العنيد
الجزء 2 الفصل 7
ادهم بعد النطق بالحكم اخدوه مكلبشينه وهو عنيه في عنين مراته اللي فجأه اتحولت لعدو
شدوه ودخل السجن في انتظار تنفيذ الحكم ولبس البدله الحمرا
راحله مدير المخابرات: يالا من هنا
ادهم: يالا فين؟
المدير: هتخرج بره مصر
ادهم: ومين قالك اني عايز اخرج بره مصر؟؟؟
المدير: انت عايز تتعدم؟؟؟ انا عايز اعرف انت ساكت ليه؟ انت بسهوله جدا ممكن تبرأ نفسك؟؟؟ انت سايبهم يعملوا فيك كده ليه؟
ادهم: مش فارقه صدقني
المدير: حياتك... مراتك.... ابنك.... كل دول مش فارقين معاك؟؟؟
ادهم: مراتي!!! هو انت مكنتش موجود في المحاكمه ولا ايه؟ دي مراتي هيا اللي لفت حبل المشنقه علي رقبتي ولا ما اخدتش بالك!!!
المدير: هيا معذوره.... اللي لعبها معاك وورطك كده عرف يلعبها صح؟
ادهم: لا طبعا..... هو ملهوش علاقه باللي حصل في المحكمه نهائي... هو لعب لعبه والباقي كله مراتي عملته
المدير: حطلها عذرها
ادهم: وهيا محطلتيش عذر ليه؟ هاه؟ مفكرتش للحظه ليه؟ رمت عشره سنين في الارض وداست عليهم ليه؟ عارف انا لو فعلا راجل وحش وفيا كل العبر اللي في الدنياوبخونها كل يوم مع واحده كان المفروض في موقف زي ده تقف معايا وتقول ده ابو ابني؟؟؟ ده المفروض يتعمل!!! مش هيا اللي تقف وتقول اني قاتل؟؟؟؟ للدرجه دي انا عدو ليها؟؟؟ وجاي حضرتك تقولي حطلها عذر!!!
المدير: خلاص ما تحطلهاش عذر طلقها وارميها بس طلع نفسك من هنا
ادهم: مش عايز اطلع من هنا.... عارف انا حاسس ان حياتي كلها بجري في سباق بجري واجري واجري وبتعب واقع واقف واجري واقول خلاص اهو السباق هيخلص وارتاح بس لا برتاح ولا السباق بيخلص
دلوقتي بقي خلاص وصلت لخط النهايه اهو وللاسف طاقتي كلها استنفدت معدش عندي طاقه اقوم اقف علي رجليا تاني... مابالك اجري.... خلاص مش قادر
سيبني بقي الكام يوم دول اعيشهم في هدوء
المدير: وابنك مفكرتش فيه؟
ادهم: ابني!!!! ابني وسط عيله هتحبه وترعاه
المدير: ولو العيله دي كرهته لمجرد انه ابنك!!!
سؤال ادهم علي طول بيسأله لنفسه بس معندوش الجرأه يفكر في اجابته!!!!
ادهم: له رب كريم
المدير: ادهم
ادهم: سيبني لوحدي الله لا يسيأك سيبني لوحدي
ادهم رقد علي سريره وعطي للمدير ظهره
والمدير بص لحالته وسابه ومشي لانه عارف ان حاله اليأس اتمكنت تماما من ادهم
طول عمره بيعتبره زي ابنه وبيساعده وبيحبه
مش عارف يعمل ايه ويساعده ازاي؟
لازم يكلف فريق يحاول يثبت براءته
بس ادهم رافض يتكلم ويفيدهم باي معلومه تساعدهم
المدير راح لليلي بيت ابوها
المدير: يا بنتي انتي فاهمه انتي بتعملي ايه؟ شهادتك لفت حبل المشنقه علي رقبه جوزك!!!
ليلي: انا ماليش دعوه
المدير: مالكيش دعوه انتي مش واخده بالك انتي عملتي ايه؟ انتي قدمتي الدافع والدليل واثبتي التهمه عليه؟
ليلي: انا اقسمت اقول الحقيقه وقولتها هو يتحمل مسؤليه افعاله
المدير: وهو ادهم ما بيتحملش '!!! يا بنتي ده ابو ابنك!!! اي واحده مهما يكون في خلافات بينها وبين جوزها في وقت الشده بتقف معاه وتسنده
ليلي: انا طول عمري واقفه معاه وسنداه
المدير: انتي '!!! انتي طول عمرك واقفه علي اكتافه وحنياه ومخلياه موطي.... انتي امتي وقفتي معاه؟ ساعت ما فضحتيه انتي واخوكي؟؟؟ ولا امتي؟ انا ايوه بعيد بس شايف حالته؟؟؟ وشايفه عمره كله بيدي وما بياخدش وبيرضي ديما بالقليل
ادهم خساره في واحده زيك اصلا
ليلي: حضرتك جاي بيتي تهزقني!!!
ليلي وقفت وهو وقف وابوها وامها واقفين بره سامعينه
المدير: لا العفو يا بنت الاصول... بس مستغرب ادهم حب ايه فيكي!!!! بعد اذنك اه علي فكره ادهم ما يقتلش ابدا لو سكينه علي رقبته ما يمدش ايده علي واحده ويقتلها ابدا
سابها ومشي وهيا فضلت مكانها تعيط
تاني يوم ادهم في سجنه وجاله السجان بيقوله انه مطلوب في مكتب المأمور لان المحامي عايزو ولما رفض قاله ان الموضوع مهم
ادهم راح مكتب المأمور وكان محاميه مستنيه
ادهم: في ايه تاني عايز ايه؟
هنا ادهم اتفاجئ بوجود ليلي كمان وللحظه قلبه دق انها ممكن تكون حنت وهتشجعه يدافع عن نفسه وطاقه امل صغيره فتحت في قلبه
ادهم: خير!؟؟
المحامي: مدام حضرتك رفعت عليك قضيه طلاق واتحكملها
ادهم اتصدم وكان هيوقع من طوله لدرجه انه سند علي الكرسي اللي قدامه
وما قدرش ينطق ولا عرف يتكلم وبيستغبي نفسه تاني؟؟؟ ليه هو ديما غبي كده؟؟؟؟
ادهم: طلاق!!!!
ليلي: انت رفضت تطلقني
ادهم: انا ما رفضتش انا قولتلك محتاج وقت
ليلي: وانت معندكش الوقت ده وخلال اسبوع هينفذوا حكم الاعدام
ادهم: وطالما خلال اسبوع هينفذوا الحكم مستعجله علي الطلاق ليه ماهو كده كده هتبقي حره خلال اسبوع؟؟؟!
ليلي: وعلشان كده استعجلت بحكم الطلاق والظاهر انك مكروه قوي فحكمولي بسرعه
ادهم: مش فاهم برضه ليه استعجلتي؟؟؟
ليلي: علشان مش عايزه ابقي ارملتك.... عايزه ابقي طليقتك.... علشان لما ابنك يكبر ويعرف قد ايه انت كنت انسان سيئ ما يقفش ويقولي انتي ليه سكتي؟؟ ساعتها اعرف ارد عليه واقوله اني طليقتك مش ارملتك... مش عايزاك تموت وانا علي ذمتك....
ادهم: بجد يا ليلي... انتي بتفوقي كل توقعاتي.... طيب مش المحكمه حكمتلك بالطلاق عايزه ايه تاني مني؟؟؟
ليلي: عايزه اسمعها منك
ادهم: وانا اقسمت اني مش هقولها غير لما اثبت براءتي وبما انها معدتش تفرق فخلاص بقي... عايزين حاجه تاني مني؟
المحامي: اه معلش الشقه المحكمه حكمت انها من حق الزوجه
ادهم بتوهان: شقه ايه؟
المحامي: شقه حضرتك اللي كنت عايش فيها
ادهم: انتي عايزه شقتي؟؟؟ علي العموم هيا اصلا باسمك،... كتبتها من زمان باسمك وبعدين اعتقد بعد ما اموت اي حاجه باسمي هتروح لابني تلقائيا
عايزين حاجه مني تاني؟ ؟
عايز ارجع زنزانتي
ادهم خرج بره وماشي بالعافيه لدرجه ان العسكري مسنده لحد ما وصل ورقده علي سريره
العسكري: انت كويس؟؟؟ اجيبلك حاجه؟؟؟
ادهم: انا كويس.... بس مصدوم عندك حاجه للصدمه؟؟
العسكري: معلش هيا الدنيا كده
ادهم: معلش معلش ما تشغلش بالك انت بيا
العسكري سابه وهو صعبان عليه
ادهم راقد وشه للحيط ومش قادر يفكر او يعمل اي حاجه حس انه مشلول
لا والغبي فرح لما شافها وبسرعه عقله حطلها اعذار وحلم من تاني؟
ايه كميه الغباء اللي هو وصلها دي؟؟؟
يوم واتنين عدوا وهو مكانه ولا بياكل ولا بيشرب ولا بيتعدل حتي من رقدته مكور نفسه ووشه للحيط
العسكري: عندك زياره
ادهم: مش عايز حد
العسكري: يا ابني قوم
ادهم: لما يجي معاد تنفيذ الحكم ابقي قولي ودلوقتي روح
العسكري خرج وبلغ المأمور انه رافض يتحرك والزاير اصر انه لازم يقابله
فالمأمور طلب من العسكري ياخده لاوضه ادهم
وفعلا وداه لعنده
ادهم: قولتلك مش عايز حد افهم بقي
.. ده انا!!!
ادهم لف وشه وابتسم: عايز تقول ايه ممكن يكون ما اتقالش!!!! استني عارف
ادهم اتعدل بالعافيه وقعد
ادهم: عايز تقولي انك سحبت ثقتك فيا وانك ندمان علي اي لحظه وقفت معايا فيها وانك ما يشرفكش تبقي كبير لواحد زيي وانك ندمان انك في وقت وقفت معايا ضد اخوك وبنته.... هاه في اضافه تحب تضيفها ولا انا استوفيت؟؟؟ اعتقد مفيش... خلاص رسالتك وصلت اتفضل بقي
ادهم رقد تاني
عم حسن: ديما ترمي كلامك وتجري وما تستناش تسمع الرد مش هتبطل بقي عادتك دي؟ ؟ علي العموم لأ انا مش جاي اقولك ده
عم حسن شد ادهم جامد عدله
عم حسن: انت عامل كده ليه؟ ؟ وانت من امتي ضعيف كده وعامل زي الست اللي بتندب حظها؟؟؟ انت اقوي من كده بكتير!!!
ادهم: ههههه من ضحك عليك وقالك كده؟ انا مش قوي ابدا.... انا مش عارف انتو ليه مصرين اني قوي... جايبين الثقه دي منين مش فاهم؟؟؟
عم حسن: علشان انت فعلا قوي.... اللي يقف في وش امه ويقولها ده غلط يبقي قوي
ادهم: واديني خدت علي دماغي واترميت زي الكلاب بره
عم حسن: ووقفت تاني وواجهت الدنيا كلها وعملت اسم يشيب اجدع الرجاله والكل بيتهز من دخلتك
ادهم: وكل ده راح في لحظه
عم حسن: راح لانك انت سيبته يروح
ادهم: وانا خلاص مش عايزو
عم حسن: وابنك؟؟!
ادهم: ابني ابني ابني..،، كل واحد يجي يقول ابني.... اعمله ايه ابني ده؟؟؟ مش بإيدي حاجه اعملها
عم حسن: لا بايدك طبعا لانك لو سيبته كده هيطلع يلعن فيك كل لحظه
ادهم: ههههههههههه جت عليه هو يعني ما يلعن
عم حسن: شوف يا ابني انا حاسس بكل اللي انت فيه صدقني... عارف ان الحمل تقل قوي وانك استسهلت ترميه كله وتقعد كده بس ما ينفعش....
ما ينفعش تسيب نفسك كده.... ما ينفعش تسيب الدنيا دي وانت قاتل وخاين.... ما ينفعش كل اللي تسيبه لابنك هو اسم يفضل العمر كله العار ملاحقه انه شايله
ادهم: انت عايز مني ايه؟ ارحموني
عم حسن: نظف اسمك لابنك.... حتي لو مش هتكون موجود في حياته.... اقل حقوقه انه يفتخر باسمه بدال ما يفضل عمره كله راسه في الارض.... انت جربت ودقت قد ايه بتتوجع لما حد يعايرك بامك عايز ليه ابنك يدوق ده ويتعاير كل شويه بأبوه؟؟
ازاي ترضي ده لابنك يشيل اسم متلطخ؟؟
ابوه راجل عظيم جدا واسمه له وزنه بس لمجرد انه وقع ساب كل حاجه تضيع منه؟ انت اقوي من ده بمراحل.... انت مش ضعيف كده.... قوم واقف علي رجليك كده واثبت براءتك... حتي لو هتخرج من حياته يبقي علي الاقل سيبله اسم يفتخر بيه!!! سيبله حلم حلو يحلمه... سيبله قصه حب عظيمه واسم عظيم يتفاخر بيهم عمره كله وده اقل حقوقه
ادهم انا قولت اللي عندي ودلوقتي انت قرر هتعمل ايه؟
خرج ورجع: اه وانا هفضل عمري كله اقول انه يشرفني انك عملتني كبير ليك حتي لو اخترت انك تفضل مستسلم كده؟
عم حسن سابه ومشي وادهم فضل يفكر ويفكر ويفكر
وتاني يوم الصبح قام مع العسكري وفطر وطلب تليفون واتصل يستدعي فريقه والكل كان عنده خلال نص ساعه
هشام مؤمن خالد مصطفي محمد
رجالته كلهم وقفوا قدامه وهو قاعد قصادهم
ادهم: طبعا دي اول مهمه هتقوموا بيها بمزاجكم... يعني اللي مش عايز يشتغل فيها يتفضل من هنا
طبعا الكلام كان موجه خصوصا لمصطفي
ادهم: واثقين!؟؟ طيب بما انكم واثقين فأنا حاليا هحط حياتي بين ايديكم قدامكم اربع ايام تثبتوا فيها براءتي يا اما هتخرجوني من هنا يا هتيجوا تتفرجوا عليا وانا بتمرجح
مؤمن: احنا ممكن نخرجك من هنا بسهوله
ادهم: انت متخيل يا فصيح اني محتاج مساعده علشان اخرج من هنا
انا لوعايز اخرج هخرج بسهوله بس انا قررت اثق فيكم وفي تعليمي ليكم
خالد: طيب هنبدأ منين؟
ادهم: هتبدؤا منين يا شيخ خالد!!؟؟ انا اقولكم هتبدؤا منين....
ادهم بدأ يشرحلهم الوضع كله وحكالهم مقابلته لفريده وتحليل الخبير اللي عمله وكباريه الليل والسهر وحياه
ووزع عليهم ادوارهم وكلهم مشيوا من قدامه الا مصطفي اللي فضل
ادهم: نعم؟؟؟
مصطفي: انا اوعدك اني هعمل كل اللي اقدر عليه مش علشانك ولا علشان ليلي انا مش عارف انتو بينكم ايه؟
ادهم: وبعدين؟
مصطفي: انا يهمني في الحوار ده كله يوسف اللي انتو متجاهلينه... لو انت برئ عايز اثبت براءتك دي علشانه
علشان يرفع راسه لما حد يقوله انت ابن مين؟
عايزه يشيل اسم له وزنه؟؟؟ لكن لو انت فعلا خنتها وانت مجرم يبقي ده نصيبه بس ساعتها مش هسأل نفسي لو..... انا هقفل ال لو دي
ادهم ابتسم: انا مش ناسي يوسف... امال انا استدعيتكم النهارده ليه؟ ؟ ده نفس اللي انا عايزو.... كل السكك والروابط اللي بيني وبين ليلي اتهدمت واتكسرت بس فاضل يوسف وزي ما انت قولت من حقه يشيل اسم نظيف وده اللي انا بعمله.... عندك حاجه تانيه عايز تقولها؟؟؟ لو معندكش اتفضل
مصطفي سابه ومشي وهو كله قلق وخوف علي مستقبل اخته
يوم واتنين ورجاله ادهم ماشيين وري الخطوط اللي ادهم رسمهالهم
اكرم راح لادهم زاره واستغرب ازاي كلف رجالته ومكلفش اصحابه
اكرم: طيب احنا نمسك القضيه دي يا ادهم انت ازاي تسيب حياتك في ادين العيال دي؟
ادهم: اولا هما مش عيال وعندهم المقدره انهم يخلصوا المهمه دي وبعدين انا ليا غرض اني اكلفهم هما بالذات
اكرم: غرض ايه بقي اللي بتخاطر بيه بحياتك؟؟؟
ادهم: وجود مصطفي في فريقي.... هو حاليا بيحاول يثبت انا انا مذنب بجد علشان اخته... وعايزو هو اللي يثبت براءتي مش حد غيره فهمت بقي
اكرم: ولو معرفش؟؟؟
ادهم: هيعرف عيب عليك ده تلميذي.... هيعرف وبعدين خليك انت وراهم كخط دفاع اخير لو تحب
