بقلمي: Jawhara
***********
خلت راسها على المخده بعد ما صلت الفجر
والافكار براسها تروح وتجي شلون وافقت
بسهولة هيج خوفي من المشاكل الراح تصير بين
علاء وبابا خلتني اوافق اني احب بابا واحترمه
واليكول عليه يصير معقولة اني ماعديمة شخصية
غيري يقرر حياتي لعد شلون كملت دراسة وتخرجت
اذا اني مااعرف اواجه المشاكل بس بابا ماكدر
اكسر حجايته وعلاء اااخ اااخ سوده عليه طلع مهموم لان ميكدر يعاند بابا ..
شكد مدللني ويحبني وميكسر بخاطري ماادري
ليش بهاي السالفة عاند وياي شلون يابابا ينطيك كلبك ترميني بمكان مااعرفه وتزوجني لرجال
مشايفته بحياتي غريب مااعرف شلون يتعامل
وياي طبعه شخصيته اكيد قروي متعصب مثل
مكال علاء من سالته عمة رحاب وخبرها انو عايش
بقرية تابعة للناصرية
متعرف الراح تتصرفه وطريقة تعاملها ويا
اني المدللة بنت حجي راشد هيج ازوج زواجة
هسة يلا عرفت عصبية علاء وقهرة بس اني ما
عندي جرأة اواجه بابا ...محست غير دموعها
مبلله المخدة تنهدت بحسرة ياربي شلون هذا الرجال يقبل يتزوج من وحدة مشايفها بحياته شلون يقبلها على نفسه اكيد ماعنده شخصية واهلة يتحكمون بي
ههه على اساس اني محد اتحكم بيه ..
********
_ياعيني اسم الله عليه وهسه شلون صار
..والله ياام علاء بس يبجي ومجلب بامه
الدكتور قبل شوي اجى شافه يكول ميخالف
لان ايده مجبسة ويحس عليها ثكل
_يبو يندى منين طلعتلح هاي السالفة
زين شلونها ويه ابو محمد هم حجت ويا
_يااا غير لو تشوفيهم شلون يسولفون بحالت
حماده وكل شوي وسالته حكيم عليك الله
مكال شي الطبيب خاف بي شي حماده
وهو يردلها ياكلبي والله وضعه زين لاتخافين
وتبقين موهوسة
_الله يصلح حالهم وان شاء الله حماده يخليها
ترجع
_اي اكيد لان هسة جاي تقنعه يجي لبيتنه
وحماده مطنكر الا ويه بابا
يلا عيني سلميلي
_ها ام علاء خير من الصبح شايلة موبايلج
_يا غير حماده خطية واكع ومكسورة ايده
_لا والله وينه هسة
_اكعد اتريك واسولفلك حتى نروح نطمن عليه
ابيت حكيم لان حماده معاند يريد يم ابوه
_وندى شلون بيها ام راس اليابس
_لا تشيل همها رحاب تكول كسرة حماده خلتهم
متقاربين ويسولفون سوى
_الله يصلح حالهم
***
دخلت ندى شايلة علاكة الادوية وعيونها على حكيم الحاضن حماده وصعد بي لغرفته
منطاها كلبها تكسر بخاطر ابنها من توسل بيها
يروح ويه ابوه من شافته يبجي قبلت تجي وتدخل
للبيت الطلعت منه مضروبة حاولت تبعد هاي الافكار
السودة لخاطر عيون حماده بس والله يا حكيم
الا افته لكلبك مكيف لان رجعت عباله انسى
يلا لخاطر ابني
انتبهت لرحاب ..شبيج صافنه ياعيني دروحي
اصعدي لابنج لاتظلين فاهية يحظي
تنهدت بحركة وصعدت بخطوات ثكيلة
كل ركن بهالبيت بي ذكرى خلتها حزينة اكثر
شافت الباب مفتوح متريد تدخل ياربي والله
كلبي ميتحمل حجت بنترة واضحة خلت حكيم
يتغاضى لان يدري بيها جتي وياهم مرغمة
...ليش هنا جبتى خلي بغرفته
_هنا يرتاح اكثر
عافها صافنة ويريد يطلع حاجته ..وين تروح
_اسبح ريحة المستشفى صطرتني
دحك بعيونها وحاولت دير بنظراتها لان جاي يوترها
_ندى دحكي بعيوني
تقرب اكثر وهمس يم اذنها وحرارة انفاسه اربكتها
_نورتي بيتج يكلبي
عافها لان يدري بيها انتهت
وصاح حضريلي ملابسي
رمشت بعيونها وخلت ايدها على كلبها تسمع
دكاتة
_ماما تعاي
انتبهت وجتي عليه بوسته بخدوده ..حبيب ماما
ااحضر ملابس بابا واجي اخليك بحضني
_لا عيب اني كبرت
شمته من شعره وضحكتله..يااا هذا منو الكبران
يمه فدوه للسبع
_ماما وبابا بس تكلولي سبع
حضنته على كيفها حتى لا يتأذى ..سبع يعني اسد
وانته اسدنا
_ماما ابقى هنا حبابة ماما
مكسرت بخاطرة لعبت بشعره خربطته ورجعت
رتبته..خلاص يعمري التريده يصير اهم شي
تكون سعيد
انتبهت لحكيم دخل لاف المنشفة على خصره
والتفت لغير جهة
_اكول حماده منين متعلم هذا الطبع
ابتسملها واخذ ملابسه الداخلية و دشداشة لبسها تدري بي يحب لبس الدشاديش
شمر المنشفة عليها..من شابه اباه فما ظلم
اخذت المنشفة وشرتها عالباب وعاكدة حواجبها
تضوج من هاي حركته الميبطلها ابد يدريها
تتنرفز من يشمرها بالخاولي وهي ممنتبها
ههه ضحكت ويه روحها على حالها مناسية ادق تفصيل بحياتهم وتريد تبعد على اساس البعد ينسي
صدك ثولة
أنت تقرأ
روابط
General Fictionيعلم جيدا ان الحياة لم تنصفه ابدا ولطالما اعتصرته روحا وقلبا ومشاعر قد يبدو للجميع انه اخذ حقه منها بكل مافيه من منصب ونفوذ وقد تبدو حياته مكتملة لكنه يشعر بالخواء لان قلبه ينزف شوقا وحبا ورغبة..💖في الجانب الاخر ابن الجنوب او الجنوبي كما تم اطلاق...
