بقلمي: Jawhara
سلام عليك على رافديك عراق القمم
فأنت مزار وعز ودار لكل الامم...
🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶
*******
دخل للبيت كولش تعبان منايم من البارحة تحقيقات
دك لان لزموا جم ارهابي وكدر يحصل اجازة وقتية سلم على اهله المجتمعين
بالصاله بوسهم لان جم يوم مشايفهم وشمر روحه عالقنفة التخم .
ريمه ركضت للمطبخ جابتله مي بارد تدري بي من
يرجع زهكان والجو حار انوب يعيط بيها.
يزن جان يلعب من شاف ابوه كمز عليه خلاه بحظنه
ويبوس بي ..اوو لك شنو هالريحة الطيبة عضة من خده خفيف ويزن خربان ضحك ومد ايديه
وحظن ابوه بركبته ..فديت اليحب ابوه
شو تعال اكوعد بصفي طلعله موبايله وفتحله
لعبة
الحجي اعترض ..بابا ليش تعلمه عالموبايل
موزين كم مرة كتلك لاتخلي سويتله واهس
ابتسم علاء الابوه اول مره بعد سالفته بزواج
هند لان كضاها عصبي وميتواجد بالبيت
اتصل البارحة عليها لان حيل جان ماخذ على خاطره
بزواجها ومحاجاها بس من رجعوا امه حجتله
عليها شكد فرحت بهديته ولبستها رأسا
كلبه نغصه ومن اتصل وسمع شهكتها باذنه
حيل انقهر ..علاء حيل يحب هند ويتخبل
اذا احد يغثها لو يشوفها مقهورة وصاها تهتم
بروحها واي واحد يغثها تنطي خبر لاتظم عليه
واي شي تحتاجة تتصل يدري بيها فاهية
يربي شلون ادبر روحها بنصهم عالم تصرفاتهم
وحياتهم تختلف يعرفهم زين القضايا الجوة ايده
دائما ثارات ومشاكل وكم قضية وصلته من الناصرية
زلمهم ميتفاهمون دمهم حامي الشيخ سالم يعرفه
رجال خير بس حسان مملتقي بي هواي والتقرير
الوصله عنه خلاه يشفعله شوي لان كله كلام مدح
وتقدير بحقه....لاتستغربون من علاء لان يدور ورى حسان سوا اتصالاته بجماعه يعرفهم وجابوله
تقرير عن العائلة ..بعد هذا طبع علاء هههههه
استخبارات وانتوا تعرفون.
(احترامي وتقديري لاهل الناصرية كلهم نخوة وشهامة ..لكن هذا تفكيره ورأيه الشخصي لعلاء)
شرب المي بالكلاص ورجعه لريمه .
_احضرلك الغدا بينما تسبح .
_روحي صبي كولش جوعان
يزن كعد بصف ابوه وبقى يلعب باللعبة
خلت الصينية كدامه عالطبلة وراحت كعدت
كام غسل ايديه ورجع كعد يتغدا
جان الاكل طيب تشريب دجاج وتمن احمر
يحب هذا الاكل وخاصة اذا ثريد .
_عاشت ايدج يووم.
ابتسمتله امه بحب ..الف عافية ماما هذا طبخ ريومة
رفع راسه لزوجته الجانت صافنه عليه وهز راسه
الحجي ملتهي يسمع اخبار بس اذنه يمهم يدري
بابنه بعده مغثوت.
_ماما علاء اليوم اجازتك لو نازل استراحه
_استراحة بعد يومين اجازتي .
_زين لعد حتى نعزم هندة وزوجها .
مرد عليها خلص غدا وراح غسل ايديه
تلكته ريمه بكوب الجاي خزرها هاي شلابسة.
انخمش كلبها لان تخاف منه دحكت على لبسها
ورفعت راسها..برمودا وعريضة اصلا.
_مو محذرج متلبسين برمودات من تنزلين جوة.
_والنبي نسيت يزن خبلني بس اركض ورا
حتى مصعدت فوك بعدين شكو بيها ياحبيبي.
شرب من الكوب وصفن عليها.
دنكت تدري معبرت عليه سالفتها ..بس هي صدك
مثولة من يزن طول الوكت عينها عليه تدري بعلاء
يخبلها كولشي ولا يزن.
_روحي حظريلي الحمام وطلعيلي بدلتي المرقط
ساعتين وراجع
_هسة حصعد بس اخلي الصينية بالمطبخ.
_بعد لاتنزلين صاعد وراج وغمزلها .
أنت تقرأ
روابط
General Fictionيعلم جيدا ان الحياة لم تنصفه ابدا ولطالما اعتصرته روحا وقلبا ومشاعر قد يبدو للجميع انه اخذ حقه منها بكل مافيه من منصب ونفوذ وقد تبدو حياته مكتملة لكنه يشعر بالخواء لان قلبه ينزف شوقا وحبا ورغبة..💖في الجانب الاخر ابن الجنوب او الجنوبي كما تم اطلاق...
