# ﺭﻭﺍﻳﺔ _ ﻣﻌﻚ _ ﺧﻠﻘﺖ _ ﻣﻦ _ ﺟﺪﻳﺪ
ﺍﻟﺤﻠﻘﺔ ﺍﻟﺴﺎﺩﺳﺔ ﻭﺍﻟﻌﺸﺮﻭﻭﻭﻭﻭﻭﻥ .......
ﺍﺳﻴﻞ : ﺑﻴﺸﻮ ﺍﻟﺤﻴﺎﺓ ﺗﻤﺸﻲ ﻣﺶ ﻫﻚ ﺭﺍﻩ
ﺍﻧﺎ : ﺳﻮﻻ ﻓﻜﻴﻨﻲ ﺍﻟﻠﻪ ﻳﺮﺑﺤﻚ
ﻣﺮﺍﻡ : ﺍﺳﻴﻞ ﻳﺒﻴﻚ ﺍﺳﺎﻣﺔ
ﺍﺳﻴﻞ : ﺑﺴﻢ ﺍﻟﻠﻪ ﺧﻠﻌﺘﻴﻨﻲ
ﻣﺮﺍﻡ : ﻟﻴﺶ ﺣﻘﻴﺘﻲ ﺟﻦ ﻗﺪﺍﻣﻚ
ﺍﺳﻴﻞ : ﻫﻴﺎ ﺧﻠﻨﻲ ﻧﻄﻠﻊ ﻟﻲ ﺍﺳﺎﻣﺔ
ﺍﻧﺎ : ﻛﻨﺖ ﺩﺍﻳﺮﺓ ﺭﻭﺣﻲ ﻧﻠﻢ ﻓﻲ ﺍﻟﻜﻮﺟﻴﻨﺔ ﺷﻮﻱ ﻣﺮﺍﻡ ﺗﺒﺤﺖ ﻓﻲ ﻭﺗﻘﻮﻟﻲ
ﻣﺮﺍﻡ : ﺍﻧﺘﻲ ﻭﺍﺣﺪﺓ ﻣﺶ ﻣﺤﺘﺮﻣﺔ ﻭﺗﻠﺼﻖ ﻓﻲ ﺍﻟﺮﺟﺎﻟﻪ ﻭﻛﻞ ﺍﻟﻲ ﻳﺎﺧﺬﻙ ﺿﺮﻭﺭﻱ ﺗﺴﻴﺮﻟﻪ ﺣﺎﺟﺔ ﻗﺘﻠﺘﻲ ﻣﺤﻤﺪ ﻭﺍﺣﻤﺪ ﺩﺍﺭ ﺣﺎﺩﺙ ﻗﺒﻞ ﺭﺍﺡ ﻓﻴﻬﺎ ﻭﺟﻬﻚ ﺷﺆﻭﻭﻡ ﻋﻠﻰ ﻋﻴﻠﺔ ﺣﺘﻰ ﻣﺎ ﻋﻨﺪﻙ ﻭﻓﺎﺀ ﻟﻰ ﺍﻟﻤﺮﺣﻮﻡ ﺩﻏﺮﻱ ﺧﺬﻳﺘﻲ ﺧﻮ ﻭﺣﺪﺓ ﻣﻨﺤﻠﺔ
ﺍﻧﺎ : ﻛﻨﺖ ﻧﺴﻤﻊ ﻓﻲ ﺍﻟﻜﻼﻡ ﻭﺣﺴﻴﺖ ﻟﺴﺎﻧﻲ ﺍﻧﺮﺑﻂ ﻣﺎ ﻗﺪﺭﺗﺶ ﻧﺮﺩ ﻋﻠﻴﻬﺎ ﺳﻴﺒﺘﻬﺎ ﻓﻲ ﺍﻟﻜﻮﺟﻴﻨﺔ ﻭﺭﻗﻴﺖ ﻟﻠﺸﻘﺔ ﻭﺗﻤﻴﺖ ﻧﻌﺰﻕ ﻛﻞ ﺣﺎﺟﺔ ﺗﺠﻲ ﺻﺪﺍﻓﻲ
ﺍﺣﻤﺪ : ﺍﻟﺪﺧﺎﻥ ﻛﻤﻞ ﻭﺭﻗﻴﺖ ﻧﺒﻲ ﻧﺠﻴﺐ ﻗﺮﻃﺎﺱ ﻣﺎﻟﺸﻘﺔ ﻭﺍﻭﻝ ﻣﺎ ﻭﺻﻠﺖ ﻗﺪﺍﻡ ﺑﺎﺑﺎ ﺍﻟﺸﻘﺔ ﻧﺴﻤﻊ ﻓﻲ ﻗﺮﺑﺠﺔ ﺣﻠﻴﺖ ﺍﻟﺒﺎﺏ ﻧﻠﻘﻰ ﺑﻴﺸﻮ ﻋﻨﺪﻫﺎ ﺍﻧﻬﻴﺎﺭ ﻭﺗﻌﺰﻕ ﻓﻲ ﻛﻞ ﺣﺎﺟﺔ ﺗﺠﻲ ﺻﺪﺍﻓﻬﺎ
ﺑﻴﺸﻮ ﻛﻨﻚ ﺷﻦ ﻓﻲ
ﺍﻧﺎ : ﻣﺎ ﺧﻠﻠﻠﻠﻠﻠﻜﺶ ﺗﻤﺎﻡ ﺍﻃﻠﻊ ﺑﺮﺍ ﺍﻃﻠﻊ ﺍﻧﺎ ﻧﻘﺘﻞ ﻓﻲ ﺍﻟﺮﺟﺎﻟﻪ ﺍﻧﺎ ﺳﺒﺖ ﻣﻮﺕ ﻣﺤﻤﺪ ﻭﻧﺎ ﺳﺒﺖ ﺍﻟﺤﺎﺩﺙ ﻭﺍﻳﺶ ﺍﺧﺮﻯ ﺍﻩ ﻭﺍﻧﺎ ﻭﺣﺪﺓ ﻣﻨﺤﺮﻓﺔ ﺷﻦ ﺗﺒﻮ ﻣﻨﻲ ﺷﻦ ﻣﺎﺯﺍﻝ ﺗﺒﻮ ﺍﺩﻳﺮﻭ ﺍﺭﺣﻤﻮﻧﻲ ﺍﻧﺎ ﺍﻧﺴﺎﻧﺔ ﻣﺶ ﺣﺠﺮ
ﺍﺣﻤﺪ : ﺗﻤﺎﻡ ﺑﺎﻫﻲ ﺍﻫﺪﻱ
ﺍﻧﺎ : ﻣﺶ ﺡ ﻧﻬﺪﺍ ﻣﺎ ﻧﺒﻴﺶ ﻧﺤﻠﻪ
ﺍﺣﻤﺪ : ﻣﻦ ﻗﺎﻟﻚ ﺍﻟﻜﻼﻡ ﻫﻀﻪ
ﺍﻧﺎ : ﻣﻦ ﻗﺎﻟﻲ ﺷﻦ ﻳﻬﻤﻚ ﻣﻦ ﻗﺎﻟﻲ ﺍﻩ ﺷﻦ ﻳﻬﻤﻚ
ﺍﺣﻤﺪ : ﺑﺸﺮﺭﺭﺭﻯ ﺑﺸﺮﻯ ﻣﻦ ﻗﺎﻟﻚ ﻫﻚ
ﺍﻧﺎ : ﻣﺮﺍﻡ ﻗﺎﻟﺘﻠﻲ ﻣﻌﺶ ﻗﺪﺭﺕ ﻧﺼﺒﻲ ﻭﻗﻌﺪﺕ ﻋﻠﻰ ﺭﻛﺒﻲ ﻭﻛﺎﻥ ﻓﻲ ﻗﺰﺍﺯ ﻣﻔﺘﺮﺵ ﻣﻦ ﺍﻟﻲ ﺍﻟﺘﺤﻒ ﺍﻟﻲ ﻛﺴﺮﺗﻬﻢ ﺟﺮﺣﺘﻨﻲ
ﺍﺣﻤﺪ : ﺑﻴﺸﻮﻭﻭ ﻃﺎﺣﺖ ﻭﺍﻟﻘﺰﺍﺯ ﻛﺎﻥ ﻣﺠﺮﺣﻬﺎ ﺷﻠﺘﻬﺎ ﻟﻠﺪﺍﺭ ﻭﻫﻲ ﻋﻨﻴﺪﺓ ﻣﺎ ﺗﺒﻲ ﻧﻈﻔﻠﻬﺎ ﺍﻟﺠﺮﺡ
ﺍﻧﺎ : ﺗﻤﺎ ﻳﻨﻈﻔﻠﻲ ﺍﻟﺠﺮﺡ ﺑﺸﻮﻱ ﺑﻴﺶ ﻣﺎ ﻳﻮﺟﻌﻨﻴﺶ ﻃﻬﺮﺍ ﻟﻲ ﻭﺣﻄﻠﻲ ﻗﻄﻦ ﻭﺷﺎﺵ ﻭﻗﺎﺭﺯﻩ
ﺍﺣﻤﺪ : ﺍﻩ ﺧﻼﺹ ﻛﻤﻠﻨﺎ ﺑﺤﺘﺖ ﻓﻴﻬﺎ ﻋﻴﻮﻧﻬﺎ ﻛﺎﻧﻦ ﻣﻌﺒﻴﺎﺕ ﺩﻣﻮﻉ ﻭﺣﺰﻳﻨﺎﺕ
ﺍﻧﺎ : ﻧﺒﻲ ﻧﻤﺸﻲ ﻟﻬﻠﻲ
ﺍﺣﻤﺪ : ﺗﻌﺮﻓﻲ ﻣﺶ ﺡ ﻧﺎﺑﻰ ﺻﺢ
ﺍﻧﺎ : ﺍﺣﻤﺪ ﻭﺻﻠﺖ ﺣﺪﻱ ﺧﻼﺹ ﻭﺍﻟﻠﻪ ﻧﺎ ﻣﺎﻋﺪ ﻧﻘﺪﺭ ﻛﻞ ﻣﺮﻩ ﻣﺘﻬﻤﻴﻨﻲ ﺑﺸﻲ ﺣﺎﺟﺔ ﺣﺮﺍﻡ ﻋﻠﻴﻜﻢ ﺍﺭﺣﻤﻮﻧﻲ
ﺍﺣﻤﺪ : ﺑﻴﺸﻮ ﻣﺎﻧﺒﻴﺶ ﻧﺤﻜﻲ ﻣﻌﺎﻛﻲ ﺗﻮﺍ ﺍﻧﺘﻲ ﻣﻀﺎﻳﻘﺔ ﺗﻤﺎﻡ ﺑﻌﺪ ﺗﻬﺪﻱ ﻧﺤﻜﻮ ﺗﻮﺍ ﺗﺮﻳﺤﻲ ﻭﻣﺮﺍﻡ ﺣﺴﺎﺑﻬﺎ ﻣﻌﺎﻱ
ﺍﻧﺎ : ﻻ ﻣﺘﺤﻜﻴﺶ ﻣﻌﺎﻫﺎ ﺗﻮﺍ ﺗﻘﻮﻝ ﺍﻧﺎ ﻧﺤﺮﺵ ﻭﻧﺪﻳﺮ ﻓﻲ ﻣﺸﺎﻛﻞ
ﺍﺣﻤﺪ : ﺗﻲ ﺍﻧﺘﻲ ﺷﻦ ﻗﺼﺘﻚ ﺷﻦ ﺗﺒﻲ ﻛﻞ ﻣﺎ ﻧﺒﻲ ﻧﺤﻜﻲ ﻣﻊ ﺣﺪ ﺗﻘﻮﻟﻲ ﺗﻮﺍ ﻳﻘﻮﻟﻮ ﻭﺗﻮﺍ ﻳﺪﻳﺮﻭ ﻣﺎﺩﺧﻠﻜﺶ ﺍﻧﺎ ﺍﻟﻤﻮﺿﻮﻉ ﻫﻀﻪ ﺡ ﻧﺤﻠﻪ
ﺍﻧﺎ : ﻛﻨﺖ ﺧﺎﻳﻔﺔ ﺗﺼﻴﺮ ﻣﺸﻜﻠﺔ ﺑﺴﺒﺘﻲ ﻧﺎ ﺑﺲ ﻫﻮ ﺟﺎﺀ ﻭﻧﺎ ﻗﺎﻟﺒﺔ ﺍﻟﺪﻧﻴﺎ ﻋﺎﺭﻓﺔ ﺭﻭﺣﻲ ﻣﻌﺮﻓﺘﺶ ﻧﻤﺴﻚ ﺭﻭﺣﻲ ﺑﻌﺪ ﻧﻌﺼﺐ ﻣﻨﺤﻘﺶ ﻗﺪﺍﻣﻲ ﻭﻧﻘﻌﺪ ﻧﻜﺴﺮ
ﺍﺣﻤﺪ : ﻟﻤﻴﺖ ﺍﻟﺤﻮﺳﺔ ﺍﻟﻲ ﻛﺎﻧﺖ ﺩﺍﻳﺮﺗﻬﺎ ﻭﻟﻤﺖ ﺍﻟﻘﺰﺍﺯ ﻓﻲ ﺍﻟﻜﻨﺎﺳﺔ ﻭﻧﺎ ﻧﻠﻢ ﻟﻘﻴﺘﻬﺎ ﻣﺼﺒﻴﺔ ﻭﺳﺎﻧﺪﺓ ﺭﺍﺳﻬﺎ ﻋﻠﻰ ﺍﻟﺴﺎﺱ ﻭﺗﺒﻜﻲ
ﺍﻧﺎ : ﻛﻨﺖ ﻣﺼﺒﻴﺔ ﻧﺒﻜﻲ ﻻﻧﻲ ﺧﺮﺑﺘﻠﻪ ﺷﻘﺘﻪ ﺷﻮﻱ ﻫﻮ ﺟﺎﻧﻲ
ﺍﺣﻤﺪ : ﻛﻨﻚ ﻛﺮﺍﻋﻚ ﺗﻮﺟﻊ ﻓﻴﻚ
ﺍﻧﺎ : ﺷﻮﻱ ﺑﺲ ﻣﺶ ﻭﺍﺟﺪ
ﺍﺣﻤﺪ : ﺑﺎﻩ ﻟﻴﺶ ﺻﺒﻴﺘﻲ
ﺍﻧﺎ : ﺻﺒﻴﺖ ﻧﻠﻢ ﺍﻟﻲ ﺩﺭﺗﻪ
ﺍﺣﻤﺪ : ﺧﻼﺹ ﻟﻤﻴﺘﻪ ﻧﺎ
ﺍﻧﺎ : ﺍﺳﻔﻪ ﻻﻧﻲ ﺧﺮﺑﺘﻠﻚ ﺷﻘﺘﻚ
ﺍﺣﻤﺪ : ﻟﻴﺶ ﻟﺒﻜﺎ ﺗﻮﺍ ﺍﻣﻢ ﺧﻼﺹ ﺑﻴﺸﻮ ﺗﻌﺒﺘﻴﻨﻲ ﻭﺍﻧﺘﻲ ﻏﻴﺮ ﺗﺒﻜﻲ ﻭﻫﺬﻱ ﺷﻘﺘﻚ ﺣﺘﻰ ﺍﻧﺘﻲ ﺗﻤﺎﻡ ﺗﻘﺪﺭﻱ ﺍﺩﻳﺮﻱ ﺍﻟﻲ ﺗﺒﻴﻬﺎ ﻣﺘﺄﺳﻔﻴﺶ
ﺍﻧﺎ : ﺷﻜﺮﺁ ﻭﻧﺤﻨﺎ ﻧﺤﻜﻮ ﺭﻥ ﺍﻟﺠﺮﺱ ﻋﺪﺍ ﺍﺣﻤﺪ ﻳﺤﻞ
ﺍﺳﻴﻞ : ﺧﻴﺮ ﻳﺎ ﺍﺣﻤﺪ ﻭﻳﻦ ﺑﻴﺸﻮ
ﺍﺣﻤﺪ : ﺧﺸﻲ ﻧﺒﻴﻚ ﻧﺎ
ﺍﺳﻴﻞ : ﺷﻦ ﻓﻲ ﻭﻳﻦ ﺑﻴﺸﻮ
ﺍﺣﻤﺪ : ﺑﻴﺸﻮ ﻗﺎﻋﺪﺓ ﺟﻮﺍ ﺧﺸﻲ ﻧﺒﻴﺶ ﻧﺎﻛﻠﻚ ﻧﺎ
ﺍﺳﻴﻞ : ﻣﺶ ﻫﻚ ﺑﺲ ﺷﻜﻠﻚ ﻣﻀﺎﻳﻖ ﺧﺸﻴﺖ ﻛﺎﻧﺖ ﺑﻴﺸﻮ ﻣﺼﺒﻴﺔ ﻭﻛﺮﻋﻬﺎ ﻋﻠﻴﻬﺎ ﻗﺎﺭﺯﺍ
ﺑﻴﺸﻮ ﻛﻨﻚ ﺑﺴﻢ ﺍﻟﻠﻪ ﺷﻦ ﺻﺎﺭﻟﻚ
ﺍﻧﺎ : ﻃﺤﺖ ﻋﻠﻰ ﻛﺮﺍﻋﻲ
ﺍﺳﻴﻞ : ﻭﻳﻦ ﻃﺤﺘﻲ
ﺍﺣﻤﺪ : ﺍﺳﻴﻞ ﺗﻌﺎﻟﻲ ﻧﺒﻴﻚ ﺷﻮﻱ
ﺍﻧﺎ : ﺍﻭﻝ ﻣﺎ ﺍﺣﻤﺪ ﻗﺎﻝ ﻫﻚ ﺧﻔﺖ ﺗﻤﻴﺖ ﻧﺤﺮﻙ ﺭﺍﺳﻲ ﺑﻤﻌﻨﻰ ﻣﺘﺤﻜﻴﺶ ﻣﻔﻴﺶ ﻻ ﺣﻴﺎﺓ ﻟﻤﻦ ﺗﻨﺎﺩﻱ
ﺍﺳﻴﻞ : ﻛﻨﻜﻢ ﺷﻦ ﻓﻲ
ﺍﺣﻤﺪ : ﺍﺳﻤﻌﻲ ﻧﺒﻴﻚ ﺗﻘﻮﻟﻲ ﻟﺒﻨﺖ ﻋﻤﻚ ﻣﻌﺶ ﺗﺠﻲ ﺷﻮﺭ ﺑﻴﺸﻮ ﻭﻣﺘﺪﺧﻠﺶ ﻓﻲ ﺷﻲ ﻣﺎ ﻳﺨﺼﻬﺎ ﻭﻗﻮﻟﻴﻠﻬﺎ ﺗﻮﺍ ﻧﺎ ﻧﺒﻬﺖ ﻛﺎﻥ ﺍﺩﺧﻠﺖ ﻣﺮﺓ ﺍﺧﺮﻯ ﺍﻭ ﺣﻜﺖ ﻣﻌﺎﻫﺎ ﻛﻼﻡ ﻳﺠﺮﺣﻬﺎ ﻳﻮﻣﻬﺎ ﺍﺳﻮﺩ
ﺍﺳﻴﻞ : ﻫﻀﻪ ﻛﻠﻪ ﻋﻠﻰ ﺧﺎﻃﺮ ﺣﺮﺟﺘﻬﺎ ﻗﺪﺍﻡ ﺍﻟﺼﺒﺎﻳﺎ ﻭﻣﺎﺑﺘﺶ ﺗﺴﻠﻢ ﻭﺗﻌﺎﻣﻠﺖ ﻣﻌﺎﻫﺎ ﻣﻌﺎﻣﻠﺔ ﻣﺶ ﺗﻤﺎﻡ ﻧﻴﻦ ﺧﺸﺖ ﻋﻠﻴﻬﻢ ﻓﻲ ﺍﻟﻜﻮﺟﻴﻨﺔ
ﺍﺣﻤﺪ : ﺷﻨﻮﻭ ﺍﺧﺮﻯ ﻻ ﻫﺬ ﺯﻭﺩﺗﻬﺎ
ﺍﺳﻴﻞ : ﻗﺼﺪﻙ ﻣﺶ ﻫﻀﻪ ﺍﻟﻤﻮﺿﻮﻉ ﺷﻦ ﺩﺍﺭﺕ ﺍﺧﺮﻯ
ﺍﺣﻤﺪ : ﺣﻜﻴﺘﻠﻬﺎ ﺍﻟﻲ ﺻﺎﺭ ﻭﻗﺘﻠﻬﺎ ﺗﺤﺬﺭﻫﺎ ﻻﻥ ﻣﺶ ﻣﺴﺆﻭﻝ ﻋﻠﻰ ﺡ ﻳﺼﻴﺮ
ﺍﺳﻴﻞ : ﻻ ﻋﻨﺪﻙ ﺍﻟﺤﻖ ﺗﺰﻋﻠﻴﺶ ﻳﺎﺑﻴﺸﻮ ﻭﺳﺎﻣﺤﻴﻨﻲ ﻛﻨﺖ ﻧﺤﺴﺎﺑﻚ ﺣﻜﻴﺘﻴﻠﻪ ﻋﻠﻰ ﺍﻟﻘﺼﺔ ﻫﺬﻱ
ﺍﻧﺎ : ﻻ ﻋﺎﺩﻱ ﻧﺎ ﻗﺘﻠﻪ ﻣﺎ ﻳﺤﻜﻴﺶ ﺑﺲ ﺧﻮﻙ ﻣﺎ ﻳﺴﻤﻊ ﺍﻟﻜﻠﻤﺔ
ﺍﺣﻤﺪ : ﺍﻧﺘﻲ ﻣﺮﺗﻲ ﻭﻛﺮﺍﻣﺘﻚ ﻣﻦ ﻛﺮﺍﻣﺘﻲ ﻭﻣﺎﻧﺴﻤﺢ ﻟﻲ ﺍﻱ ﺣﺪ ﻳﺤﻜﻲ ﻣﻌﺎﻙ ﺍﻭ ﻳﻀﺎﻳﻘﻚ
ﺍﺳﻴﻞ : ﻧﻨﺰﻝ ﻧﺎ ﻣﺎ ﻋﻨﺪﻱ ﻟﻴﺶ ﻗﺎﻋﺪﺓ ﻋﺰﻭﻝ ﻫﻨﺎ
ﺍﻧﺎ : ﺍﻧﺤﺮﺟﺖ ﺑﻜﻞ ﻭﺟﻬﻲ ﺗﻤﺎ ﺍﻻﻟﻮﺍﻥ
ﺍﺣﻤﺪ : ﺍﺣﻢ ﻻ ﺧﻠﻴﻚ ﻧﺎ ﻧﺒﻲ ﻧﻨﺰﻝ ﺍﻗﻌﺪﻱ ﻣﻌﺎﻫﺎ ﻭﻓﻲ ﻗﺰﺍﺯ ﻣﻔﺘﺮﺵ ﻏﺎﺩﻱ ﻟﻤﻲ ﺑﻴﺸﻮ ﻛﺎﻧﺖ ﺩﺍﻳﺮﻩ ﺣﻔﻠﺔ ﺗﻜﺴﻴﺮ ﻫﻨﺎ
ﺍﺳﻴﻞ : ﻫﻬﻬﻬﻬﻬﻬﻬﻬﻪﻫﻬﻬﻬﻬﻬﻬﻬﻪ ﻣﺠﻨﻮﻧﺔ
ﺍﻧﺎ : ﺗﻤﻴﺖ ﻧﻠﻢ ﻣﻌﺎﻫﺎ ﻭﺟﻮﻟﻴﺎ ﺟﺒﺘﻠﻲ ﺍﻟﺒﻨﺎﺕ ﺑﺪﻟﺘﻠﻬﻢ ﻭﺭﻗﺪﺗﻬﻢ ﻭﻧﺰﻟﺖ ﺳﻮﻻ ﻭﻧﺎ ﻛﺴﺪﺕ ﺑﺮﻭﺣﻲ ﻓﻲ ﺍﻟﺸﻘﺔ ﺗﻤﻴﺖ ﻧﺪﻭﺭ ﻓﻴﻬﺎ ﻭﺑﻌﺪﻫﺎ ﺩﺭﺕ ﻛﻴﻜﻪ ﺑﺎﻟﺸﻜﻮﻻﻃﺔ
ﺍﺣﻤﺪ : ﺭﻗﻴﺖ ﻧﻄﻤﻦ ﻋﻠﻰ ﺑﻴﺸﻮ ﻧﺴﻤﻊ ﻓﻴﻬﺎ ﺗﻐﻨﻲ ﻭﺻﻮﺗﻬﺎ ﻳﻬﺒﻞ ﻭﻫﻲ ﺗﻐﻨﻲ
ﻋﺎﻳﺸﺔ ﺣﺎﻟﺔ ﺣﺐ ﻣﻌﺎﻙ ﻭﺧﺪﺍﻧﻲ ﻭﺻﻌﺐ ﺍﻧﻬﺎ
ﺗﺘﻜﺮﺭ ﺗﺎﻧﻲ ﻭﺑﻌﺸﻬﺎ ﻟﻮ ﺍﻧﺖ ﺑﻌﻴﺪ ﺍﻭ ﻗﺪﺍﻣﻲ
ﻭﺍﺧﻴﺮﺍً ﺍﻻﻳﺎﻡ ﺭﺿﻴﻮ ﻋﻠﻴﺎ ﺍﺧﻴﺮﺍً ﺟﻲ ﻳﺎ ﺣﺒﻴﺒﻲ ﻳﻮﻡ ﻟﻴﻪ
ﺍﺭﺗﺎﺡ ﻣﻦ ﻗﺴﻮﺓ ﺍﻳﺎﻣﻲ ﺳﺒﻨﻲ ﺍﻓﺮﺡ ﺑﻴﻚ ﺷﻮﻳﺔ
ﻭﺍﻧﺴﻰ ﺍﻳﺎﻡ ﺿﻌﻮ ﻣﻨﻲ ﻧﻔﺴﻲ ﻋﻤﺮﻱ ﻳﻌﺪﻱ ﺑﻴﺎ ﻭﻟﻘﻴﻚ ﺑﻌﻨﻴﻚ
ﺩﻭﻝ ﺣﻀﻨﻲ ﻭﺍﻧﺎ ﺟﻨﺒﻚ ...
ﺍﻧﺎ : ﻛﻨﺖ ﻧﻐﻨﻲ ﻭﻣﻨﺴﺠﻤﺔ ﻧﻐﻠﻒ ﺍﻟﻜﻴﻜﺔ ﺑﺎﻟﺸﻜﻮﻻﻃﺔ ﻭﻧﺒﺮﻡ ﻭﺟﻲ ﻧﻠﻘﻰ ﺍﺣﻤﺪ ﻗﺪﺍﻣﻲ
ﺃ ﺃ ﺃﺣﻤﺪ ﻣﻦ ﺍﻣﺘﻰ ﻭﺍﻧﺖ ﻫﻨﺎ
ﺍﺣﻤﺪ : ﻣﻦ ﺍﻭﻝ ﻣﺎ ﺑﺪﻳﺘﻲ ﻛﻨﺘﺶ ﻧﻌﺮﻑ ﺻﻮﺗﻚ ﺳﻤﺢ ﻫﻜﻲ ﻭﻋﺪﻳﺘﻠﻬﺎ ﻭﺧﺬﻳﺖ ﻃﺮﻑ ﻣﻦ ﺍﻟﻜﻴﻜﺔ ﺍﻣﻤﻤﻤﻢ ﺳﻤﺤﺔ
ﺍﻧﺎ : ﺑﺎﻫﻲ ﺍﺻﺒﺮ ﺧﻮﺫ ﻣﻌﺎﻫﺎ ﻋﺼﻴﺮ ﺭﺍﻙ ﺗﻐﺺ ﻓﻴﻬﺎ 😂😂 ﻭﺣﻄﻴﺖ ﻋﺼﻴﺮ ﻭﻗﻌﺪﺕ ﻧﺎﻛﻞ ﻓﻲ ﻫﺎ ﻟﻜﻴﻜﺔ ﺍﻧﺎ ﺣﺎﺟﺘﻴﻦ ﻓﻲ ﺣﻴﺎﺗﻲ ﺍﺑﺪﺍﻉ ﻓﻴﻬﺎ ﻧﺎﻛﻞ ﻭﺍﺟﺪ ﻭﻣﺶ ﻭﺍﺿﺢ ﻋﻠﻲ ﻭﻧﺮﻗﺪ ﻭﺍﺟﺪ ﻛﺎﻥ ﻳﺴﻴﺒﻮﻧﻲ ﻧﺮﻗﺪ ﻟﻠﻴﻠﺘﻴﻦ ﻭﺭﺍ ﺑﻌﻀﻬﻢ ﻣﻌﻨﺪﻳﺶ ﻣﺸﻜﻠﺔ 😂😂😂😂
ﺍﺣﻤﺪ : ﺑﻴﺸﻮ ﺑﺸﻮﻱ ﺭﺍﻛﻲ ﺗﻐﺼﻲ ﺍﻫﻮ ﻗﺎﻋﺪﺓ ﺍﻟﻜﻴﻜﺔ
ﺍﻧﺎ : ﻻ ﺗﻤﺎﻡ ﻫﻜﻲ
ﺍﺣﻤﺪ : ﻣﻌﺶ ﻗﺪﺭﺕ ﻧﻤﺴﻚ ﺭﻭﺣﻲ ﻭﻧﻨﻔﻠﻖ ﺿﺤﻚ 😂😂😂
ﺍﻧﺎ : ﻟﻴﺶ ﺗﻀﺤﻚ ﺍﻩ 😡 ﻣﻌﺶ ﺗﺎﻛﻞ ﻫﻲ ﻭﺧﺬﻳﺖ ﺍﻟﺴﻔﺮﺓ ﻭﺻﺒﻴﺖ
ﺍﺣﻤﺪ 😂😂😂😂: ﻣﺴﻜﺖ ﻳﺪﻫﺎ ﺧﻼﺹ ﻫﻲ ﻣﻌﺶ ﻧﻀﺤﻚ ﺍﻗﻌﺪﻱ 😂😂
ﺍﻧﺎ : ﺍﻫﻮ ﻣﺎﺯﻟﺖ ﺗﻀﺤﻚ 😡
ﺍﺣﻤﺪ : ﺍﻫﻮ ﻭﺍﻟﻠﻪ ﺧﻼﺹ ﺍﺣﻢ ﻫﻢ ﺳﻜﺘﺖ
ﺍﻧﺎ : ﻏﺎﻟﻴﺔ ﻋﻠﻲ ﺍﻟﻜﻴﻜﺔ ﻋﺸﺎﻥ ﻫﻚ ﻧﺎﻛﻞ ﻭﺍﺟﺪ ﻧﺎ
ﺍﺣﻤﺪ : ﻻ ﺻﺢ ﻣﺰﺑﻮﻁ 😅
ﺍﻧﺎ : ﺍﺣﻤﺪ ﻭﺍﻟﻠﻪ ﻧﺼﺒﻲ ﻫﺎ 😠
ﺍﺣﻤﺪ : ﺷﻦ ﺣﻜﻴﺖ ﻧﺎ ﻗﻠﺖ ﻣﺰﺑﻮﻁ 😊
ﺍﻧﺎ : ﺗﻤﻴﺖ ﻧﺎﻛﻞ ﺑﺸﻮﻱ ﻣﺎ ﺻﺒﻴﺖ ﺍﻻ ﻭﻧﺎ ﻣﻜﻤﻠﺘﻬﺎ ﻛﻠﻬﺎ
ﺍﺣﻤﺪ : ﺻﺤﺔ ☺
ﺍﻧﺎ : ﺍﺣﻤﺪ ﻓﻜﻨﻲ ﻣﻦ ﺍﻟﺘﺴﻬﻮﻳﻚ ﻧﺎ ﻧﻴﻦ ﻧﻀﺎﻳﻖ ﻧﻘﻌﺪ ﻧﺎﻛﻞ
ﺍﺣﻤﺪ : ﺍﻟﻤﺸﻜﻠﺔ ﻧﺒﻲ ﻧﻌﺮﻑ ﻭﻳﻦ ﻳﺮﻳﺢ ﻟﻮﻛﺎﻝ 😄
ﺍﻧﺎ : ﻫﺎ ﻫﺎ ﻫﺎ ﺑﺎﺭﺩ ﻭﺻﺒﻴﺖ ﻭﺳﻴﺒﺘﻪ ﻋﺪﻳﺖ ﻟﻠﻜﻮﺟﻴﻨﺔ ﻧﻐﺴﻞ ﺍﻟﻌﻮﺍﻳﺰ
ﺍﺣﻤﺪ 😂😂😂😂😂: ﺗﻤﻴﺖ ﻣﻐﻴﺮ ﻧﻀﺤﻚ
ﺍﻧﺎ : ﺧﻼﺹ ﺳﺪﻙ ﺿﺤﻚ ﻭﺍﻧﺖ ﻣﺎ ﺻﺪﻗﺖ
ﺍﺣﻤﺪ : ﻫﻤﻤﻢ 🙊 ﺳﻜﺘﺖ ﺗﻤﺎﻡ
ﺍﻧﺎ 😂😂: ﺗﻤﺎﻡ
ﺍﺣﻤﺪ : ﻭﻳﻦ ﺍﻟﺼﻐﺎﺭ
ﺍﻧﺎ : ﺭﻗﺪﻥ ﻳﻴﻴﻴﻲ ﺿﺮﻭﺭﻱ ﺗﺤﻜﻲ ﺑﺪﻥ ﻫﻴﺎ ﻳﺎﻣﺎﻣﺎ
ﺍﺣﻤﺪ : ﺗﻮﺍ ﻧﻌﺪﻱ ﻧﺠﻴﺒﻬﻢ ﺧﻠﻴﻚ
ﺍﻧﺎ : ﺍﻟﻠﻪ ﻳﺮﺑﺤﻚ ﻳﺎﻭﻟﺪﻱ ﻭﻣﺶ ﻋﺎﺭﻓﺔ ﻛﻴﻒ ﻃﻠﻌﺖ ﻣﻨﻲ
ﺍﺣﻤﺪ : ﺍﻳﺶ ﺍﻳﺶ 😂😂😂😂😂 ﻭﺍﻟﻠﻪ ﻋﻴﺪﻳﻬﺎ
ﺍﻧﺎ : ﺍﺣﻤﺪ ﻋﺪ ﺧﻼﺹ ﻃﻠﻌﺖ ﻫﻚ ﻭﺍﻧﺖ ﺍﺩﻗﻖ 😯
ﺍﺣﻤﺪ 😂😂😂😂😂:
ﺍﻧﺎ : ﻋﺪﻱ ﺟﻴﺐ ﺍﻟﺒﻨﺖ ﻗﺮﻳﺐ ﺗﻤﻮﺕ ﻣﺎﻟﺒﻜﺎ 😠
ﺍﺣﻤﺪ : ﻋﺪﻳﺖ ﻛﻨﻬﺎ ﺣﺒﻴﺒﺖ ﺑﺎﺑﺎ ﻟﻴﺶ ﺗﺒﻜﻲ ﺟﻌﺘﻲ ﺗﺒﻲ ﺗﻤﻤﻲ ﻫﻴﺎ ﻧﻌﺪﻭ ﻟﻤﺎﻣﺎ ﺍﺩﻳﺮﻟﻠﻨﺎ ﺍﻭﻛﺎﻝ
ﺍﻧﺎ : ﺩﺭﺗﻠﻬﻢ ﺍﻟﻮﺟﺒﺔ ﻭﺟﺒﺖ ﻣﻼﻙ ﻭﻭﻛﻠﺘﻬﻢ ﻭﺍﺣﻤﺪ ﻳﻠﻌﺐ ﻓﻴﻬﻢ ﻛﻨﺖ ﻧﺒﺤﺖ ﻓﻴﻬﻢ ﺣﺴﻴﺖ ﺑﺸﻌﻮﺭ ﺣﻠﻮ ﺑﻨﺎﺗﻲ ﻋﻨﺪﻫﻢ ﺍﺏ ﻳﻠﻌﺐ ﻓﻴﻬﻢ ﻭﻳﻬﺘﻢ ﺑﻴﻬﻢ ﺣﺴﺎﺱ ﺣﻠﻮ ﻟﻤﺎ ﺗﻜﻮﻥ ﻋﻴﻠﺔ ﻛﺎﻣﻠﺔ ﺟﻮ ﺍﺳﺮﻱ 😍
ﺍﺣﻤﺪ : ﺑﻴﺸﻮ ﻫﻴﺎ ﻣﺎ ﺗﺒﻴﺶ ﺗﻌﺸﻴﻨﺎ ﻭﻻ ﺷﻨﻮ
ﺍﻧﺎ : ﺷﻦ ﺗﺒﻲ ﺗﺎﻛﻞ ☺
ﺍﺣﻤﺪ : ﺷﻘﺎﺷﻖ ﺑﺲ ﺧﺎﻃﻲ ﺍﻧﻮﺍﻉ ﺍﻟﺠﺒﻨﺔ 😂😂
ﺍﻧﺎ : ﺑﺎﻩ ﺗﻮﺍ ﺗﺸﻮﻑ ﻋﺪﻳﺖ ﻋﺠﻨﺔ ﺑﻴﺘﺰﺍ ﻭﻭﺗﻴﺖ ﺍﻟﺼﻮﺹ ﺍﻣﺘﺎﻋﻬﺎ ﻭﺩﺭﺗﻬﺎ ﻓﺘﻠﻜﺖ ﺍﻟﺴﻔﺮﺓ ﻭﺩﺭﺕ ﺷﻮﺭﺑﺖ ﺧﻀﺮﻭﺍﺕ ﻟﻰ ﺳﻮﻣﻲ ﺩﺟﺎﺟﺔ ﻣﺸﻮﻳﺔ ﻭﺳﻼﻃﺎﺕ ﺍﺣﻤﺪ
ﺍﺣﻤﺪ : ﻧﻌﻢ
ﺍﻧﺎ : ﻫﺎﻙ ﻧﺰﻝ ﺍﻟﺴﻔﺮﺓ ﻫﺬﻱ ﻟﻰ ﺳﻮﻣﻲ
ﺍﺣﻤﺪ : ﺍﻭﻭﻭﻭ ﻭﺍﻟﻠﻪ ﻣﺪﻟﻌﺔ ﺳﻮﻣﻲ ﺑﺲ ﻧﺬﻛﺮ ﺑﻌﺪ ﺩﺭﺕ ﺍﻟﺤﺎﺩﺙ ﻣﺎ ﺩﺭﺗﻴﻠﻲ ﺣﺮﻛﺎﺕ ﻭﺟﻮ
ﺍﻧﺎ : ﺗﻌﺮﻓﺶ ﺍﻧﺖ ﺍﻟﺼﺒﺎﻳﺎ ﻳﻘﻌﺪﻥ ﻳﺤﻜﻦ ﻋﻠﻰ ﺑﻌﻀﻬﻢ 😂😂
ﺍﺣﻤﺪ : ﺍﻫﺎ ﺣﺘﻰ ﻧﺎ ﻧﺤﻜﻲ ﻣﺎ ﺗﺠﻴﺒﻲ ﻋﻠﻢ 😂😂
ﺍﻧﺎ : ﻫﻴﺎ ﺍﺣﻤﺪ ﺗﺎ ﻳﺼﻘﻊ ﻟﻮﻛﺎﻝ ﻋﺪﻱ ﻭﺍﻫﻮ ﺣﺘﻰ ﺍﻧﺖ ﺩﺭﺗﻠﻚ ﺑﻴﺘﺰﺍ ﻭﺷﺒﺲ ﻭﻣﺸﺮﻭﺏ ﻳﻴﻴﻴﻴﻲ ﺫﻛﺮﺗﻨﻲ ﻧﺴﻴﺖ ﺍﻟﻌﺼﻴﺮ
ﺍﺣﻤﺪ : ﺍﻱ ﻋﺼﻴﺮ
ﺍﻧﺎ : ﺩﺭﺕ ﻋﺼﻴﺮ ﻃﺒﻴﻌﻲ ﻟﻰ ﺳﻮﻣﻲ ☺
ﺍﺣﻤﺪ : ﻳﻨﺎﻋﻠﻲ ﻧﺎ ﻣﻦ ﻣﺮﺗﻲ ﺍﻟﻔﺘﻼﻛﻪ ﻭﻛﻴﻒ ﻃﻠﻌﺖ ﻣﻮﺵ ﻋﺎﺭﻑ
ﺍﻧﺎ : ﺑﺎﻫﻲ ﻋﺪﻱ ﺑﺴﺮﻋﺔ
ﺍﺣﻤﺪ : ﻧﺰﻟﺖ ﻋﻄﻴﺘﻬﻢ ﻋﺸﺎﺀ ﺳﻮﻣﻲ ﻭﺭﻗﻴﺖ ﺗﻌﺸﻴﻨﺎ
ﺍﻧﺎ : ﺍﺣﻤﺪ ﺍﻟﺒﻨﺎﺕ ﺭﻗﺪﻥ ﻭﺍﺟﺪ ﺍﻟﻴﻮﻡ ﻭﺍﻧﺖ ﻫﻜﻲ ﻫﻜﻲ ﺗﺒﻲ ﺗﺴﻬﺮ ﻋﻠﻰ ﺣﺎﻟﺔ ﺗﺮﺍﺟﻊ ﻣﻠﻔﻬﺎ ﺻﺢ
ﺍﺣﻤﺪ : ﻭﺍﻟﻤﻄﻠﻮﺏ
ﺍﻧﺎ : ﻭﺭﺍﺱ ﺣﻤﻴﺪﺍ ﻗﻌﺪﻫﻢ ﻳﻼﻙ ﺑﺲ
ﺍﺣﻤﺪ : ﻭﺍﻧﺘﻲ ﺷﻦ ﺗﺒﻲ ﺍﺩﻳﺮﻱ
ﺍﻧﺎ : ﻧﺒﻲ ﻧﻨﺰﻝ ﻟﻮﻃﻰ ﻳﺒﻮ ﻳﺪﻳﺮﻭ ﻧﻮﻋﻴﻦ ﻣﻮﺍﻟﺢ ﻟﻠﻌﺸﺎﺀ ﻭﻧﺒﻲ ﻧﺴﺎﻋﺪﻫﻢ ﻭﻫﻀﻦ ﻣﺶ ﺡ ﻳﻬﻨﻨﻲ ﺑﻴﺶ ﻧﻜﻤﻞ ﺑﺴﺮﻋﺔ ﻭﻧﺮﻗﻰ
ﺍﺣﻤﺪ : ﺍﻩ ﻭﺷﻦ ﺗﺒﻲ ﺗﻠﺒﺴﻲ
ﺍﻧﺎ : ﺍﻟﺘﻮﺗﺔ ﻫﺬ
ﺍﺣﻤﺪ : ﺍﻣﻤﻤﻤﻤﻢ ﺑﺎﻩ ﻋﺪﻱ
ﺍﻧﺎ : ﻧﺰﻟﺖ ﻟﻮﻃﻰ ﻛﺎﻧﻮ ﻣﺎﺯﺍﻝ ﺑﺘﺪﻳﻦ ﻃﻮﻟﺖ ﻋﻠﻴﻜﻢ
ﺳﻤﻴﺮﺓ : ﻻﻻ ﻣﺎﺯﺍﻝ ﺗﻮﺍ ﻏﻴﺮ ﺑﺪﻳﻨﺎ
ﺳﻮﻣﻲ : ﻣﺸﻜﻮﺭﺓ ﻋﻠﻰ ﻋﺸﺎﺀ ﺣﺒﻴﺒﺘﻲ
ﺍﻧﺎ : ﺷﻦ ﺩﺭﺕ ﻣﻦ ﺍﻟﺤﺎﺟﺔ ﺍﻟﻜﺒﻴﺮﺓ
ﺳﻤﻴﺮﺓ : ﻻ ﻣﺎﺷﺎﺀ ﺍﻟﻠﻪ ﻃﻌﺎﻣﻚ ﺳﻤﺢ ﺳﻠﻢ ﺩﺍﻳﺎﺗﻚ
ﺟﻮﺭﻱ ﻭﺟﻮﻟﻴﺎ : ﻭﺍﻟﺒﻴﺘﺰﺍ ﺗﻬﺒﻞ
ﺳﻤﻴﺮﺓ : ﻛﺎﻥ ﺍﺩﻳﺮﻱ ﻣﻨﻬﺎ ﺑﻴﺶ ﺍﻟﻲ ﻳﺠﻲ ﻓﻲ ﻫﻞ ﺍﻻﺳﺒﻮﻉ ﻧﻘﺪﻣﻮ ﻣﻨﻬﺎ
ﺍﻧﺎ : ﺣﺎﺿﺮ ﻳﺎﻋﻤﻴﻤﺔ
ﺳﻤﻴﺮﺓ : ﺳﻠﻤﻚ ﻳﺎﺑﻨﻴﺘﻲ
ﺍﻧﺎ : ﺗﻤﻴﻨﺎ ﻧﺪﻳﺮﻭ ﻓﻲ ﺍﻧﻮﺍﻉ ﺍﻟﻤﻮﺍﻟﺢ ﺭﻗﻴﺖ ﺍﻟﺸﻘﺔ 5 ﺍﻟﻔﺠﺮ ﻛﺎﻥ ﺍﺣﻤﺪ ﺭﻗﺪ ﻓﻲ ﺍﻟﺼﺎﻟﺔ ﻭﺍﻟﺒﻨﺎﺕ ﻣﺮﻗﺪﺍﺕ ﻓﻮﻕ ﻣﻨﻪ ﻛﺎﻧﻮ ﻳﻬﺒﻠﻮﻭﻭﻭﻭ .......
ﺍﻧﺘﻬﺖ ﺍﻟﺤﻠﻘﺔ
ﻣﺎﺯﺍﻝ ﻓﻲ ﺍﺣﺪﺍﺙ ﻭﻣﻔﺎﺟﺎﺕ ﻣﺶ ﻋﺎﺩﻳﺔ ﺑﺲ ﻓﻲ ﺍﻟﺤﻠﻘﺎﺕ ﺍﻟﻘﺎﺩﻣﺔ
ﺍﻧﺘﻈﺮﻭﻭﻭﻭﻧﻲ
أنت تقرأ
معك خلقت من جديد
General Fictionروايه ليبيه تحكي علي بنت عاشت حياة ........الروايه منقوله بين اللهجتين الشرقاويه والغرباوي
