نزود التفاعل يا قوم دي وش السعد حبيبتي❤
نوفيلا #زوجتى_رغم_انفك
(1)
***
" يا حلو صبح يا حلو طل .. يا حلو صبح نهارنا فل "
كانت تلك النغمات تتردد فى الصباح فى احدى شقق المناطق الشعبية فى عروس البحر المتوسط مع حركات تلك الفتاة التى تنظف شقتها وتربط شعرها البنى الحريرى بوشاح يشبه لون عينيها البنيتان وبشرتها الخمرية ولا تعلم ان ذلك المشاغب جارها وزميلها " اياد " يتابعها منذ الصباح وهى تنظف .. انتبه على صوت والدته تقول وهى تلوى شفتيها
- ادخل ذاكر يا اياد وسيب البت " حلا " فى حالها .. ادخل ياخويا عايزينك تاخد البكالوريوس ونخلص كفاية السنة اللى قعدتها
حاول اياد ان يجعلها تخفض صوتها حتى لا تنتبه حلا وقال بخفوت
- حاضر يا ماما هدخل اذاكر بس سيبينى دلوقتى والنبى
انتبهت حلا على صوتهما وشهقت وهى ترى اياد امامها واغلقت النافذة بعنف فى وجهه فنظر هو لوالدته بضيق ولكن تحول ضيقه لسعادة عندما سمع صوتها تسلم على والدته بعدما ارتدت اسدالها وغطت شعرها
- صباح الخير يا طنط .. اسفة انى قفلت الشباك كدة بس مكنتش واخدة بالى ان اياد بيه متابعنى
قالتها وهى تنظر اليه بغضب فضحكت والدته وقالت
- ايه حملة النضافة دى يا حلا ؟ وراكى امتحانات يا حبيبتى
زفرت حلا ونظرت للشقة من حولها وقالت
- حسيت انى محتاجة تغيير للروتين وسط الامتحانات وكمان حضرتك عارفة ان المصيفين ربنا يسامحهم معظمهم بيسيبوا لى الشقة تضرب تقلب بعد ما موسم الصيف بيخلص
- ربنا يعينك يا حبيبتى ويوفقك وترجعى بيتك بالسلامة
- يااارب يا طنط ادعيلى اخلص السنادى على خير وارجع بلدنا بقى
- وهنهون عليكى تسيبينا يا حلا ؟
نطقها اياد بدون وعى دون مراعاة لوجود والدته التى تبسمت وانسحبت من بينهما لعلمها بوجود علاقة عاطفية تجمعهما منذ عامين ولم يؤثر عليها رسوب اياد ووجوده معها فى نفس الفرقة الدراسية ، دلفت والدته فقال اياد بتأثر
- مش عارف لما ترجعى بلدك بعد الدراسة انا هعمل ايه يا حلا
قالت حلا بمزاح لتكسر ذلك البؤس
- يا اياد يا اوفر ! انت بتتهرب من وعدك انك هتيجى تطلبنى من " جاسر" بعد البكالوريوس ؟
قال اياد بجدية وحزم
- لو قطعوا رقبتى مش هسيبك يا حلا
ضحكت حلا ونظرت لشقتها وقالت
- ما تبعتلى " خديجة " تنضف معايا واهو ننجز عشان عايزة اكل " جلاس" من ميامى
قال اياد غامزا
- اجى انضف معاك انا يا جميل وبلاش خديجة
اطلقت حلا ضحكة عالية وقالت
- لا بلاش انت .. ابعتلى خديجة بس حرام هتنضف معايا بعد طنط !
رفع حاجبيه وقال بمشاكسة
- ليه وانا مشبهش ولا ايه ؟
اطلقت ضحكة عالية مرة اخرى حتى دمعت عيناها وقالت
- هو من جهة تشبه ف انت تشبه بلد وهتشبهنى اكتر عشان انا بنوتة رقيقة لوحدى وانت شاب عازب لوحدك والشيطان شاطر يا باشا
ضحك اياد وقال
- احنا معانا خديجة يا بت مش لوحدنا
- هيهيهي ادخل ياض جوه وسيبى انضف
- هتنزلى النهاردة ولا وراكى مذاكرة ؟
زفرت ونظرت للشقة من حولها وقالت بتعب
- هناااااام يا اياد .. محتاجة اتقتل نوم
انتفض اياد متألما ونظر خلفه بغيظ وجد " خديجة" تضحك بشدة وقالت
- ادخل ذاكر ياخويا وكفاية نحنحة .. سيب البت تخلص وتذاكر .. يلا
دلف اياد وهو يغمغم بخفوت و استأنفت حلا عملها وسط ضحكات خديجة عليهما
***
فى احدى مدن الصعيد وتحديدا مدينة " الاقصر " التى تنتمى اليها حلا ، فى منزل يدل انه لكبير عائلة من العائلات .. يقف " جاسر البكرى " طبيب المخ والاعصاب صاحب الثلاثة وثلاثين ربيعا والقامة الطويلة والبشرة السمراء التى اكتسبها من مدينته والعيون البنى الفاتحة يلف عمامته على زيه الصعيدي وينزل للمجلس ليقف الجميع له باحترام ويجلس بجانبه شقيقه الاصغر " عمار " ويقول بصوت جهور باللهجة الصعيدية الفخمة التى يتحدث بها فى الاقصر فقط
- خير ؟
كلمة واحدة قالها جعلت الهمهات ترتفع من حوله والكثير من الرجال يتحدثون فنطق فيهم بعصبية قائلا
- واحد واحد يتكلم ويجولى ايه اللى حوصل ؟
نظر الجميع لبعضهم حتى نطق احد اعمامه قائلا
- عيلة " البندارى" طالبين بتارهم يا جاسر وبيجولوا انه لازمن ياخدوه
زفر جاسر بضيق وهو يتذكر قصة الثأر التى جعلت احد ابناء عائلة " البندارى " يهرب منذ زمن بعائلته لانه كان المطلوب والان يطلبون ثأرهم منهم ! نظر للجميع بتفكير عدة ثوان قبل ان يقف ويقول آمرا
- انا هروح لكبير عيلة البندارى وهتفج معاه ونشوف حل للموضوع ديه
انصرف جاسر وتركهم وهو يفكر فى الحل الذى توصل اليه لحل تلك المشكلة .
***
عدة ضحكات تنطلق من " حلا " وهى جالسة امام اياد وبيدها علبة مثلجات وقال اياد بتساؤل
هو جاسر اخوكى ده صعب ؟
نفت حلا وابتسمت قائلة
هو يمكن جاسر شديد شوية بحكم انه بقى كبير العيلة لكن هو طيب جدا وكمان ما شاء الله على قدر عالى من العلم .. تصدق ان جاسر اللى يشوفه يفتكره متعلمش ربع ساعة على بعضها ! مع انه دكتور مخ واعصاب وواخد الماجيستير وخلاص هيناقش رسالة الدكتوراه
نظر لها اياد بذهول وتمتم قائلا
ما شاء الله .. طيب وعمار ؟
عمار محاسب فى بنك واصغر من جاسر بحوالى ٣ سنين ، انا اصغرهم ولولا حرصهم على تعليمى مكانوش سابونى اعيش لوحدى فى اسكندرية
تفتكرى هيوافقوا بيا رغم كل ظروفى يا حلا ؟
امسكت حلا يده وقالت بحنان وثقة
اخواتى بيحبونى وعايزين سعادتى وانت راجل بجد يعتمد عليك ومش هيلاقوا احسن منك ليا
تبسم اياد وشرد فى عائلته الصغيرة التى تحمل مسئوليتها بعد وفاة والده وتركه شقيقته ووالدته وجدته الكفيفة .
***
يجلس جاسر واضعا قدما على قدم بغرور وقال بثقة
رجعوا ولد عبد الغفار البندارى وبعديها طالبوا بتاركوا
نظر الجميع لبعضهم وقال كبير العائلة بخوف
هتسامحوا فى تاركوا يا جاسر بيه ؟
اومأ جاسر براسه بثقة وقال بعقلانية
النفس بالنفس واتاخدوا من زمان و مينفعش يبجى ولاد عبد الغفار بعيد عن اهلهم اكتر من اكده .. تنسوا تاركوا ونسامح احنا فى تارنا وانى اضمنلك امان ولد عبد الغفار
لاحظ تهلل وجوههم وفرحتهم بقراره فقال كبيرهم مستأذنا
الولد يرجع بالسلامة وعشان نشيل العداوة بين العيلتين احنا طالبين الجرب منك فى الداكتورة حلا اخت جنابك لولد عبد الغفار
اعتلت الصدمة ملامح جاسر وهو يفكر فى عرضه .. ان فكر فى الامر بعاطفة الاخ سيرفض ان يزوج شقيقته بشخص هارب لم يراه فى عمره ولكن بعقلانية كبير عائلة البكرى فتلك الزيجة ستكون مفتاحا لحل النزاعات ، زفر جاسر وقال بهدوء
وانى موافج .. نجروا الفاتحة
رفع الجميع ايديهم قارئين فاتحة زواج شقيقته وذلك المجهول وامر بجلب شقيقته من الاسكندرية !
***
وصلت حلا منزلها ويداها متشابكة مع اياد والابتسامة تعلو ثغرهما حتى شهقت حلا بفزع وهى تشير لاحد الاشخاص وقالت بفزع
دول رجالة جاسر اخويا
هدأ اياد من روعها وتقدما من الرجال الواضح عليهم اثار السفر الذى يسر بالطائرة الخاصة التى جعلهم جاسر يستقلونها ، اقتربت منهم وقالت بثبات وهى تبحث عن كف اياد الذى كان ممسكا بكفها منذ قليل
خير يا منصور جاى ليه ؟
تبسم منصور وقال
جاسر بيه باعتنى اخدك يا ست البنتة
نظرت له بتعجب وقالت
ليه يا منصور ؟ ما أبيه جاسر عارف ان ورايا امتحانات ومش هنزل قبل اسبوعين
اصلهم جروا فاتحتك يا ست حلا
شهقت حلا وامتلأت عيناها بالدموع قبل ان يهتف اياد بغضب
ازاى تقروا فاتحة واحدة متجوزة ؟
جحظت عيون الجميع بصدمة قبل ان يكمل اياد وهو يمسك بيدها
حلا مراتى
***
" كيف اتجوزت يا منصور ؟ ده انا اجطع خبرها وخبره جبلها ، جسما بالله ما هيطلع عليهم صبح .. اجفل انا جاى دلوجيت على اول طيارة "
هتف جاسر بتلك الكلمات بغضب واغلق الهاتف فى وجه منصور وامسك سلاحه ووضعه فى خصره ودلفت والدته فزعى وسألته فقال هو بعصبية
بنتك حطت راسنا فى الطين واتجوزت من ورانا ! هى دى الحرية والثقة اللى كنت مديهالها ؟ انا هقطع خبرها هى والكلب اللى اتجوزته
شهقت والدته وحاولت تهدئته حتى لا يتهور ويضيع حاله هو وشقيقته ولكن اصر على الامر فقالت
خد عمار معاك .. اكيد فى حاجة غلط انا عارفة حلا لا يمكن تتجوز من ورانا
هنشوف يا أمى
***
" انتوا أغبياء ! ازاى تعملوا كدة ؟! "
نطقت خديجة بتلك الجملة موبخه حلا و اياد على حديثهم خاصة بعد علمها بمجيء جاسر شقيق حلا من الصعيد ، حاول اياد جعلها تخفض صوتها وقال بخفوت
مكانش قصادى حل تانى غير ده يا خديجة
نظرت خديجة له بضيق وقالت
من ورا كلامك ده يا اياد احنا محبوسين بأمر من اخوها اللى جاى بكرة واول حاجة هيطلبها هيقولك فين القسيمة .. هترد تقول ايه يا حلو ؟
فغر اياد فاهه بدهشة و نظر لحلا وغمغم قائلا
هنكتب كتابنا وهتبقى مراتى رسمى واحطه قصاد الامر الواقع
دارت خديجة حول نفسها وقالت بتفكير
القسيمة هتاخد وقت عقبال ما تطلع وهيتكتب فيها التاريخ وهتتكشف كذبتك .. نعمل ايه يا ربى ؟ بس لقيتها
تهلل وجه حلا وقالت بلهفة
قولى يا خديجة ربنا يكرمك
جواز عرفى موثق بتاريخ قديم
نطقتها خديجة وهى تمسك بهاتفها وورقة وقلم فقال اياد
عرفى ! لا مستحيل
قالت خديجة بأسف
انا عارفة انه مينفعش وان الجواز العرفى ما يعتبرش جواز لان اساس الجواز الاشهار لكن ده حل لازمة وانت مش هتتجوزها فعلا بس مجرد حل عشان نسكت اخوها وتضمنها معاك .. انا هتصل بواحدة صاحبتى محامية اخد منها الصيغة وانت هات ارقام بطايق اتنين صحابك يكونوا شهود ونكتب العقد دلوقتى باسم بابا المزيف بحيث يشوفه اخوها بكرة و يجوزهالك رسمى وفى نفس الوقت يكون العقد باطل شرعا
نظرا لبعضهما بحيرة وقالت خديجة وهى تربت على يد حلا
عارفة انه صعب عليكى يا حبيبتى بس غصب عننا لان اياد هو اللى حطنا كلنا فى الموقف ده
احتضنتها حلا وقالت بصوت متهدج
انا موافقة يا خديجة
نظرت خديجة لشقيقها بتساؤل فأومأ برأسه واتصل بأثنين من اصدقائه وهى هاتفت صديقتها وكتب العقد بتاريخ قديم و خرج الثلاثة يجلسون مع رجال جاسر منتظرين وصوله .
***
صفعة مدوية تلقتها حلا من جاسر الذى امسك بعقد الزواج واصبح كأنه فقد عقله ووقف عمار يحاول حماية حلا منه وقال جاسر بحدة
انا هقطع خبرك .. حطيتى راسنا فى الطين .. انا اديت كلمة للرجالة ارجع اقولهم ايه ؟ اختى اتجوزت من ورانا و عرفى كمان !
اجهشت حلا فى البكاء وخرجت خديجة تحتضنها وقالت بصراخ لجاسر
ما تجوزهم رسمى وتخلص
انتى مين عشان تتكلمى كدة ؟
نطقها جاسر وهو ينظر لها بتفحص جسدها النحيل و بشرتها الخمرية وعينيها الزمردتين التى تميزها وحجابها الشرعى وقامتها القصيرة واهم ما جذب انتباهه فيها هو قوتها ! افاق من تأمله فيها على صوت اياد وهو يقول بانتصار
لازم تتقبل الامر الواقع يا جاسر بيه ... هى مراتى .. انطقهالك بالفصحى هى " زوجتى رغم انفك ! "
كور جاسر قبضته فى غضب واقترب من حلا الباكية التى تشبثت فى اياد وقال بعصبية
قسما بالله لولا ان بابا الله يرحمه اخر حاجة موصينى عليكى انا كنت دفنتك صاحية مطرح ما انتى واقفة على اللى عملتيه ده
نظر عمار له بقلق ولكنه اردف آمرا
انتوا هتيجوا معايا دلوقتى عند مأذون شرعى تكتب عليها وبعدها تطلقها وترجع تتم الجوازة
شهقت حلا بصدمة ولكن اياد قال بثبات
مش هتقدر تجوزها قبل عدتها ما تخلص
هما ٣ شهور هنعتبرهم خطوبة ونخلص
نظر اياد لهم بثبات وقد انتج عقله قنبلة القاها فى وجه جاسر قائلا
لا ٧ شهور لانها حامل فى ابنى ومش هتقدر تجوزها قبل كدة
و....
يتبع....
أنت تقرأ
نوڤيلا " زوجتي رغم أنفك "
Romansaلم يجرؤ احد من قبل ان يتحداه هو الآمر الناهى فى كل شىء لم يكن له نقاط ضعف حتى ظهرت تلك العنيدة لتخبره بكل وضوع وبمجرد نظرة من عينيها انه اصبح اسير عينيها وفى لحظات ينقلب السحر على الساحر لتصبح خيوط اللعبة فى يده ويقول بوضوح انك "زوجتى رغم أنفك ! "
