انين الرووح
البارت ....١٤
كاعدين ننتظر اخويه وبده السجناء يطلعون ع اهاليتهم
بين ميه سجين سحيت وشفت يحيى
فز كلبي من مكانه ماعرف خوف ع توتر ع ارتباك
ماعرف رده فعله اشلون اتكون من يشوفني اني وثائر كاعدين ننتظره
لازمه كلبي وادعي ميصير شي وتطلع ابوجهي ويظل ثائر ياكل كلبي ع اخوج حجه اخوج فعل
اتقرب علينه اكثر واكثر
الرجفه الصرت بيها متنوصف ابد
احدى كل وحده اتكول اني ارجفت
عبالك سعفه ابمهب الريح
ياخوي دورلي عذر صدكني معذور
اخاف اقربلك اني وبتلي بيك
طول اليوم شاغل بالي وياك
اخطط من اشوفك ابيش احاجيك
وذا اوكف اكبالك انسه حروفي ويلف الخجل وجهي لمن الاكيك
مشتاكه الك ياخوي اشوكت الي بيه يصير يعنيك
نهر انت وشحيح ملكاك .... شنو نفع النهر من ما يرويك
وشنو نفعك يخوي وانا بيدك محتاج
وعليه بالعطايه تبخل ادريك
ياما جنت اتوسلك يخوي ابليل
اذبلت بيدك وصارلي الصار
ولا مره عليه انمدآ بالحنيه اديك
نزلت ادموعي من غير ما احس
جن جبل وكع ع متني وثكلت اهموم الدنيا وتحوطت بس بيه
ليش ياخوي هيج سويت شنو الجان ناقصك وبيدك تهد حياتك
اجه كعد يمنه بوس امي وابويه
امي ليش هيج سويت ابحالك
ليش اعدمت شبابك شستفاديت هسه من فعلتك هاي
يمه عفيه مو وكت اعتاب البيه كافيني تره روحي طافره هم ضيم وهم هضم ولعبان نفس
ماريد اسمع كلام يأذيني
هاي شعدها جاي اهنا وياكم بعديش جايه
يمه انسه بعد الصار صار
شنسه يمه ليش مو هي ابسببها اني اهنا .
بابا ..لا مو ابسببها ابسبب اعمالك الوصخه والقذره
رجال شكدك شطولك شهادتك بكدك ومحل ابوك يسد عين الشمس شنو عايزك جان حتى تتعاطه وتكبسل وتمول
ليش اني ابشنو قصرت وياك ما وكلتك ما لبستك ما علمتك وخليتك تحصل شهاده
مو عينتك بدائره حكوميه
وتشتغل ويايه بعد شتريد اكثر من هذا كله غيرك شباب يتمنون بس يحصلون ع فرصه عمل
وانت عندك عملين ومكفاك شكد لعد طماع طلعت
ليش هيج سويت شنو هسه حصلت
وشراح تستفاد
.بس العتب مو عليكم العتب عليه اني المعرفت اربيكم لا انت ولا اختك الخاينه
لازم انزع كلبي ودوسه بالقندره ع هيج خلفه خلفت متبري منكم يسوع متبري منكم المسيح
بابا اتعصب حيل عافنه وكام طلع بره بقينه بس اني وماما
لان ثائر من الاول ما قبل يدخل ويشوف يحيى ظل بره واكف
ظل يحجي مع ماما وما يباوعلي ابد
يحيى ... من تجين مره ثانيه لجيبين هاي وياج
.وشويه والحارس صاح انتهى الوكت والكل بده يطلع
ماما انطتله ملابس جديده ومسويتله شويه اكل وجكاير وخلينه وطلعنه
بابا وثائر بالسيارات ثائر اقترح ع بابا انروح نتغده ابمطعم
بس جان والدي تعبان وكله
لا
اريد ارجع للبيت حاس نفسي تعبان
