الحلقةة السآدسةة
#الحلم_يتحقق
( في الحوش )
خشت لوجين فرحانه ورت امها القفطان
وخشت الدار تشوف روحها شن تلبس اكسسورات عليه وكيف اتدير شعرها
خشت عليها أمها
سلوى : لوجي
لوجين : نعم
سلوى : وتي دبشك الي تبي تلبسيه وخلينا نمشو عند خالتك بيش نطلعو معاهم بالمره
لوجين : لالا خلينا نلبسو هنا ليش ماشين غادي
سلوي : نمشو بدري بيش بالمره كان يبو مساعدة ولا شي حاجة
لوجين : خوذي معاك مبروكة نا منبيش نعدي توه
فطنت أن أختها مختفيه قعدت تسأل : صاح وين كوكا مش باينه
سلوى : مبروكة مع العروس في المزين
لوجين بصدمة : كيف امتى عدت ? وليش ماحد قالي ?
سلوى : امبدري رنت عليا خالتك وقالت خلي مبروكة تمشي مع ايه لأن صاحبيتها مصارش منها
لوجين : عليك حظ الحيوانه مبروكة اكيد توه تمكيج غادي
سلوى : هضا كان ايه دفعتلها اختك طالعه ومش واخده معاها فلوس
لوجين بتنهيده : اه سمله عليا نا وخلاص مش عارفه شفشوفتي من يستشورها ليا
سلوى : توه فكيني من الدوه وقت رآه هيا بيش نمشو
لوجين : أمي عاد فكيني مانبيش نمشي وكان ع الضم اكيد الحوش مليان بنات...وزحمه فكيني نوتي روحي هنا ونطلع بالمره ع الصاله
سلوى : ومن يبي يجيبك بعدين
لوجين : باتي
سلوى : باتك مش فاضيلك توه بيوصلني وبيقعد مع الرجاله
لوجين : معناها أنس
سلوى : أنس قالي بيروح من الجامعة على غادي
لوجين : عليك قصه
سلوى : تعال معايا توه خيرلك
لوجين بعناد : مانيش
سلوى : خليك عنك مامشيتي . . ودوري من يجيبك بعدين
لوجين : باهي باه توه نصرف نا انتي عدي
طلعت سلوى وعادل وخلو لوجين في الحوش بروحها
بدت لوجين تستعد
طبعا أول حاجة دارتها خشت الكوجيته تبي تاكل لقت أمها مش مطيبه
طلعت بطاطا قشرتها وقطعتها وقلتها .. حطتها في نص كبير ورشت عليه مايونيز (حشيشتها بطاطا ومايونيز )
بعد شبعت بدت تستعد
دارت دوش وطلعت ...وكلمت صفاء بيش تساعدها ...وبعد عشر دقائق كانت صفاء عندها
وبدت تستشورلها في شعرها ...بعد كملت دارتلها لويات وطلقت شعرها
أنت تقرأ
الحلم يتحقق ( روايات ليبية )
Romanceقصة كفاح بنت ليبية بدينة للوصول الي الرشاقة و أيضا الوصول الي حلمها الذي انتظرته طيلة حياتها ؟ فما هو حلمها ؟ و كيف كانت قصة كفاحها ؟ للكاتبة : تهاني إدريس
