_ عنفوان أمرأة _
( بقلم بسمة البياتي)
_البارت الثالث _
باجر اربعينية بابا عماتي وبعض من اقاربنة من اليوم اجوي يمنا لأن من الفجر نطلع للنجف حتى نرجع قبل الغدا لان مسوين ثواب على روحة
مرة عمو حاتم وخالتي ام احمد راح يبقون بالبيت علمود الطبخ
صارت ساعة 11 باليل طلعت للحديقة عندنا مرجوحة صغيرة جوة شجرة النارنج هذا مكاني من اختنك اطلع اكعد اهناك
كعدت مكرفصة ومخلية راسي بين رجلي
صارت حركة يمي رفعت راسي مهند واكف كدامي
اجة كعد بصفي
.. ولج والله باردة وانتي معندج مناعة بسرعة تتمرضين يومية باليل الكيج اهنا
... وانت شكو تراقبني اذا بردان طب جوة معليك بيه
... عوبة داحجي علمودج باجر وراج طريق مو وقتها اذا تتمرضين
... مخنوكة كولشي بالبيت يخنكني كل ركن بي يذكرني ابابا
... اووووف الله يرحمه دانية هاي حال الدنيا كلنا على هذا الطريق حاولي تتعودين الله انطانة نعمة النسيان صح بالبداية نتعذب بس بعدين شوية شوية ننسى ونتعود
... لا ابد مستحيل اكدر انسى لك بعدني لهسه اسمع صوتة يصيحني وافز مثل المخبلة ادور عليه
مهند قلبي مفركس ما اعرف شلون بعدني عايشة لهسه
... بالعباس گلبي يوجعني عليج وأشبع قهر من أشوفج هيجي اريد دانية القديمة ترجع بشقاها وضحكها و وكاحتها
... مستحيل ارجع مثل قبل كولشي حلوة بهاي الدنيا مات ويا بابا
.. اجتي عمتي الوسطانية زهراء كعدت يمنا شافتني ابجي اخذتني الحضنها وبجت وياي
... يلا حبيبتي تعالي انطب جوة حتى تنامين ورانا كعدة من الفجر
.. هزيت راسي بالموافقة كمت وياها
دخلت لفراشي اكذب اذا كتلكم كدرت انام شايلة هم شلون راح اكدر اشوفة وهو جوة التراب
الفجر الكل كعدوا يتحظرون كمت غسلت اني لابسة دشداشة سودة لبست فوكاها صاية هم سودة وحجاب
اني مومحجبة بس من أروح زيارة البسة اخذت العباية ولو ما اعرف البسها بس خليتها يمي
صعدنا بالسيارات وطلعنا كلما نقترب من النجف دكات قلبي اتزيد ساعة ستة الصبح وصلنا
دخلنا الوادي السلام مكان الغوالي والأحباب
وكفت السيارة ونزلوا اجتي عمتي لزمت ايدي نزلتني
من بعيد شفت قبر حبيبي ونور عيوني بيبي وماما وعماتي شمروا روحهم على قبره حضنوا ويبجون اني واكفة بعيد معندي جراءة اقترب
عمو حاتم عيونة حمر اجة طبطب على كتفي كالي شنو متريدين تكعدين يمه وتحجين ويا
من كال هيج شهكت بقهر ركضت شمرت روحي على قبره ابوس بترابة
