انين الرووح
البارت .....١
.
الله اليوم اول يوم دوام الي بكليه الفنون الجميله
شكد حلو الجو صافي وهادئ نسمع بس صوت العصافير وصوت فيروز الجميل
اليوم راح اسجله في مكتبه ذكرياتي
راح ابدي ارسم ولون وشخبط ع الجدران
ع الابواب بالاوراق
راح احقق حلمي راح املي العالم بألواني الجميله
بمزهريه الورود المحتفظه بيها في مكتبه افكاري
صح نسيت اعرفكم ع حالي
اني جوري اول مرحله في كليه الفنون الجميله
اعشق الرسم والالوان من المس الفرشه اسرح في خيالي ابعالمي الوردي
بعيد عن الهوسه وعن الصراخ والحرب والدمار
راح تسألون ليش دمار
لان العراق بلد من فتحنه عينه عالدنيا وهو في حرب
كل ما انكول اي خلصنه نبدي بحرب جديده اقوه من الفاتت
شهداء بالملايين اتروح ونساء اترملت واطفال اتشردت ومهات اتبهذلت هذا كله ابسبب الحروب
الله ينتقم من صنع السلاح ودمر العالم بي
راح ارسم كل شي جديد يبعث الامل والحب للناس
ارسم الضحكه بشوارعنه القديمه والازقه الضيقه
منفذي ومتنفسي الوحيد الجميل شارع المتنبي بيتي وسعادتي وراحتي في المتنبي
شارع عريق بالكتب والتحف وادوات الرسم والقرطاسيه
ياربي اتمنى ابقه اهناك للابد
مع اول دخولي للكليه قررت بيني وبين نفسي اكون انسانه طموحه مثقفه واعيه ابتعد عن المشاغبين ما اخلي مشاعري تنجرف وره احلام سوده او وعود كاذبه
اني هدفي الوحيد وصولي بالرسم للعالميه اوصل رساله من العراق الى كل دول العالم
اوصل حقيقه هذا الشعب الجميل
اشلون عايش وشلون يضحي الخاطر ديمومه الحياه
شكد ما احجي عن العراق ما اكدر اوفي ابحقه
بلد ارووووع من الرائع بناسه واهله
اطفال نسائه شيوخه شبابه
راح اوصل اجمل صوره للعالم عن العراق بطريقه رسمي
ومراح اسمح النفسي تفكر بأشياء ثانيه
صح ...مكتلكم اني احب الموسيقي الشعر الكتابه مع حبي للرسم اكيد
رغم اني منفتحه ومثقفه ومدلله لكن خجوله بشكل ما ينوصف
كلشي اريد اسوي بحياتي لازم ادرسه اكثر من مره يله اطبقه
حتى ما اغلط بحياتي وتندم بعدين
لان الندم مدمر مهلك للاعصاب
اني مو مجامله وصريحه جدا وما اخاف احجي الحق لو ع كص ركبتي
مو اجتماعيه احب القله بالاصدقاء يمكن لو صديق او صديقين ماحب الكثره
يله كافي حجي عني خلي اخذكم سفره ويايه في الكليه ونشوف شنو ماشنو بيها
فتت ابرجلي اليمنه ههههههه مثل ما تعرفون يكلك تفائل
امامي حديقه خياليه زرع اخضر ورد بكل الالوان تماثيل بالون الابيض والبرونز
في كل مكان رسومات ع الجدران شي اكثر من روعه
مشيت ابين هذني كلهن
وصلت امام جداريه كليه الفنون الجميله جداريه اجنن
