وبشر الصابرين

البارت الثاني

//وبشر الصابرين ///

البارت الثاني ....

امينة خان : مرت الايام ويا اولاد ابني يوم اسوء من يوم ... جان حمل ثكيل علية وصعبة اربي اطفال واني لا حول ولاقوة .. خاصة شفت زوجة شوان طريقة كلامها مبينة مسيطرة ..

اجذب اذا كلت ماشلت هم اذا اموت منو الهم بعدي ..

بفضل الله ربيتهم ولولا انو اني مرة جبيرة بالعمر مجان قبلت اخذ من شوان ولا فلس .. جان ينطينا بالشهر ٥ دنانير .. احاول ادبرها بيهن ولا امد ايدي الة واكلة محتاجة بعد ...

ربيتهم على المحبة .. جانن البنات الكبار شيلان وديلان  يساعدني بالبيت رغم جانن بالابتدائية بس شالن حمل هواي وياي ....

مرت السنين وكبرو الجهال .. والبنات ..بلغن وصارن حديثات والعيون عليهن .. واني مرة وحدانية .. اخاف لا الجوارين تصير عيونهم نكسة عليهن .. خاصة جانن حلوات حيل ماخذات جمال امهن نرمين ..

بيوم اجة ابني سيروان خطب ديلان وشيلان لولدة ..
ماكللكم على الفرحة الي صارت الي بوكتها ... واخيرا ضمنت مستقبلهن ...

فاتحت ابوهن بالموضوع اصلا كال موافق بدون تفاهم ... جان همة يخلص من مسؤليتهن ..

اخذهن عمهن سوة .. ماقصر وياهن .. والحمد لله الله عيشني لهاي اللحظة الي شفتهن بي عرايس ...

اتذكر نرمين جانت تحلم بهليوم ..
جانت كل متمشط لوحدة اسمعها تحجي ..

نرمين :اوف يماما هم يجي اليوم الي اشوفج بي عروس ..

ديلان : ماما اريد من اتزوج انتي تمشطيلي وتحطيلي حمرة بحلكي وسواد مثلج بالعيون ..

بس ماريد من هذا الازرك الي بكصتج ..

نرمين : حطيت ايدي على كصتي ..دنكت .

امينة خان: روحي ديلان لعبي ويا اخوانج ..

ديلان : اي نة نة .. رايحة ..

امينة خان : يمة لخاطري لا تزعلين .. هذا ابني شسويلة ..

نرمين : مزعلانة بس اخاف على البنات لا يتعقدن من الزواج .. اخاف يبقن العمر كلة متخوفات من الرجال ..

امينة خان : الله كريم بنيتي .. تعيشين وتشوفيهن عرايس هههه وبيدج تمشطيلهن ..

نرمين :والله يعمة ما اضن .. على المر الي شابعة بي .. ماطول  .

امينة خان : اسم الله بنتي شنو هلحجي ..

...........
امينة خان : سودة علية جان كلبها حاس ...

بعد زواج البنات البيت احسة فرغ علية .. والشغل كثر .. جانن شايلات البيت بندارتهن ..بقت وياي شيرين الي صار عمرها ٩ سنوات ..والولد ماجد ١٢ ومازن١٤ ...

حاولت اشكد مااكدر اخليهم بمدارسهم .. اريد ياخذون شهايد لان ابوهم مامنة رجاء ..

من التعب كمت احس بروحي دتاذة بالشغل ..