نظر اليه العجوز..(هو انتا قضيتك شنو)..رد سعد بسرعة(م عندي قضية..)ثم صمت ونظر الى الارض(قالو تهريب بنقو..ولو داير الحق..لبسوها لي ساي)..رد العجوز(كل البجو هنا ي شاب بقولو نفس الكلام..م عندنا ذنب..بس بقضو سنين بتخلي الواحد يتلوي من الوجع)..ساله سعد(انا اسمي سعد..م وريتني اسمك ي حاج)..رد الحاج (اسمي بخيت سليمان..بس عمري كلو م حصل كنتا بخيت)..سأله سعد (وقضيتك شنو)..رد بخيت(انا كنتا تاجر عديل بتاجر في البنقو..قمتا في الدنيا وما لقيت غير اني اشتغل فيو..والقدر جاء واتقبضتا..وهندا ي وليد بدفع تمن العملتو).رد سعد(والله ي حاج اي زول وهمو...)واخذا في الحديث...
اما وليد فقد قرر ان يشتغل حتى يساعد اهله..في المساء اتصلت عليه ريم ...رد عليها(كيفك ي ريم)..ردت ريم..كانت غاضبة(م تمام..ي زفت انتا الحاصل ليك شنو)..رد وليد كان بارد المشاعر(مشغول والله)..ردت ريم(وليظ اوعى تكون بتحب واحد غيري)..رد وليد(احب شنو ياخ والله مشغوليات..نزلت اشتغلتا طلبة وكدا)..ردت ريم(طيب انا مشتاقة لي ونستك..مشتاق اطلع معاك)..سكت وليد ثم قال(ان شاء الله ربنا يهون ..جديدك شنو)..ردت ريم(جديدي اني بقيت كل يوم اشوف رسائلنا القديمة واقراها..مشتاقة ليك والله)..رد وليد وانا كمان..بس الظروف.
في الزنزانة كان سعد يتحدث مع الحاج بخيت..جاء عسكري..طلب من سعد الذهاب لمكتب مأمور السجن..ذهب سعد للمكتب..كان الضابط على مكتبه..يقف يجلس بالقرب منه شريف ادريس..رأى سعد ثن قال لسعد(السلام عليكم)
نظر سعد الى شريف..وجده على مكتب الضابط..واضعا رجله على الاخرى..جلس سعد على الكرسي..رد السلام..ثم خلف رجله على الاخرى ونظر الى شريف..طلب شريف من الضابط ان يتركه مع سعد لبعض الوقت..خرج الضابط بعد ان ترك شريف وسعد لوحدهما..نظر شريف الى سعد في إزدراء ثم قال له(تعرف..انا جيتي ليك دي م تقول فاضي شغلة..لا انا عندي اجتماعات كتيرة..بس جيت عشان اوريك حاجة)..نظر اليه سعد..(جاي تشمت صح)..ابتسم شريف في خبث(لا م للدرجة دي..جيت اوريك انو غباءك هو الوداك هنا..لو م قليت ادبك ونبذتا ولدي قدامي كنتا حتتحبس شهرين تلاتة..بس انتا قليت ادبك ونبذتني كمان..ويعني شنو لو شاغل بت فيها شي يعني)..نظر اليه سعد..صمت قليلا..وضع يده على رجله (الحرة تموت ولا ترضى في شرفا..اذا كنتا انتا عديم شرف..اكيد حتشوف الناس كلها م عندهم شرف زيك)..رد عليه شريف سريعا(وانتا لسع بتقل في ادبك)..تبسم سعد(عندكم البقول الحق قليل ادب)..رد شريف(عموما..انتا عامل فيها شهم عاين شهامتك ودتك وين..انا كم يوم كدة وحبقى وزير)
نهض سعد من كرسيه(وانا أأكد ليك م حتبقى شي..دعواتي فيك نافذة زي سهام الليل)..ثم خرج من المكتب.
جلس سعد مع العم بخيت في حوش السجن..سأله سعد(اسع ي حاج قضيت السنين دي هنا كيف)..رد الحاج بخيت(والله ي ولدي اول ايامك اليوم بمر عليك كأنو سنة..لكن تاني حتتعود)كانا يجلسان على الشجرة..وسعد ممسكا بورق الشجرة يلعب به..سأله سعد(غايتو البجي السجن دا لو م مذنب بحس انو مجرم)..تبسم الحاج بخيت(تعرف ي ولدي..الدنيا بتخدعك..بتسمحك ليك الطريق الشمال..بتسمح ليك الحرام)..رد سعد(كيف بتسمح ليك..ربنا أداك عقل ..اكيد حتعرف الحلال شنو من الحرام)..رد العم بخيت(انا هندا تاجرتا في المخدرات..كنتا بكسب اكتر من البكسبو المهندس والدكتور..كنتا سايق احسن عربية..عملتا جبل من الحرام..قروش م ليها حد..اتاريو الجبل كان ساسو هش وفي لحظة اتهدا فيني)..نظر اليه سعد (واهلك ي حاج)..رد الحاج وقد ذكره بأعز م لديه(هم ديل الخلوني اندم اني في يوم تاجرتا في الحرام دا..مرتي عرفت واقتنعت..م عندها خيار تاني..اولادي كنتا داسي الموضوع عنهم لمن عرفوا اني اتقبضتا..ولا كأني ابوهم..الصدمة خلتهم ينكروني ..خجلو مني..كانو كلهم متعلمين دكتور ومهندس وبت استاذة..كلهم خجلو من ابوهم)..سأله سعد (يعني اسع م مشتاق لي مرتك)..ضحك بخيت بأعلى صوته..استغرب سعد..اجابه بخيت(ي ولدي مرتي شنو البشتاق ليها..هو احلى شي في السجن انو فكاني منها..ياخ ماف شي بخليني اشتاق ليها لا سماحة لا اخلاق..ياخ شعرا بادي من نص راسا تقول عليها بيليه بتاع البرازيل..مكلوجة..كوراكة ولعلاعة وفقر هي زاتا)..ضحك سعد بأعلى صوته..اخذ نفسا ثم قال له(واللاعب الغاني دا المقعدك معاهو شنو)..رد بخيت(والله قسمة الاولاد بس).في الظهر....جاء وليد الى البيت..كان قد اشتغل طلبة في احد المنازل..كان يومه ب50 جنيها..كان يساعد بها اهله..اصبح وليد متوليا مسؤوليه البيت مع والدته..دخل البيت وجد والدته في المطبخ سلم عليها ..قالت له(بكرة الجمعة ي ولدي..بكرة مواعيد الزيارة..عايزة امش لي سعد)..رد وليد(اي والله بكرة زيارتو..خلاص نمش ليو..اطبخي ليو اكل ونودي ليو شوية حاجات)..ردت امه(اي حأعمل ليو كسرة بي تقلية..اصلا بحبها هو ..ربنا يهون حبسو والله)..رد وليد(سعد راجل ..بقدر على السجن..مدام هو ماش على الحق بستحمل انا عارفو كويس)..نظرت امه اليها قالت له(ربنا يصبرك انتا زاتك ي ولدي..مشى وخلاك)..رد وليد(هو براو الخلاني..ابوي وخلاني..م اول زول هو..المهم ماش انوم فترااان والله من الشغل).
يتبع....
