روابط

الفصل الثالث

الفصل الثالث ....
Jawhara
تنووويه..

للذين علقوا ومعترضين على تصرف وكلام بعض شخصيات القصة عن مدينه الناصرية اقول هذا رأيهم الشخصي وانا سبق وكتبت بالتعريف عن القصة حين وصفت الناصرية انها مدينه الرجال
هذا اللقب والوصف بحد ذاته يشهد لهم انهم
اهل نخوة ورجوله وفزعه الكل يشهدلهم والنعم
منهم وثلث تنعام ..فيا حبيباتي الضجتوا من
حوار بسيط في سير الاحداث القصة تتحدث
عن رابطه الصداقه جمعت ابن بغداد الحجي راشد
وابن الناصرية الشيخ سالم العمران صداقتهم واخوتهم شي ثمين وقوي ومن طلب الشيخ
بنت الحجي انطاها وهو فرحان بهذه المصاهرة
القصة تظهر ترابط واحترام للجميع لاداعي لبعض
النرفزة التي لاتقدم ولاتؤخر .
واعتقد الاحداث الباقية بينت معدن الكل وشلون
اتحدوا بكل حب

............بقلمي: Jawhara

احدق في الشمس لكن عيناي لا تدمعان...
وحين اراك احس انهما غابة من مطر..

******

دخلت بيت عمتها والغضب والحركة البكلبها نار
ومشتعلة عافتهم وراها الجو مكهرب علاء الصاير اعصاب وينتر مموافق على كلام ابوهم متحملت وطلعت .....كلبها مليان قهر اوووف والله الدنيا تريد تظلمني ياربي ليش هيج يعني هالاسبوع فرحانة بتخرجي من الكلية واتأمل اتعين وادرس اختصاصي الانكليزي وبابا يصدمني بخبر زواجي
فتحت الباب لان متعودة على بيت عمتها سلمت وكعدت عالميز _هلا ماما شو مكدرة وضايجة
متحملت وغطت وجها بيديها وكامت تشاهك وتبجي
كمزت عمتها وحظنتها ..لج عيني شبيج اسم الله
ماما اهداي واحجيلي
مسحت دموعها..عمة بابا يريد يزوجني لابن صديقه
حجة بالسالفة ويريدني اوافق...اااخ اااخ عمة لو تشوفين علاء شلون صاير نار وتعارك ويه بابا والله
خفت واجيت عليج لعد عمة ندى وين حماده ماله صوت
محمد راح الصبح ابو اخذه وندى ااخ محد راح يجلطني غير عمتج ندى صعدت لغرفتها وقفلت الباب مخبلة والله العظيم مخبلة
_ليش اكو شي
_جان حكيم هنا وشافته تدرين صار ٣ سنوات
مشايفته لزمت كلبي بيدي كلت حتطرد الرجال
بس الحمد لله عدت على خير
_خطية عمة ندى شلون حتفارك حماده
_قابل وين يروح شو يم ابو وكلنا ندري حكيم شكد يحبهم ويريدهم بس شسوي لراس اختي اليابس
بعدين مثل كل مره يومين ثلاث ويرجعه لان حماده متعلق بأمه متشوفين حكيم مانفذ تهديده وهي بوكتها ملخة روحها راح ياخذه راح ياخذه
يدري بأبنه يتلوع بالفراك الله يهديهم ويبرد كلبها
ويهديها على حكيم .
كامت هند ..اروح اشوفهااكيد كاعده تبجي .
لزمت ايدها وكعدتها..اكعدي انتي خلينه نشوف سالفتج عوفيها لندى خل تراجع نفسها الرجال
ذل روحه هو واخته وهي مطنكرة والله ابو محمد وردة رجال معدل وهيبة وزين منه صابر عليها
وما طكها بمرة .
شهكت هند وخلت ايدها على حلكها..عزززا عفية
عمه لاتحجين هيج والله عمه ندى تتخبل.
_ولج مو موتتني شكد اقنع وماكو عبالك احجي
ويالحايط .....هسة دعوفينهمن سالفة ندى وانتبهي
على كلامي حبيبتي لاتخافين تدرين بابا شكد يحبج وما اعتقد يجبرج على شي متردينه
_عمه لو شايفته شلون بحجي عبالك كولشي
مكملين بس باقي يزفوني
_يمه فدوه يوم عيد واشوفج بالبدلة البيضة ..حجت رحاب ومدت ايدها وكرصت خد
هند
_عمممه والنبي اضوج لاتحجين هيج اريد اتونس
لاحكه عالزواج
_عيني مصيرج تزوجين جان هسة عندج طفل
طفلين اشو من جنتي بالاعدادية وانتي سوك ماشي
هههههه
خجلت هند ...ترى اروح البيتنه والله كلما وذكرتيلي
هاي السوالف
_ههههه عابت هالحلك
يلا عوفج هسة زين معرفتي منو العريس؟
جاوبت عمتها والخوف واضح بوجها...محامي
من الجنوب وانوب يعيش بقرية تابعة للناصرية
..حضنتها تخفف عنا شويه لان شافتها مقهورة حيل
وحجت والله ماصدك راشد هيج يتصرف
ويزوجج لواحد منعرفه وانوب بعيد ناس منعرفهم ولا نعرف عاداتهم وطبايعهم
طفرت دموع هند وبقت تشهك وتتوسل..فدوه عمة
فدوه لعمرج روحي حاجي واثري عليه
بقت عمتها تمسد على راسها بحنية وطمنتها بس
بداخلها كلبها ناغزها معقولة راشد هيج يسوي بنته الوحيدة وعزيزة كلبه اكيد اكو سبب يخلي يزوجها
هي تدري بعلاقاته واصدقائه باغلب المحافظات
وكلهم يحبونه ويحترمونه لكن هذا ميخلي ينطيها
لابن الجنوب الميعرفون شنو طبعه
ااخ ياراشد مفكرت شلون راح تتعود على عاداتهم وتقاليدهم ياربي البنية كلها نعومة ونزاكة وعايشة بدلال شلون راح تعيش وياهم
كامت وكلبها يوجعها على حال هند ..ماما ابقي هنا
حشوف ابوج واحجي ويا
كمزت وياها ..لا عمة اجي وياج ماريد ابقى
يجوز بابا يحن كلبه علية

فعلا البيت شاب نار وعلاء شوي وينفجر يطب
لغرفة يدخل لغرفة معصب وام علاء ساكته
مبين الهم والحزن بوجها تدري بيها تخاف من راشد
صاحت علاء..تعال عمه صدوك الحجي السمعته
شلون براشد البنية توها تخرجت وفرحانه
دخل راشد الجان مسيطر ..قررت وانتهى والكل
يحترم قراري
صاح علاء بشراسة وعيونه تجدح..والله على جثتي
تزوجها لهندة
رد ابو بحزم وطبعا هذا طبعه عسكري قديم
..لاتتدخل ولاتحاول تقلل من احترامي اني سويت الشفته بمصلحتها
عافهم وطلع وخلا الوجوه مراه مكلبة
تقرب علاء من اخته وزمخ بيها..ولج والله اموتج
اذا وافقتي

زكحت امه ..كااافي لخاطر الله مشوفها شلون صارت والله راح تتخربط علينه
صفنت هند على عمتها بعد ما طلع علاء شافتها شلون ضايجة لان مكدرت تسويلها حل
عافتهم وصعدت لغرفتها وقفلت الباب عليها
وشمرت روحها على فراشها وبجت بح ركة وقهر

علاء كولش مضايق ومقهور من شاف هند شلون عيونها الحلوة مورمة من البجي ووجها مصوفر
ياربي والله ماريد اختي تروح بهيج زواجه
علاء كولش يحب اخته ويخاف عليها بس تلمشكلة بعناد ابو ميريد يقلل من احترامه حيل يحبه ويحترمه وميريده يزعل عليه بس هندة شلون شنو ذنبها ميدري شنو هالاصرار على هالزواجه يعني غريب لا شايفي ولا يعرفوا وانوب عايش بالجنوب
يعني حتكون بعيدة عليهم ...اااااخ والله اتمنالها تزوج رجال معروف ومحترم بس شلون بابويه
شلون اوكف بوجه واني المايوم قللت احترامي
ويا وشلون بهندة شلون اعوفها تروح لهذا الجنوبي
المااعرف عنه شي بس مجرد ابن صديق الوالد.