أرهنت عمري ||نورا ناصر||

1

#أرهنت_عمري
نورا ناصر
بارت ١

كنت أسمع أطراف الحديث عن الحب
كان يقتلني الفضول
كيف يكون الشعور!
حتى التقيتك
رأيت فيك هذا المجهول..
أرهنت عمري أن أحبك ..
فما حصدت الا الخذول..
فقدت شهية الاحلام..
واستعمرني الذبول..
فأمسيت ضحيةً لرجلٌ مغرور.. منتقم .. ناقم ..مغدور
أراد اخماد جمرات انتقامهِ فلم يجد سوايَ في طريقهِ، حتى تهاويتُ قطعةٌ قطعة ..

جيت من المدرسة ، بدلت هدومي ورحت ركض للمطبخ حاسة بجوع شديد ، دخلت لگيت امي ومرة ابوي ومرة اخوي ومرة ابن عمي مشغولات ، منهمكات وجاي يشتغلن ، تلكتني امي بيدها الجفجير حضنتني ...
_ هلا بنيتي شلونج جاوبتي اليوم بالامتحان؟
_ اي يمه جاوبت ..
_عفية حبيبة ..
_ يمه جوعانة ماصار الغده؟
_ اي صار بس يجي ابوج والولد نصب روحي هسه المطبخ حار ..
هزيت راسي موافقة وطلعت من المطبخ متوجهة لغرفتي ، صارت كدامي سميحة مرة عياش ابن عمي وهيه بنفس الوكت تصير بت خالي اخو امي..

احنا بيت واحد وجبير كلنا كاعدين سوا ..
جرتني سميحة وحجت بلهفة ..
_ اي جيتي والله جابج تعاي كعدي يم مهند خاف يبجي اريد اروح اسبح .
بدون مااحجي وجهتني لغرفتها وطببتني وراحت ...

دخلت شفته يحوس ع الجرباية مالتهم ، مكمط ع النص ومطلع ايديه ، ومخلي وحدة بحلكه ويمص بيها ..

اخذته من على الجرباية لحضني ، اضوج ادخل لغرفتها
خاف يجي عياش فجأة اخاف منه عصبي كلش وكله عركة هيه ويا يخوف من يكتلها مايرحم ..

اخذت الطفل واريد اطلع بي وعيني ع الباب وخايفة باي وكت يطب عياش ، كبل لا اوصل للباب انفتحت ودخل وتحقق الهاجس الي جنت خايفة منه ..

دخل باوعلي ببرود تقرب مني وحجى وهو يباوع لأبنه
_ وين امه ؟ ويأشر ع الطفل واخذه مني ..

بقيت رافعة راسي اباوع اله بوس الولد على خدوده وظل يضحكله ..
كتله؛ ر ر راحت تسبح وخلته يمي
واريد اطلع باستعجال ..
صاح عليه بصوت فززني خليت ايدي على گلبي ..
كال ؛ تعاي اخذي مو جان عندج انه جاي تعبان هسه لاتخلينه يمي..

تگربت منه واخذته وانا ارجف ، وطلعت برة بسرعة اجاني صوته وراي يحجي بعصبية ..
_ على كيفج لايطيح من ايدج الولد ليش مستعجلة من راكض وراج ؟

ماجاوبته ولادرت عليه وبطيت بمشيتي وحاجيته بگلبي راكض وراي جلب بعد منو؟ غير انتَ تخوف واريد اشرد منك ...
اخذت الطفل لغرفتي وخليته على جربايتي وظليت العبه ..

بعدهه ماصارت ربع ساعة من جية عياش وجان تكب العيطة والصياح وصوتهم عالي طالع من غرفتهم..

عياش؛- انتِ شون وياج مصرة اله تنكتلين جلدج يحكج يعني ، مو جاي تعبان بدل ماتريحيني بحجاية حلوة تنكدين عليه ؟

جاوبته سميحة ؛- مليت منك مليت اكو رجال يعزل فراشه عن مرته انتَ بهاي سوايتك شنو الي تريد توصل اله؟