ما لا نراه
/ 5 /
قعدت نتبع في مجموعة ماشيين مشيت وراهم لقيت روحي في الصيدلة حححي ع الي شفته بديت نوزع في ابتسامات معاش ينفع قيمان الحاجب😂 ادهورتها ورجعت خفت نريح .. لكن مارجعتش من نفس المكان لقيت زي الزنقة خشيت منها طلعتني لمكان فيه شجر قعدت ماشية شوية شفت شي خلاني نلبد ورا شجرة .. شفت رحمة مع نفس الولد الي قعمز جنبها وقاللها صباح الخير حبيبتي😨
مقعمزين يهدرزو ويضحكو وشادين يدين بعض ويشوفو لبعض .. ااه ياخسيسة ومدايرتيلي فيها شيخة جامع .. بس طرف الفرخ ابصر وين طايحة فيه ..طلعت تليفوني بالشوية وخديتلهم صورة 😈 طحتي وين استرحتي ..
شفت للساعة لقيتها 11هذا كله مشيته وماحسيتش😨
رجعت من وين ماجيت وقعدت نتبع في الناس وين مامشيين .. قصيت الطريق وراهم وقعدت ماشية ع يساري شفت مبنى زي القبة ويميني مبنى زيه لكن اصغر وسيارات اشكال والوان خاطمين يهبلو هما والي يسوقو فيهم .. مشيت لين جتني طريق زي السريع نحساب روحي طلعت من الجامعة وقفت سألت بنية قتلي الي ع يساري الزراعة والي ع يميني مبنى النووية .. والي مقابلني هندسة ووصفتلي من وين نخشلها .. توكلت وخشيت للهندسة .. اول ماخشيت لقيت نافورة في الوسط مقعمزين عليها بنات وولاد وع اليمين واليسار ولاد مقعمزين تقوليش عليه الا عرض ازياء الكلاب كل واحد احلا من الثاني لين معاش عرفت وين نركز .. كملت طول خطمت على هلبا ممرات والدنيا معبية زحححمة حسيت روحي برا ليبيا .. وصلني نهاية هالممر الطويل لجردينة فيها كراسي لوح ونافورة في الوسط وكراسي بمظلاتهم تقول منتزه ..قعمزت وخديت سلفيات وانا ناخد في وحدة جنب الشجرة خطم من جنبي واحد قالي ناخدو سيلفي معاك ..
انا:تعال والله ماتقعد في خاطرك
هو:رسمي ؟
انا:شن رايك
هو:كان نجي وترديني
انا:مشكلتك انا قتلك ماتقعدش في خاطرك
هو:والله شن بنقولك *وضحك ومشي *
وقعدت نستكشف في المكان بعدها مشيت من زنقة لقيت روحي في وسط جردينة ثانية .. قعدت ماشية ووين مانمشي نلقى طروف 🤤
رحمة:حححي اختي نسيتها
علي:مش وقتها اختك خلينا فينا
رحمة:تي ماتعرفش المكان ابصر وين رايحة
علي:كان راحت را اتصلت بيك بعدين علاش ماتبيش تعرفيني بيها
رحمة:زينب ابصر كيف مانتفاهموش واصلا قاعدة صغيرة *وطلعت تليفونها*
علي:من مزال صغير بالله
رحمة:ههه اني
علي:ياحليلي من غماازااتهاا
رحمة:تي اس بتفضحنا اهو يرن اس ماتقول شي *ناضت من جنبه*
كنت مقعمزة في جردينة كبييييرة دهشت من المشي وقررت نقعمز .. ومن مبكري الي قالي ناخدو سيلفي مقعمز مقابلني ويناشب ..
رن تليفوني وقمته رديت .. كانت رحمة
انا:هيوا
رحمة:انتُ وين؟
انا:في الهندسة
رحمة:غبر فيك شن وصلك لغادي
انا:قعدت نتمشى لقيت روحي اهني
رحمة:وين بالزبط
انا:نعرفش مقعمزة في جردينة كبيرة مقابلني مبنى مكتوب عليه مكتبة العلوم
رحمة:وراك كافيتيريا كبيرة؟
انا:مقهى ايه
رحمة:خليك غادي ماتتحركيش تو نجيك
انا:باه*وسكرت*
أنت تقرأ
ما لم نراه ( روايات ليبية )
Romanceيوجد اشياء لا نراها الا بعد فوات الاوان و لكن الخطاء ليس مننا الخطاء ان هذه الاشياء لم تعترف الا بعد ان فقدت الامل ؟ كلام معقد ستفهمه في رواية تجمل اجمل صدف الحب ؟ للكاتبة : ميرا رواية من داخل المجتمع الليبي
