أحببت فضائي(بالعراقي)مكتملة

غريبه عنهم

يسموني الانسانه الغريبه عنهم طبعا حقهم لان البشر عمرهم مراح يفتهمون شعوري اني انسانه احب ارسم كل ما يدور بخيالي من كائنات غريبه محد يصدكني من احجي واكول اكو كائنات مختلفه غيرنا عايشه فلهذا مراح احجي وانطق كلمة عن هذا الموضوع
*(هسه البنيه هنا دتحجي عن معاناتها مع البشر وعدم استجابتهم الها ولأفكارها الغريبه
وطبعا البنيه حيل راح تتعب راح ابديلكم القصه
كأنما اني هي وهي اني ).
بيوم من الايام جنت رايحه للمدرسه طبعا جانت عدنا اول حصه هي الرسم
فدخل الاستاذ وكال اريد منكم ترسمون كل ما يخطر بالكم
فبديت ارسم رسمي الي اني احبه عن الكائنات الغريبه
خليت الورقه وبديت ارسم كلشي شفته بخيالي
مركبه فضائيه وضوء خارج منها وكائن دينزل من هاي المركبه
من بعد دقايق شفت المدرس جاي عليه اني اول وحده وضل يباوع على رسمتي بستغراب
مجنت اعرف ليش دايما اني الاولى الي الفت انتباها جنت احس بشعوره وهو يشوفني غريبه عن الباقيات
فسالني وكال
كرستين انتي شدترسمين
ضليت اني ساكته
وراها عاد عليه السؤال
فباوعت عليه وقررت اجاوبه
استاذ هذوله كائنات محبوسه بهاي المركبه الفضائيه ..
وكعدت اشرح للاستاذ عن هاي المركبه.
باوع عليه بابتسامة استهزاء
كلي كملي
ضليت احجيله كل الي اشوفه باحلامه
كتله انهم محبوسين ميكدرون ينزلون للارض بسبب طول المسافه بين كوكبهم وكوكبنا
وللوصول المدة الاف السنين
ضحك وكلي بنتي انتي خيالج حيل واسع
باوعت عليه ونقهرت من كلامه تاكدت انو هو ممصدكني
خنكتني العبره وضليت ابجي
من بعدها قررت بعد ما اتكلم ولا انطق بحرف ويه اي بشري
الاستاذ خاف عليه اخذني لغرفة المدير
وحجه اله كدامي عن الي صار
ضليت اني ابجي
فقرروا يتصلون بامي ويستدعوها تجي بالحال
الو ست سام مرخصتج حالة بنتج صعبه كلش انريد هسه تجين للمدرسة
وبعد دقايق الباب تندك وامي تدخل
تحضني شبيج ماما شنو الي صار
اني ضليت ساكته وماارد
حجه المدرس كلشي لامي
وقرر المدير انو تاخذني باجازه لفترة ارتاح بيها
وحتى ما اثر على عقول الطالبات
حيل انجرحت حسيت نفسي مو منهم ولا اني طايقه اعيش وياهم على الارض
اخذتني امي وضلت تحاول تخليني احجي
ولو بكلمة بس اني اخذت قراري بعدم الكلام نهائي
شفتها تبجي عليه انقهرت صح بس خلاص اني تعبت من البشر
من بعد ما وصلنا للبيت صعدت لغرفتي متحمسه اشوف رسوماتي احسها عالمي الخاص
من بعد دقايق
سمعت امي تتصل بالتلفون ودتحجي حالتي وتكول دكتوره !
نزلت اركض من الدرج حتى اعرف شديصير؟.