أرهنت عمري ||نورا ناصر||

4 ،5

٤و٥

ارهنت عمري
بارت ٤
نورا ناصر ..

الاعجاب هو التوأم الوسيم للحب .. ( احلام مستغانمي)

ابوي كام على حيله وكلش معصب لف عبايته الرجالية وعدل غترته عاكد حواجبه ومصوب نظراته باتجاه امي الي دنكت راسها مرعوبة منه وخجلانة من كلامها ومصدومة شلون تجرأت ووكفت بوجهه هيج.

تكلم بنرفزة ؛- انه كلت كلمتي بديوان وماتكسرها مرة ومو انت الي تتشرطين عليه ..

وعياش ابن اخوي واخوي ميت ومايتعوض وانت مرة وتتعوضين وهذا البيت الكاعدين بي مو ملكج حتى بكيفج تطردينه..

لا هذا ملك ابوي الله يرحمه وانت تعرفين اخواني خذوا حصصهم بس ويلاد المرحوم ابو عياش ظلوا وياي وكدام عين امي لين كلبها مكسور بموتة ابوهم وبقوا بالبيت..

وراح يبقون ويمته مايعجبهم يطلعون
مو انت الي تطلعينهم بشروطج ، وهاي كدام ابوج الرجال الخير انه ارفض شروطج واكلج كعدي هنا ابركلج وورقة طلاكج توصلج لعندج .

صباح بخوف ؛- بس اسمعني ابو حاتم ..

الشيخ عزام بحزم ؛- العندي كلته ويلله بويه حاتم جيب اختك وتعال وراي .

بقيت حاضنة امي وابجي وحاتم يجر بيه
صاح عليه بعصبية كوة كاتمها يله خيتي يله امشي وياي ..
باوعت لامي وعيوني كلها دموع ، اباوعلها بأسى وبقهر ورفض ..

مشيت وحاتم لازمني من عكسي ويمشي بيه وانه امسح بدموعي وصوت نشغاتي مسموعة ..

وصلنه للبيت ونزلنه ..
تبعت ابوي للديوانية ورحت يمه كلي اصرار اغير من وضعي صار الي ايام حالتي حالة بعد ماسمعت ابوي مكعدني لعياش ..

بنبرة كلها ارتباك وتلعثم كتله؛- بببوية انه ما اريد عياش عفية لاتزوجني اله .
وختمت كلامي بالبجي .

كال تعاي يمي واشرلي بصفة على الكاع ..
رحت كوة امشي واعصر بصابيعي ..
كعدت بصفه ، خله ايده على راسي وسحبني اله وباسني على راسي .

وتكلم بنبرة حنية ؛- ليش بويه عياش ونعم منه وانه لو ما اعرفه ما اخليج بركبته
حجيت ببراءة ؛- بس بويه هو مجرم وبس يكتل جنه تاز المشاكس .

_ من يشوفج هادئه وحبابه راح يتطبع بطبعج يبعد ابوج وعياش رغم مسودن بس داخله نضيف انه ربيته صح مو ذيج التربيه لان بي رس مال خبال من خواله..

بس يضل الزلمه مثل الطفل يتقشمر بكلمه الحلوه واكو مثل يكول ابنج علئ ما ربيتي و رجلج علئ ما علمتي ..

وانه من انطيتج العياش ردت ابين الخوالج بين تربيتي وتربيتهم الرجال يتقشمر بالكلمه الحلوه وانتي بنت ابوج اكيد ترفعين راسي .

ظليت بس اهز براسي بقبول وساكتة ودموعي تجمهرت بعيوني ..
ظل يلعب بشعري ويباوعلي مبتسم ..
كال ؛- اي هاي بنيتي الي انه ربيتها .
دنكت وتجمهرت الدموع بعيوني ، ترخصت منه ومشيت ..