انثى

2

قالت ليو يابا انا بدور اكلمك قال ليها خير يا بنية قالت ليو من زمان بدور اوريك لكن خفت م توافق وتقول انا صغيرة وم بعرف مصلحتي بس هسي خلاص انا كبرت بس م كبرت عليك وعمري م ح أكبر عليك لكن انا وصلت مرحلة بعرف فيها الصح من الغلط قال ليها يا بنية خوفتيني خير في شنو قالت ليو لالا خير يا يابا بس انا بعد كدا بدور اعرس لكن انا م بدور اي زول عندي زولا محدد ومهما كان قرارك انا بحترمو لانو انت ادرى بمصلحتي.....ابوي قعد يضحك وقال ليها خبر السعد يا بنية علي ود حاج عبد الله زولا م هين راجل ود رجال ..سهى عاينت ليو باستغراب وقالت ليو بس يابا انا م خبرتك اسمو كيفن عرفتو؟! قال ليها يا بتي الراجل بطلبك من ابوك قبل كل شي وهو طلبك مني من زمان ودا السبب الخلاني اقيف ضد اخواني في موضوع عرسك عشانو هو علي يا بتي جاني من كان عمرك ١٤ سنة وقال لي يا عم مختار انا والله بتك ردتهااا من اول يوم شفتها فيو وعليك الله أمانة ما تديها لي غيري وانا طول م عايش بديها كل السعادة الفي يدي وبحاول اخليها تريدني وتجي تخبرك عني براها ومستحيل أاذيها بس انت م تديها لي غيري وشوف الزمن كفيل ح اثبت ليك وفعلا يا بتي طلع ود حلال وقدر كلمتو وياكي اليوم جيتيني براك وخبرتيني واصلا هو اداني خبر من امس وبكرة ح يجونا سهى حضنت ابوي شديييد وبقو ببكو الاتنين وعلي كبر في عين سهى وكبر زيادة في عين ابوي وفعلا تاني يوم من الصباح الخبر عند اعمامي كوولهم وجدي والحلة كلها وبدينا التجهيزات ابوي ضبح خروفين وناس امي ونسوان اعمامي وجيرانا كلهم ساعدونا وجهزنا اما سهى ومنى اليوم كلو في الغرفة ويتبسمن ويبكن منى قالت لي سهى يعني خلاص انتي ح تفوتيني واقعد بايرة براي م رضيانة انا ع الاقل كان يعرس لي اخووهوو اللمس داك شووفتي حليووني كيف😭 ..سهى: يعني دا انبراش ولا زعل افهم شنو... منى : م عارفة بس المووهم يخارجني من البيت دا م رضيانة كل يوم اصبح بي خلقتك الشينة دي ... سهى : كدي عايني لي في عيني وقولي لي هسي الشين فينا منو .. منى: كويس يا رمة عشان ضمنتي نفسك ..وبقو بضاحكو الاتنين من جانبنا هنا التجهيزات تمت والمغرب جا والضيوف وصلو واستقبلوهم ابوي واعمامي في حوش ناس جدو وقعدو مع بعض بتكلمو عم عبد الله قال لي ابوي والله يا حاج مختار زي م عارفين المفروض نحن جاين نطلب يد بتكم سهى لي ولدنا علي بس م عارف الحصل شنو وكلو خير ان شاء الله ودايرين نطلب بناتنا سهى ومنى لي اولادنا علي وعثمان على سنة الله ورسوله لو ما عندك مانع يا حاج مهدي عمي مهدي قال ليو والله انا م عندي مانع لكن الراي راي البنت ابوي قال ليو فعلا راي البنت عثمان قال ليو والله يا عم مهدي انا م مستعجل على اي شي اسألوها ولو م وافقت انا م عندي مشكلة وان شاء الله بسببي م يتخرب بيت سهى وعلي وان شاء الله يحصل خير 🖤 عمي مهدي طوالي قام على حيلو وجا اتكلم مع مرتو مها وامي ومروة مرت عمي محمد وطوالي مها فاتت لي ناس سهى ومنى وقالت لي منى يا بتي والله الحاصل كدا وكدا اها رايك شنو منى وسهى بقو بعاينو لبعض والدموع في عيونهم وقالت ليها البتشوفو انتو يا امي طوالي جا داخل عمي مهدي وقال ليها م ح نعرسو نحن انتي الح تعيشي معاهو موافقة ولا لا قالت ليو طيب يا يابا الفيو خير ربنا يقدمو طوالي عمي مهدي ومرتو طلعو سهى قالت لي منى سبحان الله ربنا استجاب حتى لهبالتنا شكلك ح تكوني معاي حتى في قبري لتيخة دي😒 قالت ليها والله شكلك انتي الم ناوية انو نفترق وان شاء الله م نفترق واتحاضنو وبتباكو من جهة عمي مهدي اداهم الموافقة ونحن اصلا م عندنا موضوع خطوبة وكلام زي دا طوالي مشو صلاة العشاء وعقدو ليهم وطوالي ضربو السلاح وتعالوا شوفو البيت بقى بيت عزاء بس والعجب انا وسهى سندي ح تمشي تخليني مع العذاب والمشاكل كملنا البكى كوولو وحددو العرس بعد شهر يعني في اجازتنا وفعلا كملنا الدراسة وكالعادة طلعت الأولى جا اسبوع العرس والتجهيزات بدت ياخ كان كمية من الخلق وجونا ناس من البندر " المدينة للناس الما عارفين معناها" أصحاب العرسان طبعا نحن اعراسنا تقليدية بسيطة يعني البهرجة وحفلات الزفاف م عندنا لكن بنعمل حنن ودلوكة لحدي العرس ينتهي ..جا اليوم المنتظر وبالنسبة لي اصعب يوم ح افارق الوحيدة البتدافع عني لمن بابا يكون ماف ح تخليني مع امي وقساوتها واختي ومهاتراتها ونقاشاتها وكذبها جا يوم العرس وطبعا الكل مبسوط والدلوكة شغالة والزغاريد والغنى والرقيص لحدي نهاية اليوم جهزو العروسات منى وسهى بالتوب الاحمر والعرسان جو وعملو ليهم الجرتق وجات لحظة الوداع وكانت اصعب لحظة بالنسبة لينا كلنا ابوي وعمي مهدي بكووو اول مرة اشوف ابوي ببكي سهى قالت لي يا احلى اخت اوع تزعلي وتشيلي في خاطرك يوم من امي وسجى في النهاية هم بحبوك ولمن تحسي نفسك زعلانة ومتضايقة تعالي لي انا قريبة منك م ح امشي بعيد وانا زاتي ح اجيك باستني في راسي وفاتت سهى فاتت وخلت البيت مسيخ العرس أنتهى وحياتنا رجعت زي اول وامي م اتغيرت لسة في حالها كل يوم بتضربني بسبب بتها من دون مبالغة انا بقيت بكرهها صاح ماف زول بكره امو لكن انا بقيت بكرهها من عمايلها نزلنا المدرسة سنة سادس ولسة مستواي التعليمي متقدم مع انو البيئة م مناسبة لكن انا م بهمل دروسي وبجتهد واصلا القراية دي المهرب الوحيد من عمايل امي اما سهى ومنى مبسوطين في بيوتهم وما شاء الله على رجالهم ان شاء الله حال كل البنات في يوم جو قيلو معانا وبعد رجعوا سمعت امي بتتكلم مع سجى قالت ليها ان شاء الله يجيك راجل زي اختك سهى وتعيشي هدية ورضية واما اختك الملعونة سمر دي ان شاء الله ربنا يلمها في راجل يوريها النجوم بالنهار واصلا انا منتظراها تتم سادس دي وبعرس ليها قراية شنو وكلام فاضي شنو انا لمن سمعت كلامها دا لمن جاتني لفة رأس نفسي اعرف امي دي لي بتكرهني عملت ليها شنو في الدنيا دي اليوم داك شلت الليل كلو بكى تاني يوم بعد المدرسة مشيت وريت سهى قالت لي انا بتكلم مع ابوي م تخافي وارجعي البيت عشان م تتاخري وتحصل ليك مشكلة وفعلا نهاية اليوم سهى جاتنا وكان ابوي يدابو جا من الحواشات انتظرتو استحمى وارتاح وفي الزمن دا قعدت اتونست معانا وقالت إنها حامل فرحنا ليهااااا شديييد لمن ابوي اتعشى جات قعدت تتكلم معاهووو قالت ليو يابا انا جاياك ف كلام قال ليها خير يا بنية قالت ليو والله يابا انت عارف امي قلبها حار وبتدور تشاكل لكن كمان تكون قاسية على بنتها انت عارف يابا سمر دي من زمان مستحملة قساوتها ولو ما انا وانت كان زمان طفشت بسببها والليلة جات شكت منها والله كدا م عدل يابا هسا لو اتكلمتا معاها انا تشيلو معاي عشان كدا كلمها انت لانو والله الموضوع زاد عن حدو قال ليها انا زاتي زهجت من عمايل امك دي وانا الليلة بقعدها في حدها وم عليك انتي امشي بيتك راجلك منتظرك... وفعلا سهى رجعت وابوي بعد رقدنا سمعت صوت نقاشو هو وامي وحتى طلع خلى الغرفة شكلو ح ينوم في الصالون قعدت ابكي لانو دا كلو حصل بسببي وخلاص قررت من الليلة م ح اشكي لي اي زول عشان م اخرب البيت احسن لي وللكل والله غالب...💔 وفعلا قضيت سادس كوولها وانا م حصل اشتكيت لي زول وكالعادة جيت الأولى وسهى دخلت في الشهر السادس خلاص بدت تجهز للولادة اول يوم في الاجازة صحيت بدري استحميت واتجهزت مشيت ل ابوي قلت ليو يابا الليلة ماشة معاك قال لي الليلة ماف طريقة اسوقك لانو شغلي كتيير وجاين ناس من البندر ما بقدر اخليك براك عشان كدا بسوقك بكرة ان شاء الله قلت ليو طيب رجعت الغرفة كالعادة طلعت لي قصة جديدة جابها لي يابا وقت فات البندر وقعدت اقرأ فيها وسجى نايمة وامي في العريشة بتعوس في الكسرة فجأة سمعنا صوت صواريخ حبوبة بتقول الليلة وووب يا جنى حشاي حرقت حشى امك الليلة وووب على من الجاتني فيكك يتمت امك وأولادك كررر علي من ولدي ...قمنا جارييين عشان نشوف الحاصل ويا ريتني ما مشيت💔...

اللهُم صبراً، اللهُم جبراً، اللهُم قوة 💙❤️

ابقو عافية🖤