انثى

7

#انثى7
بقلم: سمر مختار

انا صحيت من النوم ولقيت نفسي براي ف الغرفة ودايرة ادخل الحمام وم قادرة انزل وما عارفاهو بي وين اصلا بقيت بحاول اقوم قعدت في نص السرير جمعت راسي شوية وبحاول انزل سمعت صوت فتحة الباب رفعت راسي لقيتها ام الولد الضربني قالت لي ماشة وين يا بتي الحمام ؟! هزيت ليها راسي بمعني اي قالت لي ارح سندتني وبقيت ماشة شوية شوية لحدي ما وصلنا الحمام وطبعا كان جوا الغرفة قالت لي هدا الحمام بتقدري تخشي براك هزيت ليها راسي بمعني اي قالت لي اعملي حسابك ما تنزلقي في السيراميك مفهمتها بس ابتسمت ليها وفتحت لي الباب دخلت الحمام بقيت بعاين فيو ساي ما فاهمة فيو شي شكلها فهمتني دخلت ووصفت لي بستعملوا كيف وطلعت قالت لي بقفلك بي برا بعد تخلصي دقي لي الباب وقفلت الباب ...طبعا انا جسمي كلو مكسر وتقييل عشان كدا قلت احسن استحم فتحت الموية وبديت استحم فجأة اتزكرت الواقع الأنا عايشة فيو واتذكرت الحصل معاي واتزكرت اني مغتصبة...💔 حسيت بي نفسي وسخانة ولازم انضف نفسي بقيت ببكي انهرت بالبكاء لمن صوتي بقى مسموع فجأة باب الحمام دق وسمعت صوت المرة بتقول لي انتي كويسة خلاص خلصتي هاك البسي الهدوم دي وفتحت الباب مدتهم لي بالجمبة شلتهم منها وغسلت وشي لبستهم اتوضيت وطلعت كانت بجامة بمبية مرسومة فيها وردة رمادية المرة قالت لي انتي كويسة هزيت ليها راسي بمعني اي لكن عيوني بتقول عكس كدا انا اصلا عيوني كبار واسعات وكحيلة يعني اقل دمعة تنزل بتظهر فيهم وانا كنت ببكي قالت لي خلاص ارقدي النمشي اجيب ليك حاجة تاكليها بس انا دايرة اصلي وما عارفة اوصلها ليها كيف لانو لساني لسة تقييل حاولت اتكلم قلت ليها بعد تعب ص......ل...ا.ة المرة ابتسمت قالت لي دايرة تصلي هزيت ليها راسي بمعني اي مشت فتحت حاجة كدا مربعة من خشب عاملة زي الدولاب بس صغيروني طلعت مصلاية فرشتها لي وادتني توب شكلو دا حقها قالت لي صلي انا ماشة تحت وجاية وطلعت فاتت صليت ركعتين لاني بالجد محتاجة لي ربنا محتاجة افضفض وارتاح من الصراع الجواي بديت ادعي من جوا قلبي وببكي المرة جات راجعة لقتني ببكي ما قدرت أمسك دموعي وواصلت بكى جات رفعتني من المصلاية ورقدتني في السرير وراسي في كرعيها قالت لي يا بتي ابكي لو البكى بريحك اصلي ما بمنعك البكى ابكي وارتاحي ما تخلي شي ف قلبك وفعلا بكيت لحدي ما نمت صحيت من النوم ولقيت نفسي في نفس الرقدة قالت لي صحيتي يلا قومي عشان انا جعانة شدييد من قبيل منتظراك تصحي قومي غسلي وشك وتعالي عشان الظهر قرب قلت ليها شكرا ليك يا خالتو ما عارفة اقول ليك شنو بس بالجد شكرا ليك... صراحة ما عارفة صوتي طلع كيف انا زاتي اتفاجأت من نفسي المرة زغردت عديل فاجاتني والله عاد المرة طيبانة طيبة ان شاء الله حال امهاتكم كلكم قالت لي حمد الله على السلامة الممرضة جات تشوف لانها سمعت صوت الزغاريد عرفت اني اتكلمت مشت ورت الدكتور الدكتور جا داخل وقال لينا حمد الله على السلامة اتوقعتك تتكلمي بعد يومين بس ما شاء الله الحمد لله انك طلعتي منها وان شاء الله اجر وعافية بعدا ممكن تمشي البيت عادي بعدها طلع وانا قمت دخلت الحمام غسلت وشي واتسوكت وجيت طالعة لقيت الولد الضربني قاعد مع امو ومعاهم راجل اسمراني عيونو كبار زي عيوني شفت فيو ابوي قال لي حمد الله على السلامة قلت ليو تسلم اما الولد بعاين لي ساي وعيونو مرقرة زي الداير يبكي طوالي قام طلع من الغرفة المرة قالت لي تعالي يلا عشان نفطر قلت ليها بس.... قاطعتني قالت لي من قبيل منتظراك يعني ح اطلع خسرانة في النهاية الراجل قال لي وبعدين انتي يداب قايمة من مرض ولازم تاكلي م حبيت احرجهم قعدت اكلت شوية بس قالوا لي مالك قلت ليهم والله م عندي نفس بعد اجوع باكل الراجل قال ليها خلاص يا اماني ما تغصبيها خليها براحتها العيان نفسو بتكون مقفولة فعلا قالت ليو سمح انت وبتك اصلكم كدا فجأة الجو اتكهرب وكلهم سكتو طوالي الراجل قام قال لينا انا بستأذن ماشي الشغل بتاخر وطلع فات المرة قالت لي انا طالعة دايرة حاجة قلت ليها لالا سلامتك بس انا بعدا لازم امشي البلد قالت لي انتي لسة عيانة م قمتي زي الناس قلت ليها بس انا ماشة وبتكلم الحمد لله عشان كدا لازم امشي قالت لي كدي خلي الموضوع دا اسي بعد يجي ماهر وحسام قلت ليها ديل منو قالت لي عمك ماهر الكان هنا اسي دا راجلي وحسام ولدي الضربك اعفي ليو يا بتي م كان قاصد قلت ليها الغلط كان غلطي انا عشان كدا م مشكلة قالت لي خلاص انا بمشي وبجي وطلعت فاتت انا رقدت بفكر في تصرف المرة وردة فعلهم قلبي اكلني قلت اكيد حاصلة حاجة فجأة بقيت بفكر في شريط حياتي وقلت لازم ارجع البلد م عشان زول بس عشان منى وسهى والبحصل يحصل لازم ارجع في اقرب وقت ممكن وباقي اليوم دا بس حاسة نفسي نعسانة مع اني اخدت نومة قبل شوية م عارفة النعاس دا من شنو عشان كدا ح انوم عشان اقدر اسافر بعدين العصر كدا واستسلمت النوم...
من جانب الأسرة ماهر واماني وحسام ....
حسام قال ليهم يجماعة انا م قادر بشوف حنين في البت دي نفس التفاصيل سبحان الخالق ماهر قال حتى انا حاسي بنفس الشي اماني قالت انتو ما قعدتو معاها زي ما قعدت انا البت دي حتى طريقة كلامها زي حنين ربنا يرحمها وكتوومة شديد وموجوعة قبيل كانت بتحاول تدس وجعها بس م قدرت ولمن رقدت في حضني نفس الاحساس الكنت بحسو مع حنين سبحان الله حسام قال عرفتي مشكلتها شنو ؟! واسمها منو ؟! قالت ليو لالا والله البت بس قالت ماشة بلدهم الليلة قلت ليها خلي بعد انتو تجو ماهر قال تمشي كيف وهي عيانة حسام قال تمشي؟! بعد ما اتعودنا عليها وخصوصا انا بعد ربنا عوضنا بيها بدل حنين تاني تمشي اماني قالت بس البت م عارفة حاجة عن حنين وبعدين مصيرها تمشي اهلها بس م ح نخليها تمشي الليلة انت يا حسام خليك هنا معاها وانا ح ارجع البيت مع ابوك أجهز ليها غرفة حنين عشان ح يخرجوها بعدين وفاتو على كدا .....
انا كنت نايمة وبحلم بي ابوي قال لي يا بتي انا ما مرتاح قتلوني ومشو بي فوقي صحيت مخلوعة صرخت ابووي قعدت في نص السرير جاني الولد حسام قال لي حنين انتي كويسة بقيت بعاين ليو قلت ليو مووية قال لي طيب مشى جابها لي شربت قال لي خلاص كويسة قلت ليو اي قال لي متأكدة ابتسمت وقلت ليو اي قال سبحان الله قلت ليو نعم قال لي لو دايرة حاجة انا هنا مشى قعد في كرسي بعيد مني وانا رقدت بعاين للسقف اتذكرت الحلم وابوي كان قصدو شنو بي القالو لي يا ربي يكون قتلو بس الليهو مصلحة منو يقتلو اصلا انا وسهى من الاول م مقتنعين بالقصة القالوها ابوي مستحيل يهمل للدرجة دي وبعدين الحلم دا معناهو شنو معقولة بعد موت ابوي بي سنة وحاجة يجيني في الحلم ويقول لي قتلوني ومشو بي فوقي قاصد شنو بكلامو قطع تفكيري صوت الباب جات خالتو اماني وراجلها قالت لي صاحية يا بتي يلا قومي عشان نجهز نمشي الدكتور قال بعدا ممكن نمشي وخلصنا اجراءات الخروج قلت ليها نمشي وين انا راجعة الحلة م بقدر اقعد اكتر من كدا قالت لي بس انتي عيانة ويداب قايمة من غيبوبة احسن ارتاحي كم يوم معانا وبعدها الله كريم قلت ليها بس....قاطعني صوت حسام بس انتي لازم تسمعي الكلام قلت ليهم والله يجماعة انتو م قادرين تفهموني انا م بقدر اقعد وراي حجات كتيرة لازم اخلصها في ناس منتظراني وم عارفة لي درب وانا اصلا طلعتي من البيت كانت غلط لازم ارجع واصححها م تمنعوني قلت الكلام دا ودموعي في طرف عيني رد لي ابوهم والله يا بتي نحن م مانعنك وماف زول منعك ولا ح نمنعك وم عندنا حق نمنعك في النهاية القرار قرارك بس نحن طالبين منك ترتاحي ان شاء الله تلاتة أربعة يوم كملي علاجاتك فيهم وانا بوعدك اوديك لحدي بيتكم واسلمك لي ابوك في يدو طبعا مما قال ابوك دموعي نزلت اصلا كان في عبرة خانقاني قلت ليو ابوي الله يرحمو قال لي معليش ي بتي م قصدي والله ربنا يرحمو ويرحمنا من بعدو قلت ليو ااميين ومسحت دموعي طبعا حسام بكى معاي عديل وبعاين لي بي حنية قال لي اها يا بتي قلتي شنو الام قالت لي م تحرجينا يا بتي عاينت في عيونهم وشفت نفس نظرة الحنية الكانت في عين حسام ما حبيت احرجهم قلت ليهم طيب بقعد يومين بس قال لي م مشكلة راحتك أهم يلا انا ح انزل أجهز العربية انتو الحقوني حسام قال ليو انا ح انزل معاك وطلعوا خالتو اماني ادتني عباية قالت لي البسيها عشان نمشي شلتها منها ولبستها طلعت مقاسي والغريبة انو العباية م جديدة يعني مغسلة ومكوية بس شكلها طولت م اتلبست المهم لبستها وخالتو اماني لمت باقي الحجات الفي الغرفة وطلعنا ......

#كسرهه
يا جماعة التصويت ما بكلفكم حاجة على الأقل ادوني رايكم عشان اتحمس في كتابة الجزء البعدو💕

كل شيء زائل يا صديقـي
الغـرام , الشبـاب , الاصـدقاء ,كُل شيء
أنها قـصة عادية و كل شـيء يـمضي مع السنيـن ...!

ابقو عافية 🖤