#طلاق_قهري
الحلقة ( 1 )
_ياااه يعني خلاص هتسيبني
لما دخلت بيتك كنت فاكره اني مش هسيبه ابدا هعيش معاك اللي باقي من عمري ماكنتش أتخيل أن النهاية قريبة اوووي كدا 💔
نائل انت مش بس جوزي انت حب عمري
حطت صورته واستنت الماذون يوصل في فيلا رجل الأعمال زين النادي والد جوزها ووريث العيلة نائل
ماهر .. الماذون وصل
نائل .. بالسرعة دي ؟
لو هتتجوز كنت قولت ليه أتأخر كدا
احنا دائما مستعجلين علي الحاجات الحلوة
ماهر .. بعد كل اللي حصل لسه بتعتبر جوازك من ثراء حاجة حلوة
وقف نائل بانفعال ووش حزين مكسور
طبعا ، حب عمري ي ماهر
ماهر حط أيده ع كتفه وقاله
طيب ليه تتطلقوا ماتقولها بحبك وامسك فيها قدام اهلك واتحدي كل الناس ..
نائل الكلام سهل لكن الفعل صعب
ماهر .. ماتسبهاش مش كل يوم هتقابل الحب الحقيقي
زين النادي .. يالا ي ابني خد القرار الصح وصلح غلطتك
بص نائل لماهر وكأنه بيقوله شايف الضغط والزن
حرك ماهر طرف عينة برسالة لصاحبه
روح امسك ف حبك
******
بتدخل ميرنا الفيلا وهي بتجري قابلت سيدة
ثراء فين ؟
سيدة .. ف اوضتها ي ست ميرنا
جريت ع فوق من غير ماتكلم الناس الموجودة ام نائل ،الماذون ،واخته داليا
ام نائل .. اهي شرفت اللي مقوياها علينا
داليا .. مالوش لزوم الكلام دا ياماما
انتي هتعارضيني ..؟
لاا ولا اعارضك ولا اوافقك أنا مش هقدر ابقي معاكوا ف اللحظات اللي جايه دي من الأساس
داليا ..
نعم ي ماما
هتروحي فين وتسيبي اخوكي لازم تبقي جانبه
بصت لها بزعل وضمت شفايفها
كفاية عليه انتي ي ماما
******
ميرنا بتفتح الباب بلهفة وثراء بتلم هدومها وهي بتعيط ،محروقه من الوجع والصدمة
ثراء حبيبتي
ميرنا ..رمت الهدوم ع السرير وبعضها ع الأرض كأنها فاقده الزمن أو عايزاه يوقف
الحقيني نائل خلاص استغني عني مابقاش يحبني
ميرنا .. مستحيل اكيد في سوء تفاهم
ثراء بتعيط ف حضنها وبترد بصوت هادي
ماعرفش ومش قادره اتكلم معاه بعد ماقالي اللي بينا انتهي
ميرنا .. ليه طلب الماذون ،ايه السرعة في التخلي دي انا لازم اتكلم معاه
ثراء .. لا هتقوليله ايه
بتتكلم بصوت عالي وتصرخ فيها .. هتقوليله والنبي ماتطلقش صاحبتي العاقر وخليها كمان سنتين يمكن تخلف ولا هتقوليله خلي ابوك يصبر ع فلوسه ومايرمنيش أنا واهلي ف الشارع ، هو خلاص خد قراره
ميرنا بترجع لصاحبتها وتقعد من الحيرة تفكر هتتصرف ازاي عشان تلحق جوازهم قبل ماينهار ..
*****
ماما ثراء ماكلمتكيش النهاردة
ام ثراء .. لا ي مفيدة هو في حاجة ؟
مفيده واقفه ع باب الاوضة وأبوها نايم تعبان بعد خسارته الكبيره وشركته اللي هتروح منه ،عيونه بتتحرك ف كل مكان بيدور ع ضحكته وفرحة أسرته ثراء مستنيها وكأنه شايفها وسامع دقات قلبها المهزومة
مفيدة .. مافيش بس متعوده تكلمني كل يوم وهي نازلة التمرين
الام .. تلاقيها مشغوله ف اي حاجة الكوافير أو خرجت مع جوزها ماتبقيش مملة وتتصلي بيها
مفيده .. والله امهات اخر زمن انا قلبي مش مرتاح
الام .. بتقولي ايه ي لمضه
مفيده .. ماقولتش طبعا ي ست الكل
اخبارك ايه ي بابا ؟ مش هنشد حيلنا بقي
احمد البكري .. أنا كويس ي حبيبتي ماتقلقيش
انزلي انتي الجامعة
اومرك يا بابا
سلام ي ماما وباستها ع خدها
*******
ميرنا .. سؤال يحل كل اللي وصلنا ليه بتحبي جوزك ولا لا ؟
بحبه وبموت في ريحته ،انفاسه حياة بالنسبة لي ،تفاصيل رجولته كلها حفظاها بكل مافيها من مميزات وعيوب
ميرنا .. يبقي لازم تمسكي فيه وتقوليله بحبك ومش عايزا أطلق مهما كان السبب
ثراء .. اه بحبه لكن أهله مابينا ،ابوه حطم ابويا خسرنا كل شئ بسببه
ميرنا انتي بتقولي ايه ؟
معقول عمي زين يعمل كدا
ثراء .. لا ي حبيبتي ومرات عمك الجميلة ماسكه ع نغمة واحده نفسي أشيل عيالك قبل ماموت ..
ياريت تموت وتريحني
نائل كان جاي يعتذر علي كل اللي حصل وياخد ثراء ويبعد عنهم تماماً ،قرر ف اخر لحظة يشتري قلبه زي ما الشيطان قرر يكمل ويخرب عليها
وقف مابيتحركش ، بيسمع كلامهم
ميرنا .. يعني انتي مقرره
ثراء .. ايوا هطلق من نائل وكل واحد يروح لحاله
تمت الحلقة
#أماني_عنان
