ضغوطات الحياة ( روايات ليبية )

حلقة 3🔥

ضغوطات الحياة
الحلقة الثالثة
    
   
   
    
   
  
خشت ندى للحوش لقتنا مقعمزات
انا:-شن حكيتووو
ندى:-الله !!
انا:-احكي ياندى
ندى:-نوثق في الشيطان ومانوثق فيك ياحقيرهه ياانانية
انا:-انتي الانانية ماتفكريش في محمد بكلل
ندى:-خلاصصص قرفتوني بسيرته محمد محمد محمد يعني الواحد مايحبش ولا شنو ولا يقعد هكي عشان محمد بيك
بيسان:-خلاص ياندى زدتي عن حدك
انا:-بنات خلاني انا وياها دخلكنش انتن 
ندى:-معش عندي مانحكي معاك
بيسان:-نوران خالي يرن
انا:-اكيدهه جاء.. الو ياخالو
خالهم فتحي
فتحي:-هيا بنات اطلعن انا برا
نوران:-هيا هي
لمن دنيتهن وخضن دبشهن وطلعن
علي جيت بابا يبحت من بعيد
بابا:-هي هي وين ماشيين
فتحي:-شايلهم لعيت جدهم امهم غادي وماشيين اليوم يغيرو جو مع امهم
فطن خالي البابا دواخ وباين عليه ساكر
بابا:-اه ب ه هه
فتحي:-!انت كويس
انا:-خالي كان يعرف مستحيل يخلينا نردوو للحوش مرة اخره
بابا:-اه كويس
فتحي:-صبي ياراجل على حيلك انت شارب ؟!
انا حاطة يدي على قلبي
بابا:-تي حول كاتخليش مفش غلي فيك
فتحي:-بوك سكران اركبي اركبي اركبنننن
ركبنا نجرو
بابا:-وين واخضهن بناتي مايمشنش لحد فاهم
فتحي:-اسمع كان ماتمشي من قدام وجهي اقسم بالله نفش غلي كله فيكك
بابا:-اطلع كنك راجل ووريني عضلاتك
طلعو الجيران
عمي سالم جارنا
عمي سالم:-شن في كنك يافؤاد صوتكك واصل لحوشي جوا
بابا:-مادخلكمش انتم خش حوشكم بسس
نزل فتحي ضرب بابا بوني ونا منصدمة والبنات في السيارة
فتحي:-عشان لما نقولك حول من قدام وجهي تحول ومشينا
فتحي:-باتكم يسكر !!
انا:-مش عارفة
فتحي:-لالا تعرفن احكن خيرلكن !!
انا:-ماعندنا مانحكو مافيش شي ولا عمرنا شفناه سكران
ندى:-كذابة ياخالي سكران وحتى ماما تعرف
بيسان:-سكري فمككك
فتحي:-انتي الي سكري فمك
ندى:-ماما تعرف ودف ماما دفههه ومبهدلها ويضرب حتى فينا كان تبي شوف جبهتي كيف مخبشة ومضروبة
فتحي:-ليش تكذبي عليا ها ليش!!احكي يانوران
انا:-ياخالي ماكذبتش بس انا مضطرة نسكت
فتحي:-توا خليهه يحلم كان رديتولهه باهي
انا:-واللله مافي حاجة ندى هيا الي زايدهه مواضيعع
فتحية:-انتي الي كذابة بس
انا طبست راسي وقعدت نبكي
فتحي:-ونا غير نوصل للحوش حسابي مع امكن
ندى:-باهي خالي حطلنا اغنية
فتحي:-حاضر شن تبي
ندى:-عاطيني الخيط توا نحط انا
فتحي:-امسكي
خضت الخيط وحطت
حبك يدق بالراس
ماليني حب واحساس
غير انت تاج الراس
وهذا مكانك
حبك سوالف ليل
وشفاك طعم الهيل
بقلبي عادي تعيش
هذا مكانك
انا خايفة وقلبي يدق زعمك كيف هتكون ردت فعل خالي وحي علينا من ماما ونحن خربنا حوشنا بروحنا ويقعدوا الناس يحكوا علينا ويسمعونا كلام 💔حي عليا انا
فتحي:-كنك شن فيك عليش ترعشي
نوران:-لا انا كويسة
فتحي:-بطلي كذب وبعدين امك ليش ماحكتلنا تسكت عليه السكار الحقير انتن عارفات كان الناس يعرفوا تقعد شمتتنا في كل مكان ويقعدوا يحكوا على امكن وزيد هكي دورن من يخضكن انتن
انا قعدت نبحت في رنا
ندى:-خالي اصلت الجيران كلهم يعرفوا
فتحي:-تحكي جد!!
ندى:-اقسم بالله ومافي واحد في المنطقة مايحكي علينا ويسمعوا فينا الكلام في المشيه والجيا
رنا:-خلاص زوادتيها عيد سادك
فتحي:-شن لعند امتى بتسترن على بوكن انا الموضوع هذا مش ساكت عليه وبعدين وين محمد الذكر !!يجي يحكيلي ولا حتى هو يسكت على بوهه!!
ندى:-اها كلهم زي بعضهم ساكتين عليه
فتحي:-مشاء الله الله اكبر
انا:-ياخالي افهمنا بس
فتحي:-شن بنفهمكن شنوو خلاص سكرن فوامكن وامكن حسابها معايا بعدين تم
انا ماسكة دمعتي بالسيف
بيسان:-شن عاجبك الي اديري فيه
ندى:-الكلام هذا كان لازم ينقال من زمان اخرهه
رنا:-خزي هذي جزات ماما انتي عارفة خالي شن هيدير ولا !!
ندى:-طبعآ خليها تعرف حدودها مع الراجل السكار هذا وبعدين شن عجبكن في عيشة الفقر عيشة جدودي احسن بمليون مرة
وصلنا للحوش وخالي كان راقيلهه وجوهه مش تمام بكلل خش متعفلق وفتح الباب
فتحي:-امينهههههههه
ماما طلعت منفجعة
ماما:-شن شن في يافتحي
فتحي:-نمشي نقول الباتي انك قاعدة مع واحد سمعتهه خايبة قدام الناس مافي واحد مايحكي عليكم شن بيحكوا علينا الناس بكرا ها جاوبيني شنو بيحكوا علينا يقولوا معاطين بنتهم ومسترخصينها الواحد سكار ها نرا احكي فضحتي بينا وشوهتي وجوهنا مافكرتيش في سمعت بناتك ولا في سمعت ولدكك ها احكيي
ماما:-انا قعدت وكنت لازم نقعد عشان العيال يتربوا تحت ظل بوهمم
فتحي:-عليك عذر اقبح من ذنب!!تي اين بووو هذا ترا احكي اين بووو احكي ماتسكتيش هذا يسمى بووو تي هذا خسارة فيهه عيالك وخسارة فيه انتي شن ذنبهن بنات زي الورد ضيعلهن سمعتهن في الهلوسة بتاعههه ومشاكلهه
ماما:-افهمني يافتحي والله كنت مضطرة ندير الشي هذا وكنت نحساب روحي اندير في الشي الصحح ونا صدقني معش هنوريهه وجهي مرة ثانية
فتحي:-بعد شنو ياامينة بعد قعدت سمعتنا على كل اللسان تي انا كان ماجيتش ولحقت وشفت بعيوني الي شفتهه لو زادت الدوهه عليك وعلى بناتك العيب مش عليكن العيب على ولدك الراجل هذا
ماما:-محمد مش شورهه في شي ومش ذنبهه حتى هو انا كلهه منيي
فتحي:-مافيش شي يقدر يصلح توا خلاص نحن رحنا فيها
جدتي:-شن في كنكم
فتحي:-شي خلاص ياامي ردي ارقدي انتي غير نحكي انا وامينة
جدتي:-تحكوا بااصوات عالية ناوضتوني من النوم احكي شن في
فتحي:-امي خلاص خشي ارقدي ونحن نوعدوك توا نحكولك بكرا
جدتي:-انشالله ياوليدي
خشت جدتي رقدت
ماما:-فتحي
فتحي:-خلاص ياامينة وقت نهدهه نحكوا خلاص
انا:-بس خالو نبيك انا نبي نحكي معاك
فتحي:-ماعندي شي نحكي يانوران
انا:-عشان خاطري بس كلمتين
فتحي:-ديرلنا شاهي وتعالي في البلكوني وانتي ياامينة
ماما:-حاضر خلاص انتي عدي مع خالك ونا ندير شاهي
انا:-حاضرين
خشيت انا وخالي للبلكوني وقعمزنا
انا:-خالو ماما والله مالها ذنب هيا كانت بس تبي ادس الموضوع بلكي تنستر وربي يهديهه
فتحي:-هذا ربي مايهديش يانوران من اول ماجاء الاختي جاء راقد ريح ماعندهه شي وكذب علينا وقال يشتغل في محل وعنده شهادة ونحن الهبلل صدقناهه وبعد عطيناهه بنتنا وجاباتك انتي ورنا ومحمد عرفناهه انه كذاب مفروض من يومها سحبنا بنتنا لكن نحن الهبل قلنا بلكي يسقم وعادي وباتي عطاهه فرصة وجاء يترجهه فينا وردينالهه بنتنا ويشهد الله من اليوم هذك لعند توا ماسمعت شي عليهه لكن كانت الصدمهه الكبرهه هنا نحن وثقنا فيه وبالعكس قعدنا نبوا نطوروهه ونغيروهه لكن مافيش فايدهه قلنا خلوهه بلكي يتغير بروحه وربي يهديهه قعد الحال وتطور للاسوء شوفت عيونك
انا قعدت نبكي بحرقهه
فتحي:-خلاص يانوران بوكم مايستحقش حتى دمعهه وانشالله اندير حل معاهه ونخليهه يطلق اختي وتعيشوا هنا
انا:-انت ياخالي ماتعرفش بابا والله ماتعرفه
فتحي:-لا هو الي مايعرفنيش وراسك
جت امينة وجايبه الشاهي
انا:-ماما بنخش نرقد بكرا وراية جامعة
ماما:-باهي تصبحي على خير
انا:-وانتي من اهله ياقلبي
خشيت للدار لقيت البنات واخضت ايباد خالتي الي اجوزت وسيباتهه وقعدات عليه فتحات نت
انا:-شن عندكن ايميلات انتن
رنا:-اها عندي انا
انا:-باهي انا بنرقد وخلاص ماطولنش واجد عليه خشن تمرقدن
رنا:-اسكتي وراس امك خلينا ماصدقنا تفكينا من بابا
انا:-اوففف
  
____________
  
في حوشنا
جاء محمد لقا الدنيا مسوكتهه
محمد:-باتي
بابا:-هاااا
محمد:-بسم الله كنك
بابا:-خالك $#$#$$انا نربيه توا يشوف
محمد:-تي غير اهداء وين ماشي شن صاير
بابا:-سيبني خير مانفش غلي فيك
محمد:-ياباتي ازفف قولي وين ماشي
بابا:-سيبني ياخريهه
محمد:-باتي انت مش بوعيك بكل انت عارف خش ارقد وبكرا نمشي انا وياك
بابا:-تسيبني ولا نكبر قطيعتك
محمد:-تيييييييي خلااصصصصصص تي شنو هالمعيشة الي عايشها معاك هذي تي مليت منككك والله مليت تي عذبتنا كرهتنا في عيشتنا وتفضل عدي وين ماتبي تعدي لكن تأكد انه خالي كان خضا امي وكبرت راسك اقسم بالله مافي اعند منه وعدي جرب كان بتجرب
بابا:-راسي يفتل
محمد:-باهي تعال خشي معايا السرير ارقد
بابا:-سيبني ياقليل الادب امشي تمرقد
خش بابا ومحمد خش سكر الباب بالقوة وقعمز وحط ايديهه على راسهه
 
_____________
 
الصبح
الساعة 8:30
انا نضت نشيطة ونفس الوقت راقيلي طلعت دبشي ولبست وخضيت نقالي وطلعت لقيت خالي يفطر
انا:-هيا ياخالي
فتحي:-خلاص ياخالو انتي استنيني شويا ونطلع ولا نقولك تعالي كولي معايا
انا:-لالا ماعنديش نية انا نستنا فيك برا
فتحي:-تم
انا  نزلت لوطة لبست كويشي وقعمزت على صالون نستنا في خالي
ماما:-صباح الخير
انا ابتسمت:-صباح النور ياقلبي
ماما:-فطرتي!!
انا:-والله لو عندي نية راهو كليت لا لا مافكرتش ماعنديش نية
ماما ابتسمت:-باهي حبيبتي انا بنرد نرقد تبي شي نعطيهه لك
انا:-نبي سلامتك ياقلبي
ماما:-نقصاتك فلوس
انا:-نقصاتني عيونكك خلاص بطلي زعل
ماما:-لالا مش زعلانة انا الحمدالله
وخشت ماما
فتحي:-هيا يانوران
انا:-بنشوف ماما خمس دقايق
فتحي:-هيا اكلعي لا ماما لا شي توا نحكي معاها انا
انا:-باهي تمام
طلعت انا وياهه
  
______________
  عند عمر
نعيمة:-ماشي اليوم عندك محاضرة
عمر:-اها محاضرة ضرورية بكلل الطلاب يستنو فيا انتي تبي حاجة
نعيمة:-سلامتك يانور عيوني
عمر:-خلاص انا ماشي
نعيمة:-تمام معسلامة
عمر:-سلام
طلع عمر لقا عجلته مفلوقة
عمر:-كان نعرفهه من يفلق في العجلة هذا تي اقسم بالله نقتله قتل
رد عمر للحوش
عمر:-امي وين مفاتيح سيارتك
نعيمة:-قعدت على مكتبة عليش!!
عمر:-لقيت العجلهه فالقينها ليا اخرهه
نعيمة:-من السخيف هذا
عمر:-توا انا كولت على محاضرة خلاص اوكي
نعيمة:-باي باي ياعمري
طلع عمر ومشا بسيارة امهه.
  
___________
 
عندنا في حوش جكي
مقعمزة ندى تفكر
ندى:-زعمك العبيط حسن صدق روحهه 😂توا يدلي كيف الكلب خليهه بس كيف بيردلي وهنا كسرلي نقالي اكيده هيجيني بكرا في المدرسة يارب يجي بس وجهي عادي شنو ماهذك اليوم شافني ماعدلش
بيسان:-انتي ف وراك حاجة لما نلقاك مقعمزة هل تقعميزة قلبي ينغزني منك
ندى:-شنو انتي راهو تكوني امي وناسية !!شن دخلك بيا انتي تي حتى ماما ماخشت فيا عليك لصق
بيسان:-باهي ياندى غير يفكوني عليك بس نوريك النجوم في عز الظهر
 
___________
وصلت للجامعة
لقيت صحبتي غالية
غالية:-هاي ياقلبي
انا:-هايات ياعمري
غالية:-شنو يانوران مانشوفكش الا في الجامعة لا نتصلوا بيك لا شي
انا:-الله غالب ياقلبي
غالية:-تعالي نحكيلك على جيران خالتي هنية 😂😂على فكرهه امس قلتلهم نفس عائلة نوران الي تحكي عليهم 😂
انا:-شن حكتلكم
غالية:-ياحنة قالت انه بوهم سكار ويجيهم عقاب الليل والله ينزل فيهم ضرب اصلا الحوش يبدا اعياطات قالتلك امس مش وين حلووا 😂😂
انا قلبي قعد يدق بسرعة
غالية:-تعرفيهم!!
انا:-اه شنو تحكي انتي لا مانعرفهم يابتي 😂💔
غالية:-وووههه عليك ناس عليك بوهم وقحح
انا:-خلاص غيري الموضوع انا بنعدي
غالية:-تي وين ماشية مازلت ماشبعت منك ياتيسة
انا:-خلاص توا انتلاقوا عندي شي مهم شويا ونجيك 😍💔
غالية:-خلاص تم
مشيت ونا خلاص نبي نبكي وماسكة دمعتي بالسيف
قابلني ولد معانهه في الجامعة
فرج:-حي يانوران كنك !!
انا:-لا شي
فرج:-لا فيك حاجة اهو الدمعوع بينزلن 😊
انا:-لا غير عيوني رايحات يتأثرن من الجو هذا
فرج:-اها باهي وين ماشية
انا:-عندي شيتات بنجيبهن
فرج:-باهي عادي نمشوا للكافي بعدها
انا:-لا بعد المحاضرة هنمشوا ان شاء الله 😊
فرج:-تم
انا مشيت
عمر:-ههههه انت حقير على فكرهه ياهاني راكك
هاني:-تي سكر فمك ياراجل شوف الطرف الي جايهه توا 😂😍
احمد:-عليك حليب البنت
هاني:-جبنة حي على امك
عمر بحت
انا:-السلام عليكم
الشباب:-وعليكم السلام
انا:-ممكن نبي الشيتات الي نزلن الدكتور ..........
احمد:-امس ولا
انا:-اها
احمد:-باهي استنيني شويا
قعمزي تفضلي
هاني:-السلام عليكم
انا:-وعليكم السلام
هاني:-شنجوك
انا:-تمام الحمدالله فيني نخدمك!!
هاني:-لا سلامتك ياسمحة منورهه
انا:-اها بهه
انا لقتت وجهي لقيت عمر مقعمز
بحتت فيه زين
انا:-انت دكتور في الجامعة ولا
عمر مابش يرد ماسمعنيش
انا:-نحكي معاك معليش
عمر:-نعم معليش كنت شارد تفضلي ؟!
انا:-انت دكتور في الجامعة
عمر:-اها ان شاء الله فيني نخدمك في حاجة
انا:-لالا بس انت مار عليا
عمر ابتسم:-بس انا عمري ماشفتك
انا:-اها يمكن لكن انا شايفتك متأكدة
عمر:-باهي فرصة سعيدة
انا:-بيك اسعد
احمد:-اخر شيت الدكتور مانزلش
انا:-اها هو قالها لنا المهم انه شيتات امس كلهن قعدات
احمد:-اها خلال عشر دقايق تعالي وخوضي الشيت الجديد
انا:-عندي محاضرة شويا اخرهه
احمد:-كم المحاضرة
انا:-ساعتين
احمد:-تعالي في اي وقت انا متواجد
انا:-تمام
هاني:-وين ماشيا
انا:-ههه ماشيا للمحاضرة
هاني:-نبي رقمك باهي لأنه بجد عجبتيني !
انا ابتسمت -ماعنديش شفرة
عمر:-فكني من السخفات تفضلي امشي
مشيت انا
انا:-شن يحساب روحهه هذا شايف روحهه قالي امشي بلكي يحساب روحهه ميتهه عليهه صاحبهه هو الي يجري في جرتي مغرورر

عمر:-فكني من العباطة والحركات الي ادير فيهن راهو خيرلك
هاني:-خلاص ياباردد ازحح الواحد مايغلكش يعني غلطنا ومعش هنعودوها اصلا البنت شكلها نعجبت بيا
عمر:-هانييي
هاني:-باهي باهي
مشا هاني
عمر:-هالمراهق تعبت معاهه اقسم بالله انا ماشي سلام
احمد:-عمر وين ماشي لا حول الله حتى هاني شن دار وهو ماسكلنا دور الاب هنا
طلع عمر
غالية:-السلام عليكم يادكتور
عمر:-وعليكم السلام
غالية:-انا نعرف انك تعطي في اختي
عمر:-من اختك !!
غالية:-اسمها ثريا
عمر:-اها
غالية:-كويسة هيا
عمر:-والله الله واعلم بس عمري يعني مااختبرتهم
غالية:-هيا الحق مش شاطرهه بكل يادكتور ولها كم سنة وهيا تعاود تعبنا
عمر:-باهي تمام ان شاء الله هتقوا ماتشيلوش همم انشالله خير
غالية:-شكرا يادكتور بكل
عمر:-ولو
جاء بيعدي
غالية:-دكتور اسمعع
عمر:-تفضلي
غالية:-ايميلك ممكن
عمر:-تلقي عند ثريا اختك
غالية:-تمام شكرا
عدهه عمر
غالية:-عليك مغرورر مايبيش حتى يقولي عفوا يرد عليا يقدرني ولا حتى شكله يبي يعطيني ايميله ساهلة نعرف كيف نطيحه
  
_____
عندي انا
انا:-الدكتور طول بكلل ولا انا تهيالي
اسراء:-استني توا يجي
انا:-لالا شكله لا
اسراء:-تي وين بتمشي
انا:-بنطلع نشم هواء شويا
اسراء:-وكان جاء هو مايحبش حد يطلع من بعدهه
انا:-مش هيحي ماتسكنيش انا بنطلع
اسراء:-تمام براحتك
طلعت ومشيت طول شور الكافي خضيت نسكافي وقعمزت
خش عمر للكافي
عمر:-السلام عليكم
صاحب الكافي:-وعليكم السلام
عمر:-مكياطة لو سمحت
صتحب الكافي:-تفضل تريح على بال ماجهزت يادكتور
عمر:-تمام
قعمز عمر
انا:-مش هذا الي دمهه ثقيل داير روحه مايعرفنيش عليك كذاب على اساس مش زارقهه عليه اناا ههها بارد
عمر برم الكرسي قطنلي
انا ابتسمت
انا:-اهلا يادكتور انت هنا
عمر:-اها
انا:-تعال قعمز تفضل نهدرزوا
عمر قرن حواجبه:-شن بنهدرزوا
انا:-لا شي قلت بلكي نهدرزوا هو كساد كساد
عمر قعمز ومابش يرد عليا
انا:-تهيالي ماندويش للساس
عمر:-شن مشكلتك انتي توا!!
انا:-لا مامشكلتي شي لكن لازم تدوي وترد على طلبة بإحترام لو تفهم في الاصول
عمر:-لو سمحتي تمشي ماتخلينيش ترقالي
انا:-شن بدير مثلا تبي تلزني من الجامعة مش هتقدر فاهمم ودير الي تبي اديره انا مش خايفة
عمر:-عارفة روحك زدتيها في قلت الادب
انا:-عارفة روحي ونعرف روحي في كل كلمة نحكي فيها وبكامل قوات عقلي
عمر:-انتي مش طبيعية
وقعمز على كرسي
انا:-انا الي مش طبيعية ولا انت يامغرور
عمر مابش يرد
طلعت ونا راقيلي ركبت فوق لقيت الدكتور قاعد
انا:-حي عليا شن بيخششني انا 😱خلي انجرب حظي بلكي اتخش
خشيت
انا:-السلام عليكم يادكتور
الدكتور:-برا هي
انا:-بس يادكتور
الدكتور:-انا ليا قوانين في الجامعة هذي وكل واحد يعرفني اكلعي هيا ماتعطليش عليا المحاضرة
انا قعدت نبكي وطلعني وسكر الباب
طلعت برا نبكي زاد اني مضايقة زاد ماانه لزوني وزيد يازايد حصلت هزيبة
قعمزت وقعدت نبكي
على جيت حد حط يده على كتفي
انا:-😳
....:-!!كنك
#يتبع