الحلقةة الثانيةة
#الحلم_يتحقق
الصبح الساعة 7:30
ناضت لوجين لقت أختها في الحمام قعدت تخبط عليها وتستعجل فيها بيش تطلع لعند طلعت
مبروكة : اوووف منك الواحد ميعرفش ياخد راحته بكل
لوجين : لكي نص ساعة شن اتديري هضا كله
مبروكة : نفس الي تبي اتديرية
لوجين : بس انا منطولش،نطلع بسرعة مش كيفك
مبروكة : كذابة حتى انتي اطولي
لوجين : تي والله ...وفطنت الخوها خش يجري قبلها
مبروكة : هههههه شفتي دوتك الواجده شن دارت فيك
لوجين وهي تخبط ع الباب : أنس ياحيوان اطلع
دق ...دق..... دق ....والله تشوف أطلع تأخرت ع الجامعة هيا.... والله سخيف هي
وعدت للدار متعقده طلعت السروال الأمريكي والسورية اتباعها لقتها مكرمشة : تي عليك قصة اليوم باين من بدايته شكله
سمعت صوت الباب انفتح مشت تجري فنصت في خوها وخشت وطربقت الباب وع السريع دارت دوش وطلعت تجري .....لقت هلها مقمعزين يفطرو يادوبك مسكت طاسة الحليب تبي تشرب رن موبايلها بحتت لقاته صاحب الباص ردت عليه قالتله : أحمد عطيتي خمس دقايق وننزلك
أحمد : 5 دقائق ماتطلعيش نمشي رآه
مشت تجري لبست السورية من غير تحديد والسروال الأمريكي وكرت أول وشاح قابلها وردت على سفرت الفطور خدت طرفين كعك ونزلت تجري
أنس : كنها السورية تقول ماضغها كلب
مبروكة : ههههههه
لوجين : كلب يعضك إن شاء الله ....وطربقت باب الحوش ونزلت
وهي نازله لقت صهيب نازل وراها ....تحشمت تبرم وتصبح عليه وهي بالمنظر هضا قعدت تقول بينها وبين نفسها ( عليك حظ معفن ماتطلع في وجي إلا اليوم إلي نكون مستعجلة ولا مش متانقة اوووف )
كملت طريقها وركبت الحافلة صبحت ع البنات وقمعزت
في الحوش
مبروكة : ماما رآه انا اليوم مش ماشية لعيت خالتي
سلوى: ليش
مبروكة : عندي امتحان
سلوى : باه خليك توه تمشي معايا لوجين
مبروكة : لالا حتى لوجين مش ماشيا
سلوى باستغراب : ليش !!!
مبروكة : حتى هي قالتي عندها امتحان مهم وتبي تروح تقرى
سلوى : باه نمشي بروحي خلاص
أنس وهو يبحت في الساعة : هي يا ابلة
مبروكة :مازال بدري
انس : مش فاضيلك انا تبي تطلعي ولا لأ
أنت تقرأ
الحلم يتحقق ( روايات ليبية )
Romanceقصة كفاح بنت ليبية بدينة للوصول الي الرشاقة و أيضا الوصول الي حلمها الذي انتظرته طيلة حياتها ؟ فما هو حلمها ؟ و كيف كانت قصة كفاحها ؟ للكاتبة : تهاني إدريس
