انا وانت نعمل الذنب .. بس مش نحلله ، انا وانت نغلط بس منقولش علي الغلط دا عادي ، انا وانت نعمل المعصيه بس منجهرش بيها ، اذنبت يبقي توب وحاول تثبت علي الطريق وربنا يغفرلي ويغفرلك بس منقولش علي الحرام حلال
عاوز تغني وتعمل حفلات غني هي صحيفتك إملائها بما شئت بس متقولش ان الأغاني حلال والموسيقي حلال والمعازف حلال !
متجهرش بعدم صلاتك وتعمل كوميك وتقول لما ببقي مش مصلي كل الفروض بكون كده ولما بصلي كل الفروض بكون كده ... طبعا مش محتاج اقولك ان من ترك 3 فُروض علماء الدين قالوا عليه كافر! والنبي قال يُحرق
متحطش موسيقي علي فيديو فيه حد بيتكلم عن الدين وتقول عشان يأثر اكتر في اللي هيسمعه ... متحاولش تحلل الحرام وتتذاكي علي ربنا ... انا وانت عارفين قصه أصحاب السبت كويس ..اتفترون علي الله !!!
متكسرش قلب حد وتقول معلش انا دبش .. وَيْلٌ لِّكُلِّ هُمَزَةٍ لُّمَزَةٍ
متقلعيش خِمارك او نقابك عشان الناس شايفينك وحشه فيه وتقولي ما عادي ابقي بشعري وربك رب قلوب ، انتِ بتعبدي الناس ونظرتها ليكِ ولا بتعبدي ربنا ! مين اللي لابستي ليه الحجاب الشرعي ! ربنا ولا مدح الناس!
( وَلاَ تَقُولُواْ لِمَا تَصِفُ أَلْسِنَتُكُمُ الْكَذِبَ هَذَا حَلاَلٌ وَهَذَا حَرَامٌ لِّتَفْتَرُواْ عَلَى اللّهِ الْكَذِبَ إِنَّ الَّذِينَ يَفْتَرُونَ عَلَى اللّهِ الْكَذِبَ لاَ يُفْلِحُونَ )
(قُلْ أَرَأَيْتُمْ مَا أَنْزَلَ اللَّهُ لَكُمْ مِنْ رِزْقٍ فَجَعَلْتُمْ مِنْهُ حَرَاماً وَحَلالاً قُلْ آللَّهُ أَذِنَ لَكُمْ أَمْ عَلَى اللَّهِ تَفْتَرُونَ )
اخيرًا .. انت قدوتك مش شيخ او داعيه او بتاع تنميه بشريه قدوتك مش واحد بيعمل ذنب زيه زيك .. ولما يذنب انت بقي تقول ما فلان قال حلال ، هو المفروض اللي يقول الحلال والحرام فلان ولا ربنا !
قدوتك هو النبي اللي ضحي بحياته كلها عشانك ، اللي يوم القيامه هو الوحيد اللي هيقول امتي امتي .. اللي لما ربنا قاله اعمل اي في امتك اللي بتعصيك يامحمد اهلكهم ! اغرقهم ! رد وقال ..لا لعل الله يخرج من أصلابهم من يعبد الله لا يشرك به شيئا.
قدوتك هو الرسول ، كلنا بلا إستثناء بنتجمل قدام بعض ومستورين من ربنا ، كلنا بلا إستثناء بنعمل ذنوب .. هي روح تتذبذب بين طاعة ومعصيه وبين الجنه والنار .. ودي الفطره اللي ربنا خلقها فينا ك بشر
بس بالله عليك يوم ما تغلط وتعمل الذنب متحللوش وتقول حلال .. اصل الحلال بينّ والحرام بينّ وشئت أم أبيت أنت قدوة لفئه من الناس تكسب من ورائهم الأجر ، او تحمل أثقالهم مع أثقالك ..
بلاش تبقي من اللي هينطبق عليهم الآيه دي
وَلَيَحْمِلُنَّ أَثْقَالَهُمْ وَأَثْقَالًا مَّعَ أَثْقَالِهِمْ ۖ وَلَيُسْأَلُنَّ يَوْمَ الْقِيَامَةِ عَمَّا كَانُوا يَفْتَرُونَ
واخيرًا
الحلال بيّن والحرام بيّن ..وبينا القرآن والأحاديث 💙"!
#إسراء_عاطف
أنت تقرأ
همسات لقلبك ٤
Spiritualهمسات للقلوب -وتذكير بان الله بجانبك ولن يتركك..! تصميم الغلاف من تصميم المبدعه nnn_mmm
