الحلقةة الحاديةة عشر
#الحلم_يتحقق
خشت صفاء الدار لقت لقت لوجين في سابع نومه راقده ...فاتحه فمها وشعرها مشفشف ...قعدت تهز فيها
صفاء : لوجين انتي يا بلا نوضي بسرعه
لوجين : هم نبي نرقد
صفاء : لوجين ورأس أمك نوضي كذا ...الموضوع خطيييير
لوجين فتحت عيونها لقت صفاء قدامها
صفاء : لوجين ...لوجين صحصحي
لوجين : تي هااا معقوله حد ينوض هكي شن فيه كنك سكانه انتي
صفاء من غير اي مقدمات : صهيب عرف القصة
لوجين بصدمة : شنووو !!! قصة شنو 😨
صفاء وهي خايفه : انك ...انك انتي لوجين مش هديل 😞
لوجين غمضت عيونها بالقوة تحساب روحها مازلات تحلم أو راقده
صفاء : لوجين نحكي معاك يا خرا شن تبي اتديري تي والله كان تحقي وجه كيف قعد حي ياحي انا مش عارفه كيف نقابله اليوم في الحوش حاسه بتأنيب الضمير
لوجين .......ساكته
صفاء : حي عليا عارفه من أول ماعرف وهو ساكت من الصدمة معاش عرف شن يقول هضا كله من هديل خزي على وجها
اه ياربي عارفه لحقتني عند السياره ........وقعدت صفاء تحكي في القصه إلى صارت معاها بالتفصيل
لعند فطنت أن لوجين مش معاها بكل ومافيش على وجها أي علامات لا صدمة ولا حزن ولا شي برووود جدا تبحت في صفاء وساكته
صفاء بخوف : لوجي ...لوجين كنك
لوجين ......سااااكته
صفاء : حي عليا نا ...لوجين ادوي كنك
...لوجين وقعدت تخبط في صحبتها على وجها بشويش ولوجين ع نفس الوضع لعند عطتها كف قوي
لوجين بعد الكف تحركت
صفاء : لوجين انتي كويسه
لوجين ودموعها بدت ينزلن : لاااا لاااا يا صفاء انا قاعده انموووت صفاء انا خلاص خسرت صهيب
صفاء : اششش بلا بكاء
لوجين ودموعها يزيدن : خلاص يا صفاء طحت من عينه بكل خلاااص مقهورره يا صفاء وانا الي درته في روحي ....ليش عطيتني رقمه ليش ما عطيتيه لهديل مكانش صار هكي ليش
مسكت صفاء صحبتها وقعدت تهدي فيها بس لوجين مابطلتش بكاء
خشت سلوى الدار جايبه عصير لقت بنتها منهاره وتبكي
قعدت تسأل فيها ماردت سألت صفاء
ماعرفتش شن ترد بعدها طلعت كذبه وقالتها : وحده معانا في الجامعه جاها السرطان وماتت ولوجين زعلانه عليها
سلوى : لاحول ولاقوة إلا بالله إن شاء الله ربي يرحمها ويصبر هلها
صفاء : إن شاء الله
أنت تقرأ
الحلم يتحقق ( روايات ليبية )
Romantikقصة كفاح بنت ليبية بدينة للوصول الي الرشاقة و أيضا الوصول الي حلمها الذي انتظرته طيلة حياتها ؟ فما هو حلمها ؟ و كيف كانت قصة كفاحها ؟ للكاتبة : تهاني إدريس
