_ عنفوان أمرأة _
( بقلم بسمة البياتي)
_البارت الآول _
السيدية...
متمدده كبال التلفزيون ناثرة الكفشة على المخدة مخلية ايدي جوة رأسي ولاوية رجل على رجل هاي نومتي المفضلة
خلص القرآن بدت فقرات قناة الشباب اول شي يطلعون ( كي لا ننسى) لقطات من حرب العراق وآيران
بعدها يطلع افلام كارتون ومن يخلص يبدي فلم عربي اني من عشاق الأفلام اندمج ويا الفلم لو تصير معارك يمي ما اتحرك من مكاني
دخلت ماما للهول بيدها صينية بيها استكاين لجاي
.. بعد بعد طبي بالتلفزيون اني ادري فديوم تنعمين من ورا
.. سمعتها وغلست
انجمعوا بالهول يشربون جاي صارت هوسة الكل يحجون بنفس الوقت اريد افهم شي من الفلم ما أكدر اذن يمهم والأذن الثانية يم التلفزيون
بيبي بنزعاج نصي صوت التلفزيون سطرتينا شنو معرسة
.. لا هذا عرسج انتي وجدي داتفرج عليه
جدي...من اكوم انعل والديج هم احد يلومني
بابا.. دانية كم مرة كايلج عيب تحجين هيجي ويا جدج وبيبيتج
بيبي.. هو هذا الكدرت عليه محد فسد اخلاقها غيرك
... يوم على كيفج وياها شبيها اخلاقها ترى بعدها طفلة كل البعمرها هيجي لسانهم
.. لاوالله بس بنتك اخلاقها سكط دشوف بنات عمها اشكد مؤدبات حتى صوتهن محد يسمعة
.. كل هذا واني بعدني على نفس نومتي ولا أزحزحت لان متعودة على هذا كلامهم
طلعت لقطة بالفلم البطل ديبوس البطلة
بيبي.. ياااا يااا شوف الوكحة ولاتنزل عينها ولج دوري راسج غمضي صخمي شلون عيون صلفة ولاتستحي من غضب الله على رأسج
.. حليمة خليج بحالج معليج بيه قابل اني كلت للبطل بوسها اذا هما ميستحون لويش اني استحي وادور راسي
بابا وعمامي يضحكون
وماما وبيبي شبعني رزايل طكت روحي كمت بغضب
حتى الفلم ما اريدة عايفتلكم الهول وطالعة شلون عيشة
طلعت واني ادردم ومتعصبة وكفت يم باب المطبخ اجت بتول بنت عمي
.. دانية تعالي نلعب ختيلان احنا نختل و مؤمل يدور علينا
... رحت العب وياهم مؤمل غمض واحنا كل واحد راح المكان يختل بي
اني مكاني السري ورا البيت يم تانكي النفط
ركضت ختلت اجت ديما يمي رادت تختل وياي
كتلها روحي الغير مكان اذا ختلنا اثنينا راح يلكينا
ديما راحت تركض ختلت ورا الشجرة
طلعت رأسي من ورا التانكي شفت مؤمل يم الشجرة لكى ديما
