زوجة ظابط مهم #الفصل_الأول#الفصل_الأول

#الفصل_الثاني

" كان يوم أسود .. أسود ومطلعتلوش شمس يا خالد يوم ما عرفتك على ريتال .. يا ابني اعتقني بقا أووف"
صرخت بها تالين بغضب في وجه خالد وهما يجلسان سويا في أحد النوادي العريقه ولديها كل الحق في ذلك فمنذ،ليلة أمس وهو يعاملها كمتهمه ويستجوبها ويلح على كل تفصيلة دقيقه تخص تلك الريتال التي تعثر بها حظا أو صدفه وربما أراد قدرها أن يرحمها قليلا!
أجابها خالد وهو يضيق عينيه بمكر :
_ تصدقي أنا غلطان إني معملتكيش استدعاء رسمي في القسم وعلى إيد مخبر جرجرك من قفاكي زي حرامي الغسيل وساعتها كنتِ حتعترفي على طول ومن أول قفا.
جحظت عينا تالين باغتياظ :
_قفا! هي حصلت إنت صدقت نفسك ولا إيه يا حظابط والله أقول لأبوك .
أخذ خالد يضرب كفا بكف ضاحكا وهو يجيبها :
_حظابط ! وكمان أبوك .. يجي جوزيف اللي بيقولي اني بيئه يشوف ملافظ بنت عمتي .
_تعرف بقا .. أنا ماشيه مش كفايه طول الليل ماسك وداني ريتال ريتال ريتال وكمان راحت عليا محاضرة القانون بسببك منه له منه له !
قالتها تالين مصطنعة الحسرة بينما أجابها
خالد بابتسامه رجاء :
_ كده برضه يا توته يعني وأنا ليا مين غيرك في الغربه آخر سؤال بجد بقا بعدها حطلق سراحك اتفقنا ؟
حركت تالين رأسها دليلا بالموافقه فاقترب منها خالد وهو يضيق عينيه ويخفض من صوته وكأنه قناص ماهر سيصطاد ذبابه حطت فوق رأسها :
_ هي ريتال دخلت في أي علاقه مع أي شاب قبل كده؟؟ انا عارف انك في حقوق وهي في تجارة بس اكيد طالما صحاب بتحكيلك وكده ..
حينها فعلت تالين مثلما فعل هو وهي تكتم ضحكاتها :
_ لا يا معلمي مدخلتش ولا حتدخل اصلها معقده يا ريس اي خدمه تانيه يا كبير ..
ضم خالد حاجبيه استنكارا من طريقتها :
_ ومالك بتتكلمي كده زي تجار الحشيش ما تقوليلي بالمرة كلمة السر البلح طرح !
_ والله انا برضه ولا انت اللي عمال تضيقلي في عنيك وتوطيلي في صوتك وعاملي فيها محسن ممتاز في رأفت الهجان يا عم بقا بلاش هبل
قالت جملتها وهي تترك مقعدها عازمه على الذهاب وفشلت كل محاولاته في إيقافيها :
_أتالييين تعالي أبت !
وحينها أخرجت من حقيبتها علبه صغيرة وقامت بقذفه بها في غضب ومن ثم ذهبت !

وفي مكان آخر ،،،،

جذبها من ذراعها بشده وهو يدخلها إلى داخل ساحة الجامعة بعنف ، حررت ذراعها من قبضته وهي تزجره بنظره متقده :
_ سيب إيدي يا بني ادم إنت .. إنت اتجننت خلاص ولا نسيت نفسك ولا يمكن البلاغ اللي عملتهولك المرة اللي فاتت محوقش فيك .
أجابها بابتسامة سمجه :
- بلاغ مين يا أموره ، شوفي يا ريتال قسما بالله ان ما اتعدلتي لأعدلك انا ابن عمك ده اولا ثانيا انتِ عارفه كويس انا شغال ايه وممكن اعمل ايه في البلاغ وفي اللي متقدمله البلاغ كمان ثالثا وده الأهم انتِ خطيبتي وحتجوزك قريب بمزاجك أو غصب عنك انتِ فاهمه ..
حركت ريتال رأسها باستهانه وسخريه :
_ نجوم السما أقربلك مني يا عصام وبالنسبه لشغلك فطبعا عارفه انت شغال إيه ، شغال فتان ع الطلبه والطالبات وعمال تزرع في جواسيس هنا وهناك عليهم عشان تلفقلهم تهم ويسحبوهم من بيوتهم نص الليل هما واهاليهم على المعتقلات حقيقي مفيش أقذر من كده !