كتاب طبخ

الحلقه الثانيه

مرحبا حبيباتي

الطبق الرئيسي برگر لحم

المقادير : كيلو لحم شرح نص كيلو شحم 8 صمونات عاديه وثوم حسب الرغبه بهارات بركر كاري المختار وكمون وسبع بهارفلفل اسود  و4 بيضات ملعقتين اكل نشأ ملعقتين راشي او طحينيه ملعقتين كجب ملح حسب الرغبه وملعقه خل ابيض

الطريقه : نضع في الثرامه اللحم والشحم والصمون والثوم معا بعدها نضيف جميع المواد المذكوره ونعجنه ونكوره ونضعها في القالب الخاص بالبركر تقريبا يصير 50 قطعه حجم جبير والف عافيه 👇

بالنسبه ل لفة البركر
نجيب صمون كهربائي دائري ونفتحها قسمين ندهن وحده بكجب والثانيه بمايونيز
نكدر نشوي البركر بكابسة الصاج او نكدر نشوي بالفرن او نكلي بزيت قليل حسب ذوقكم ونجهز فنكر او حلقات بتيته ونجهز طماطا حلقات وفلفل حسب الذوق وخيار هم حلقات وشرائح جبن حسب الذوق
نبدي نرتب اللفه نخلي بركر وفنكر وطماطا وفلفل وخيار وشرائح الجبن ونكدر نضيف كرفس واوراق خس او لهانه حسب الذوق
تكدرون تكبسون اللفه بكابسة الصاج تطلع رهيبه واطيب من الجاهز بقاطات 👇

❣️❣️❣️❣️❣️❣️❣️❣️❣️❣️❣️❣️❣️❣️

بابا غنوج ع طريقتي : نشوي باذنجانه حجم كبير بعدها نخلي قليل من زيت الزيتون ونحمس بصل وكركم وبعدها نضيف الباذنجانه المشويه
نبقى نقلب بي مدة دقايق بعدها نرفعها من النار

في وعاء اخر نخلي 3 ملاعق كبار راشي او طحينيه ونخلي 3 ملاعق زبادي وملح حسب الذوق وجوز حسب الذوق وكرفس حسب الذوق تكدرون تستغنون عنه ونضيف عليه الباذنجانه وينخلطن سويه والف عافيه 👇

❣️❣️❣️❣️❣️❣️❣️❣️❣️❣️❣️❣️❣️❣️

الكليجه حسب طلب الاغلبيه
3 اكواب  طحين صفر 1 كوب دهن وبيضه وحده وكيس بيكنك باودر هيل مطحون وذرات ملح وذرات سكر ملعقة اكل خل ابيض ينخلطن سويه بعدها نضيف القشطه اي نوع مو مهم والكميه حسب نوع الطحين نعجنها بالقشطه لحد متتماسك العجينه نتركها ترتاح ربع ساعه بعدها نشكلها حسب الذوق

من نكمل التشكيل ناخذ بيضه كامله وقليل فانيلا سائله وخل ابيض قليل وصبغ لون برتقالي قليل ينخلطن وندهن الوجه مالت الكليجه 👇

❣️❣️❣️❣️❣️❣️❣️❣️❣️❣️❣️❣️❣️❣️❣️

حشوات الكليجه
التمر كميه حسب الحاجه منزوع النوى وراشي او طحينيه الكميه حسب الذوق
نضع الراشي ع نار هادئه لمن يحمه نضع التمر ونبقى نقلب بي لحد مدة خمس دقايق ع نار هادئه بعد نشيله عن النار ونخلي هيل مطحون او اي شي حسب الذوق ونخلي جوز مقطع حسب الذوق

❣️❣️❣️❣️❣️❣️❣️❣️❣️❣️❣️❣️❣️❣️

بالنسبه للمكسرات كلهن ينطحنن هنه والسكر سويه دون اضافات

اي سؤال اني جاهزه

شتحبون بالحلقه القادمه اي اكله اذكروها هنا واني بالخدمه

تحياتي للجميع