بقلمي: Jawhara
امر على الديار ديار الهوى
اقبل ذا الجدار وذا الجدارا
وما حب الديار شغف قلبي
ولكن حب من سكن الديارا
******
ندى متحملت كلام تغريد هي تعبانه من الحمل وانوب هاي زودتها بحجيها تنفست بعمق وسيطرت
كوة على نفسها متريد تخرب خطوبة لينا الجانت
ادحك عليها بقلق عبالها راح يتعاركن ..مراح ارد عليج لاني اكبر من ان انزل لمستواج .
تغريد طككت عيونها ومهتمت للنسوان بس تريد
تتعارك ويه ندى تكرها تموت منها لان تزوجت حكيم
لان جانت تريده وميته عليه بس راح تزوج ندى
وكلما تشوفها تحس تريد تبرد نارها من تتعارك ويه
ندى.
باوعتلها بحقد وحجت تريد تقهرها..هه مدري اشاف منج بس تتموعين عشتوا وتحجي بالمستويات
دروحي روحي شلون نمونه والله خطية حكيم من
حقه اذا شكى ويكول متحملها لخاطر ابني.
رحاب وام لينا من شافن لينا تأشر اجن سريع
وسمعن اخر حجي كالته .
سلمى بعصبية كوة كاتمتها تقربت على تغريد وحذرتها ..ترى كلش مو وكتج تردين تسوين عركة
_شدعوه عيني سلمى كاتلة روحج عليها ايييه بخت
شلون حظ عليهن حظ ك.....هي وبنت اخوها مدري
اشافو بيهن
سلمى صدك فقدت عليها زودتها هاي الخبلة..جرتها
من ايدها واخذتها لغرفتها ورسمت ضحكة على وجها
تتلافى الموقف لان انتبهن عليهن زوجة جعفر وامها
وامال بس ميدرون شنو الموضوع.
سدت الباب ودفعتها كعدتها عالجرباية اشرتلها
بديها على راسها دغتها حيل..ولج تخبلتي تردين
تفضحينه والله بس يسمع حكيم وعمي لايكون كتلح
حلال شعليج بيها .
حجت بحقد ..اموت منها هيج بس اريد اخرب عليها
فرحتها .
سلمى بعصبية وكوة منصية صوتها..ولج تخبلتي رسمي وشلون تكلليلها متحملج الخاطر ابنه معزاية
لو يسمع هالحجي بالعباس يسكطج .
ضحكت بأستهزاء ..ههه شدعون خايف على ست
الحسن .
_ولج افهميها عاد الرجال يحب مرته يموت عليها
وانوب حامل منه تريدينه يعلكج بالسكف اذا سمع
غاثتها .
تغريد ضاجت من سمعت هالشي ..كافي ام لينا عوفيني.
سلمى نصحتها ..التفتي لروحج وعوفي الحقد ترى
عمر الحقد ما بنى شي .
عافتها وطلعت راحت كعدت يم ندى لكت رحاب
تهدي بيها ندى صايرة حساسة حيل من ورى الحمل
مبين عليها تعبانه وانوب شاطت من كلام تغريد..
لينا تسولف ويه هند وامال وجتي عبير زوجة جعفر
كولش حبابه جانت امال ناصبه على لينا خلت خدودها تحمر بالزايد .
هند اعترضت ..الله عليج عوفيها هسة تصدك بحجيج .
امال غمزتلهن ..جا اجذب انه سمعته بالصدفة يحجي
لخوانه وهمة ماقصروا ويا يجيبون ويوصونه سوي
هيج ولاتسوي هيج خو ابو العباس ماخله شي ما
حجاه.
اعترضت عبير وهيه خربانه ضحك ..ولج عزززا
والله لاتصدكيها اصلا جعفر ماعنده هيج سوالف
ولا يحجي بيها وغمزتلها بعينها عيني هذا رجلج طالعة
عينه تذكرين من كال اموتها اذا تزوج غيري مااتحمل
تروح بحضن رجال غيري .وكلها تدري بي ملعب يخرب على سوالف النسوان .
ردتلها امال مسويه روحها ضايجة لان كاعدات
يقشمرن بس لينا وهند مصدكات..ولج ماكو ملعب
وهتلي غير امير يمه يمه منه البنات يخربن عليه
عيني حقهن شلون اموري يخبل والله.
لينا ضاجت ..شنو هالحجي والله بعد ماريده طلعت
العائلة كلها سرسرية.
_خرررب منو السرسري خل يسمع اموري بالعباس
يسكطج .هههههههههه ولج لااصدكين جنا انشاقيج
وانتي هنودة شبيج يحظي رأسا صدكتي بعدين هاي
شطالعة تخبلين الشيخ شاف لبسج
_لا من طلعت جنت لابسة العباه اصلا جنت ممتحضرة اجي بس لكيت ماما حبيبتي مشتريته
اليه .
_وليش ما جبتي من ملابسج عندج اشكال وكلهن
حلوات .
_ماادري راح تصير هيج حفلة جبيرة عبالي بس
رياجيل وخفت حسان ميقبل.
أنت تقرأ
روابط
General Fictionيعلم جيدا ان الحياة لم تنصفه ابدا ولطالما اعتصرته روحا وقلبا ومشاعر قد يبدو للجميع انه اخذ حقه منها بكل مافيه من منصب ونفوذ وقد تبدو حياته مكتملة لكنه يشعر بالخواء لان قلبه ينزف شوقا وحبا ورغبة..💖في الجانب الاخر ابن الجنوب او الجنوبي كما تم اطلاق...
