انثى

12

#انثى-12
بقلم: سمر مختار

يوم جمعة وانا قاعدة في الغرفة كالعادة الباب دق قلت اتفضل طلع حسام قال لي ممكن من وقتك حبة قلت ليو دا احترام جديد ولا شنو قال لي اصلو الزول ما يترقى معاك قلت ليو انجز سريع مالك قال لي انجز كمان اتعلمتي سريع شغال يا حسام 😹 قلت ليو تربيتك لازم قال لي انسينا من الفارغة انتي م زهجانة ارح نطلع عازمك قلت ليو وين قال لي يعني نظام ح تعرفي لو كلمتك قومي اجهزي سريع 20 دقيقة بس مسافة أجهز القاك لبستي قلت ليو ظابط قال لي الحجة لو سمعتك ما عندي شغلة بيك براك اتعلمتي جدعتو بالمخدة الجمبي وقام جاري قلت شوف المجنون دا ودخلت اخدت حمام خفيف وطلعت لبست لي عباية سودا وطرحة سودا واسبورت اسود وجيت طالعة دقيت ليو غرفتو قال لي ادخلي قلت ليو هديني لبست قبالك قال لي لو انتي محمد ولد انا اعمل ليك شنو ارح اطلعي هو كان لابس بنطلون اسود وقميص كبدي واسبورت كبدي وساعة سودا والريحة ما تديك الدرب ياخ سمحةةة شديد وطبعا مع لونو داك حاجة كدا فظيعةقلت ليو حسام طالع حليييوني اديني من ريحتك دي اتريح قال لي عجبتك قلت ليو شدييد اداني اتريحت وطلعنا لقينا خالتو اماني وعشوش بحضرو في زي الوان قال ليهم والله انتو الهنود ما هم ضحكو قال ليها يمة ماشين شارع النيل وح نتغدا برا ما تنتظرونا قالت ليو اعملو حساب الطريق قال ليها ما ماشين بالموتر ماشين بالمواصلات عشان اوريها الشوارع قالت ليو طيب وطلعنا من البيت الوقت كان عصريات شديد الشوارع كانت ملانة ناس وصلنا الظلط قال لي على فكرة انتي عارفة نفسك قاعدة وين قلت ليو في مدني ضحك الاهبل قال لي وين في مدني قلت ليو انا عارفة ليك قال لي يا ستي نحن في اركويت عشان لو زول سألك قلت ليو والح يسألني منو انا م بعرف زول قال لي يعني ح تقعدي للأبد م بتعرفي زول اكييد ح تتأقلمي شوية شوية قلت ليو بحاول قال لي حنيين ماف حاجة اسمها بحاول انتي لازم تكسري كل الحواجز الجواك وتدخلي في الناس وانا بعمل الفي يدي كلو عشان اخليك تتأقلمي وبعلمك كل حاجة بعرفها قلت ليو طيب ان شاء الله 💕 جات عربية أشر ليها بيدو وقفت ركبنا والطريق كلو يوريني في الشوارع والله سمحةةة شديييد فجأة شفت المستشفى الكنت فيها قلت ليو حسووم مش دي المستشفى الكنت فيها قال لي ما شاء الله زاكرتك قوية ياها زاتها شوية كدا العربية وقفت نزلنا والحتة كانت ملانة عربات صفووف ومزدحمة بالناس حسام كان واقف جمب الشباك وأدى بتاع العربية قروش انا الجوطة والزحمة خوفتني صراحة لاني اول مرة ادخل أماكن عامة مسكتو من قميصو ضحك فيني ومسك يدي قال لي عارفك خايفة اطمني ماف حاجة ح تجيك يلا ده اسمو السوق الكبير والامجادات الواقفة دي بتوديك اي مكان اركويت مايو الدباغة بركات حبيب الله عووضة الزمالك الجزيرة مكي ..... دي كوولها واكتر ودا اسمو موقف أمجاد وبهناك الجهة التانية للسوق في موقف زي دا اسمو موقف حافلات ...يلا ارح عشان المغرب بإذن الحق الصلاة مشينا ركبنا أمجاد تانية واتحركنا يلا الامجاد فيها ٧ ركاب المووهم اتحركنا ووصلنا حتة كدا حسام قال ليو شارع النيل يا حبييب وسيد الامجاد وقف كالعادة حسام اداو القروش ومسك يدي قطعنا الظلط ماشين بي كرعينا والمكان حلوووو شدييد كلو اشجار والبحر مع المغرب شكلو حلووو وريحة الدعاش حلوة شديد والناس ماشة وجاية وفي القاعدين اتنين أتنين وفي القاعدين مجموعات ونسة وضحك وفي خالات ببيعو شاي وجبنة وفي خالات ببيعو تسالي وفول ومنقة بالشطة يعني حاجة كدا موووبالغةة حسام قال لي دا شارع النيل قلت ليو رهيييب لكن قال لي ولسة م شفتي حاجة دي بدايتو يداب ولو ما الواطة مغربت كان نزلنا تحت البحر قلت ليو كان نجي بدري يخخخ قال لي م مشكلة المرة الجاية ان شاء الله قلت ليو طيب قال لي نشتري شنو قلت ليو منقة 😋 ضحك وقال لي ارح نتغدا اول ونجي مسكنا شارع النيل طويل وطول الطريق البنات بعاينو لي حسام معاينة كدا مؤؤؤبالغة وهو م شغال بيهم بتونس معاي ساي😹 ماشين ونتونس لمن وصلنا نهاية شارع النيل كان في مطعم قال لي وصلنا احلى مطعم وبحب اكلو شددديييد وح تحبي انتي زاتك قلت ليو نشوف دخلنا وقال لي اقعدي هنا اطلب الاكل واجي مشى وقف في تربيزة كدا وكان بتكلم مع الولد القاعد فيها هو زاتو عامل زي حسام في اللبس والبرستييج سلم عليو سلام معرفة كدا و المووهم دفع القروش وجا قعد معاي في الطاولة وبقى بحكي لي عن مواقفو الفي المطعم دا قال لي مرة جيت مع فردي الفي الجامعة أتنين احمد ووليد وكنا قاعدين في الطاولة دي زاتها وكان في قصادنا ولد وبت شكلهم بحبو بعض وهو بتزهج فيها ولمن بضرب ليها التربيزة بي يدو وهي العويرة بتبكي يلا احمد دا بتاع تشغيلات ومما دخلنا المطعم بعاين للبت عجبتو وقال لينا لازم اخرب بيناتهم وقف مشى عليهم بي كل ثقة وقال ليو لو سمحت يا انت الولد أتلفت عليو قال ليو انا بعاين ليك من قبيل وانت بتتزهج في حبيبتي الولد قال ليو حبيبتك؟ والبت رفعت رأسها وبتعاين ليو مستغربة قال ليو اي حبيبتي وهي اصلا قالت لي م دايراك وانت خانقها في الطالعة والنازلة وتعبت منك عشان كدا جات الليلة تنهي البيناتكم وانا ح ادخل حياتها الولد م رد على احمد واتلفت على حبيبتو قال ليها وصلتي للدرجة دي خلاص انا ح اسهل ليك الطريق والبيناتنا انتهى وقام مشى والبت خلاص حيلها أنتهى ضربت احمد كف وقامت فاتت ونحن بنضحك فيو بي دموعنا جا قال لينا لو ما بقت حقتي ما ابقى احمد وواصل اكل عادي والله اليوم دا ضحكنا فيو ضحك وماسكنها ليو زلة لي اسي مع انو نفذ كلامو وحاليا هي حبيبتو بس برضو منظر الكف كان وهمي كيف..انا ضحكت ضحك 😹 ..ونحن بنتونس جابو الاكل قال لي يلا بسم الله اتغدينا وجاب لينا عصير منقة بااارد م قدرت اكمل حقي لانو بطني اتملت قال لي يا زولة دي قروشي اوع تخليها لي هنا بالغصب شربني ليو كلو الرمة بعدها رجعنا شارع النيل قال لي تعالي دقيقة ومشينا على راجل كدا كان بعمل في حاجة شكلها حلاوة بمبية كبييرة اشترى لي واحدة قال لي دي غزل البنات جربيها حتعجبك قلت ليو حسام انت خليت مساحة في بطني والله م بقدر قال لي يا زولة بعد اشتريتها تاني م برجعها ان شاء الله امسكيها في يدك قلت ليو غايتو انت شلتها منو وواصلنا مشي فجأة تلفونو اتصل رد مالك ي مان؟ اي انا في الكورنيش جاي مع منو؟ شفت البت الوهمية ديك اوع توريها ما ناقص انا ياخ اخلط منو معاي اختي اي يا زول م تكتر كلام افصل نفسك بعد تجي ظابط وقفل الخط قال لي اولاد حلال دا احمد قال جاي قلت ليو اهااااا بس انت قلت ليو معاي اختي وهو سلفا بكون عارف م عندك اخت صاح؟ قال لي فعلا هو عارف حاجة زي دي بس قلت ليو اننا اولاد ابو م كنا عارفين بيك الا بعد حنين اتوفت ابوي جابك وفرحنا بيك ..عارف الموضوع صعب وم بالسهولة دي ممكن نتجأوزو بس لازم وبكل الطرق قلت ليو يعني انا ح اوصل كدا باقي حياتي كذب قال لي مرات بنجبر اننا نكذب وعشان كدا لازم تواصلي واكسري كل الحواجز الممكن تمنعك من مواصلة حياتك حتى لو كانوا أشخاص قلت ليو ح تكون معاي ؟ انا م بقدر أواصل براي ح تدعمني قال لي طول ما انا عايش وفيني نفس ح اكون جمبك من كل النواحي وفي كل الظروف انا ما صدقت ربنا عوضني بيك ف عشان كدا مستحيل افرط فيك عيوني اتملت دموع قال لي بس بسبب دموعك دي ح نختلف يلا بطلي الشي البتعملي فيو دا ..تاني جاو اتصال رد اها ي مان جمب وين انت ...هو بتكلم وانا سرحت يعني والله يجماعة شفتو عوض ربنا دا سمح كيف شفتو ربنا عادل كيف ربنا لمن يبتليك بي حاجة عارف انك قدرها وح تقدر تتجاوزها يعني منو الكان بتخيل انو انا ممكن اصل للمرحلة دي مريت بكل الظروف و الابتلاءات الحصلت معاي خلتني ضعيفة وفقدت الامل والرغبة في كل شي حتى في الحياة بس ربنا رجع وزرع فيني الامل عشان كدا لمن اقول ليكم ربنا يمهل ولا يهمل يبقى لازم نصبر💕..قطع سرحتي حسام وهو بتكلم معاي قال لي احمد وصل قلت ليو وينو قبل ما يرد لي جا شاب علينا طويل ولونو قمحي افتح مني واغمض من حسام لابس بنطلون اسود وفنيلة نص كم بالرمادي ولابس كاب (طاقية) بالمقلوب وشحاطة وكان شايل جيتار في يدو ضرب حسام في كتفو قال ليو شنو ياااا سلم عليو ومد لي يدو قال لي كيفك قلت ليو اهلييين حسام قال ليو دي حنين اختي احمد قال لينا مالكم واقفين ارح نقعد مشينا تحت شجرة كدا كان فيها قعدات مبنية ومعمولة بطريقة حلوة قعدنا احمد وحسام بتونسو ساي وانا بعاين ليهم احمد قال أسمع انت متأكد انو دي اختك قال ليو انت شايف شنو احمد قال ليو شايف فرق كبير هي هادية شديد م زيك حسام ضحك وقال ليو ما تحكم يا زول انت ما عارف حاجة عاينت ليو قلت ليو قصدك شنو قال ليو شايف شايف اخير اسكت وضحكنا حسام قال ليو يا زول ما تفتح بتاعك دا وابدا لينا قال ليو اصبر الجماعة يصلو قال ليو بس ما تقول لي كلمت البت الوهمية ديك قال ليو يا زول ما كلمتها وانت مالك معاها حسام قال ليو احسن اسكت عشان م نتشاكل😒أحمد عاين لي يدي وقال لي يا زولة انتي بتخجلي ولا شنو اكلي حجاتك قلت ليو ما نفسي قال لي طيب جيبيها انا نفسي وشالها مني حسام قال ليو ما بتقصر انت وضحكنا شوية كدا جا واحد تاني معاو بتين الولد كان لابس ترينق رمادي وفنيلة نص كم بالرمادي برضو ولونو قريب لي لون احمد وطويل برضو والبنات لابسات عبايات واحدة رمادية وواحدة سودا سلمو علينا حسام قال ليهم يجماعة دي اختي حنين وديل وليد وانسام ورحمة دفعتنا في الجامعة احمد قال ليهم دقيقة يا جماعة الليلة اليوم العالمي للرمادي والاسود ولا شنو كلهم عاينو لي بعض وبضحكو انسام قالت ليهم كالعادة حسام خارب الرصة بي كبديهو دا حسام قال ليهم ما علينا يخخخ يا احمد ابدا نحن من قبيل منتظرين احمد قال ليو خلاص يخخخ اعصابك اعصابك وفكو الضحكة 😹 احمد طلع الجيتار وبدأ يعزف ويغني....

حبيتكك ونسيت الكلام ..أاه ونسيت الكلام حبيتكك ونسييت الكلام ....ناديت ليك صوت الغمام. انا مع صوت الغمام ..حميتني الراحة والمنام الراحة والمنام حميتني الراحة والمنام يا كل مناي كل المرام💕🎶

صوتو كان حلو شديد واصحابو بشيلو معاو في الغنية الجو كان حلو شديد وحتى كمان جزؤؤ من الناس جات قعدت معانا حرفيا انا اندمجت معاهم ونسيت كل شي في اللحظة دي وفجأة سمعت صوت حسام بغني بقيت بعاين ليو بدهشة المقطع كان بقول ..

اخترتك لي قلبي الحبيييب..اااه لي قلبي الحبيييب 💕
لقيتككك من دم وقررييب..اه من دمووو قريييب 🎶
دا انت لجروحي طبييب ايييي لجروحي طبييب ...دا انت لجروحي طبييب من بيير هواكك دايما شريب من بيير هواكك...من بير هواككك دايما شريب🎶💕

يلا بعد المقطع دا احمد قال ليو بييير لكن هو ما بيير لكن وكلهم ضحكووو😹💕💕 المووهم كان يوم اكتر من خووورافي كانت قعدة حلوة وما حسينا بالزمن حسام قال لي يلا ارح عشان الحجة دي بتكون صاحية ومنتظرانا ودعناهم احمد قال لي ما تقيفي مننا يخخخ تعالي مع المان دا طوالي حسام قال ليو قايلا ما عندها شغلة قلت ليو يعني انتو ما عندكم شغلة؟ احمد قال لي انتي زولتي صدقي وضحكنا حسام قال لي يلا عشان لو تابعنا احمد دا لي بكرة م ح نرجع ومسك يدي واتحركنا من جنبهم قال لي الزمن أتأخر عشان كدا ح نركب ركشة وقفها وأتفق معاو واتحركنا كدا تلفونو اتصل رد ايوووا يا حجة اي نحن في الطريق سلام قال لي شووفتي ما قلت ليك بتكون منتظرانا قلت ليو نحن فعلا اتأخرنا وم حسينا بالزمن قال لي انا لو علي بقعد لي بكرة بس عشان انتي معاي قلت ليو انا م متعودهه على السهر قال لي عارفك زي الجدادة بتنومي بدري قلت ليو انننن ثقيل😒 وصلنا البيت وفعلا لقينا خالتو اماني في الباب ضحكنا فيها قالت لي تابعتي لي حسام دا غايتو الله يعيني حسام قال ليها هيي انا مالي يا حجة قالت ليو تحج في شنو اقول ليك شايفني كبيرة قلت ليو فعلا غلطان يا حسكووو اسي واحدة زي دي في عمر الزهور بتقول عليها حجة قال لي زهور ولا ابتسام وضحكنا قالت لينا اها يومكم كيف قلت ليها تعالي احكي ليك حسام قال لينا انا تعبان وبسبب بتك ما صليت لا مغرب ولا عشاء مع السلامة وطلع غرفتو وانا قعدت مع خالتو اماني وحكييت ليها كانت بتعاين لي بلهفة قالت لي طالما المشوار عجبك تاني اطلعي معاو كل جمعة قلت ليها المرة الجاية معانا قالت لي ان شاء الله يلا امشي صلي وارتاحي لي بكرة قلت ليها عمو ماهر وين قالت لي جا من الشغل وطلع لي واحد عندو حجات يوديها ليو ويجي قلت ليها اهااا طيب طلعت الغرفة ودخلت استحميت واتوضيت طلعت صليت و دعيت ربنا وشكرتو على النعمة الاداني ليها ورقدت اول مرة ارقد وبالي مرتاح واول مرة اعرف جانب حسام التاني بالجد حنين كانت محظوظة انو عندها أخ زي حسام نمت وانا بفكر في اليوم وتفاصيلو....💕

#اقتباسههه

*ثُم ماذا😴🎼💞ثم إن العثرات التي تصيبك🙁🖤 لا تجعل منك ضعيفا إلا إن أردت أن تكون ضعيفا 😴🔕🎼،و إن القلب يزهر كل مرة دون إلتزام الفصول🙂💓💙✨ ، إنك اقوى من أن تضعف💙💗، كما أن هناك سعادة محفوظة العلالي💕🔕 لأجلك فلا تضعف ولا تيأس ودع قلبك يزهر أملاً 💚🌸🍃💙لا تضعف*

#كسسرهه

حرفيا الجزء دا كتبتو بي مزاج حلوووووو شدييييد وكنت مبسوووطةةة شددييد وانا بكتب فيو 💕

ابقو عافية 🖤