للناس اللي خاشة علي امتحانات البوست كتبته ليكم💙
كلنا نعرفوا الضغوطات اللي تمروا بيها، و نعرفوا كمية الاحباط اللي تجيكم من الناس و من حال البلاد من ضي و الى ذلك..
بس لو تجوا معاي و تتخيلوا هديك اللحظة اللي وقت بتطلع النتيجة و يكون اسمك من ضمن الناجحين و تحس بفخر بروحك و تقول لنفسك أني تعبت و ربي عطاني ع قد تعبي، أني سهرت و ربي فرحلي هالعيون بعد سهرهم، أني يأست بس قويت روحي و دعيته ربي و استجابلي
صدقوني هاللحظة هادي حلوة؛
اللحظة هادي بتشوف دموع أمك و بوك وقداش ما هما فخورين بيك و بتعبك و بنجاحك،
محلاها لما يسألوهم الناس ها شن صار نجحت بنتك؟ نجح ولدك؟
و هما راسهم مرفوع ح يقولوا اي، اي ما يخيبوش الظن فيهم و ثابروا، اي حطينا فيهم ثقتنا و كانوا قدها، اي وقت ما محتاجين الفرحة فرحونا، اي بعد تعبنا و شيبنا ريحونا.
يا محلاه الشعور اي و الله
اسمعوا مني هالكلام نبيكم تركزوا في كل حرف:
في الدنيا هادي مافيش انسان "فاشل"
بس في انسان متشائم و خسر مرة و قال خلاص أني مش قدها و ما حاولش
الفشل يا أصدقائي هو بداية النجاح، بس أمتى يكون بداية نجاح؟ لما حني نتجنبوا كلام الناس و كل اللي نهتموا بيه هو حياتنا و كيف بتكون في المستقبل،
لازم تنوضوا من القاع اللي انتوا فيه لازم!!
لازم توروا للناس انكم مش فاشلين، اكسروهم بنجاحكم، ثابروا، أتعبوا، أسهروا، ادعوا ربي، استغفروا، ابكوله
بس لما بتقعد بالشكل اللي انت عليه ح تسبب ضرر كبير لذاتك و لأهلك؛
ما فكرتوش كيف بيكون شعورهم؟ ما فكرتوش كيف بيواجهوا كلام الناس و نظراتهم؟ و كيف بيشوفوا بنت فلان ناجحة و بنتهم ساقطة!
توا خاشيين ع أيام امتحانات، و مع الضي اللي يهرب و في فترة شتي و صقع كله ح يأثر عليك اي
بس حاول انك ما تخليهمش عوائق لنجاحك، ما تخليش أي ظرف في الدنيا يوقفك
كل ما تيأس تفكر أمك و بوك و تفكر نظرة الناس كيف بتكون ليهم قبل ليك، و كيف لما بتنجح بتكسر هلبا اشخاص يتمنولك الطيحة.
ثابروا حبايبي؛
اجتهدوا؛
اسهروا و أتعبوا، لأن عمره ما النجاح جي بالساهل،
قوي ايمانك بربي و من اليوم قول أني قدها؛
أني مش فاشل؛
أني مش ح نيأس؛
أني ح نرجع الفرحة و الضحكة ع وجوه أمي و بوي؛
أني قدها؛
أني أقوى من كل العوائق اللي نواجه فيها؛
أني عندي حلم و نبي نوصله؛
و خليها في بالك إنّ ربي عمره ما يضيع تعب عبده، ح يجازيك ع كل ثانية جهدت روحك فيها💛.
و بنختم كلامي بالأية هادي:
{إِنّي جَزَيّتُهُم اليَوْمَ بِمَا صَبَرُوا انهُمْ هُم الفَائِزون}.
صدق الله العظيم
#saja
#تاق لجماعة امتحانات
أنت تقرأ
هل جزاء الإحسان إلا الإحسان
Chick-Lit"كن أنت من يستخدمه الله لجبر القلوب المنكسرة حتى ولو كنت أكثرهم انكسارًا فمن سار بين الناس جابراً للخواطر أدركه الله في جوف المخاطر قال تعالى : ﴿ هَلْ جَزَاءُ الْإِحْسَانِ إِلَّا الْإِحْسَانُ ﴾
