوم على هالحال
سلمى وعينها ععتيج اللي خذ زاويه وقعد هادي : ماعليج خالتهم هنيه ، راحت لعتيج وباسته : حبيبب خالوه ليش زعلان ؟
عتيج بعصبيه ويأشر ع سعيد: هذا فر لعبتي براا
سعيد مد لسانه ع برا لاخوه
عتيج نقز ع حضن سلمى وصاح : م..ماما ما.تحبني ت.تحبه هو
حزت ف خاطر شيخه كلام ولدها لانها دوم تسحب سعيد وياها اما عتيج الغلطان دوم ، حطت عفرا بين ادين يدتها : عتوجي حبيبي تعال عندي -اشرت ع ريولها
عتيج لف ع امه وبعده ف حضن سلمى ورجع غطى ويهه ف حضنها :لاا
عفرا : خليه لين يهدا عقب رمسيه
شيخه نزلت راسها: ماعرف شو اسوي هم من صوب وعوشه من صوب
سلمى : شباب نروح داخل نلعب ؟
سعيد بحماس : هيييه
شلتهم سلمى داخل عشان شيخه تاخذ راحتها مع امها وبعيد عن اذن اليهال عشان ما يلقطون الكلام
——————
نرجع لبيت عوشه
معضد مندمج ع لابتوبه فالصاله وفي ايده صحن الريوق
عوشه وهي تعابل الغدا فالمطبخ مع الخدامات : هاتي الليمون اليابس وكسريه من النص
نوران : ماما هذا ما يقدر يكسر نص
عوشه : هب تنصفينه كامل شوي بس عشان الطعم
نوران هزت راسها بموافقه
عوشه ل ساره: هاتي المله العوده بننجب العيش فيه
ساره ماما فيه وسط وفي كبير هزا كبير مافي داخل بيت
عوشه : وينه عيل !!
ساره سكتت ماعرفت بشو ترد
عوشه : وينه؟؟
نوران لفت عليه : داخل بيت ماما شيخه
عوشه باندهاش: شوو !! من زود ما تطببخ بنت اليوم ، هااتي المله الوسط امري لله
ساره نزلت المله من الكبت وغسلتها وبعد ما نشفتها نجبت عوشه العيش فيه وعدلته
عوشه: حطوهم ف غرفه الطعام ، نوران سوي الحلوايات بس نوعين اليوم
ظهرت عوشه عنهم وهي راكبه الدري انتبهت لمعضد
عوشه : ماشالله انت هنيه! وبعدك تتريق ؟
معضد وعينه عالاب: اميه يوعان
عوشه: ابوك ان يا الحين بيهزبك نش اتجهز للصلاه يلا
معضد بضيج: انشالله
...
