اسلامي حياتي ❤

الفتور😩

الفتور في العبادات امر طبيعي ، بس الشيطان بيستغل اللحظه دي علشان يدخل جوا عقلك قناعة :-
مينفعش تعبد ربنا غصب عنك
مينفعش تصلي و انت مش عايز
مينفعش تقيم الليل و انت جواك مش طايق .
و يفهمك ان كده نفاق منك ، و بيتسغل الفتره القصيره ال اي حد بيتعرض لها بإنها تكون فترة سقوط تماماً مع الله .
- طب و الحل ؟
١/ متوقفش عبادتك ، اعملها و لو قليله ، احب الاعمال ( ادومها ) مقالش ( اكثرها ) ، يعني لو حاسس بفتور ناحية قيام الليل صلي ع الاقل الشفع و الوتر ، دول اساسي يعني ، لحد ما تعدي الفتره دي ، قرآن مثلاً ؟ ، اقرأ وجه في اليوم ع الاقل لحد ما تعدي الفتره دي ، و هكذا اي عباده ، اما بالنسبه للفروض ، فـ دي مفيش فيها اقل و اكثر :)) ، و أصطبر لعبادته ، اعتبره امتحان صدق بيبان في صدقك ان حتى لو مظهرش جوايا احساس و لذة معينه انا برضه عايز قربك يارب عشان قربك نفسه حتى لو محستش الوقتي .
٢/ مش هقولك شوف فضل كل عباده قد ايه عشان تتشجع ، لا انا عايزاك تعبده عن حب مش بس انتظار للثواب :) ، اقرأ شويه عن الآمر سبحانه مش الأمر ، يعني ايه ؟ يعني انت اصلاً بتصلي ليه ولا بتقيم ولا بتصوم ولا ولا لمين ؟
لله صح ؟
اقرأ عنه شويه ، متقرأش عن فضل العباده ال حاسس فيها فتور الوقتي ، ابدأها قرأه عن الله ، اسماء الله الحسنى مثلاً ، تتفرج ع اعجاز علمي في الكون يدل ع قدرته و عظمته ، تتفرج ع برنامج لحد بتحبه بيتكلم عن حب الله و لذة القرب منه ، خلي ده المحور ال هتشوفه ، قلبك هيتحرك جامد ، و القساوه هتختفي شويه شويه ، هتبقى انت ال عايز تصلي و تقرأ قرآن و و ، علشان جواك باعث حب لله ، و كل ده لسه مقرأتش عن فضل العباده ده انت بس قرآت عن حبيبك و سمعت عنه فـ قلبك اشتاق ، :) .
٣/ لو عندك واحد صاحبك تحسبه ع خير اطلب منه يشجعك ، اصل الشيطان بيستفرد بالـبني ادم ال لوحده ، عادي اطلبها مش عيب ؟ ، علشان تحس ان في حد متابعك فـ اما تكسل يشجعك تاني ، بيفرق الموضوع ده .
٤/ اخرج ، اتفسح ، سافر ، اضحك مع اصحابك ، انتفس يعني :) ، ساعات كتر المشاكل و الهم و القلق و القعده في البيت بيتعب النفسيه جامد فـ يتيجي ع كله بقى ، غير الروتين شويه في يومك اكسره ، هتلاقي روحك انتعشت تاني باذن الله .
- اللهم يا ذا الجلال و الاكرام حققنا بحقائق اهل القرب اهل محبتك و ثبتنا يا مقلب القلوب و اشغلنا بالشوق اليك -

*الداعية الصغيرة* 🤭♥👑🌼