ما لم نراه ( روايات ليبية )

حلقة 3🔥

ما لا نراه

      / 3 /

درت بحث ع اسم ولد عمي الدراه طه هذا وطلعلي .. خشيت بعتثله وقبلني طول ..
خشيت بعتتله *اسفة بنمسحك بعتثلك بالغلط وانت قبلت طول *
نشوف فيه يكتب .. وماتوقعتش يكون رده هكي .. كان المكتوب *ولا يهممك ألغي الصداقة *
وسكت.. شن هالبارد هذا
عاودت كتبتله : هو الحق انا مُعجبة بيك وتحشمت نقولهالك
طه: من وين تعرفيني 🤨
انا:نعرفك وخلاص وقداش ليا نبي نعترفلك وديما نشوف فيك ونبي نجي نكلمك بس خايفة من ردة فعلك
طه:شن بنقولك الحق
انا:ماتقول شي عارفة الموضوع مُفاجأ بس عادي خود وقتك وفكر وتبي نتعرفو عادي وتبي حتى تتصل بيا ع المسنجر توا باش تتأكد عادي
طه :*عطاني ان يكتب وطوّل *

قلت هذا يكتب في جريدة ولا شكله خاش يفتّش في بروڤايلي ..

واخيرا وصل المسج وكان كاتب فيه ..

طه:اسمعي يابنت الناس فيا مايمشّي معاك ونسايرك، يعني فرصة وجت لعندي من غير مانتعب لكن الموضوع هذا مطلعه من راسي لين يكتب ربّي الي في بالي يعني من غيرها مانشوف لحد وربي يرزقك بولد الناس الي يصلح بيك

هففف شن هالقديم هذا .. طلع مكبد يعني ومش ح ينوض من اهني قمت راسي نشوفله بكره .. لقيته يشوفلي 😨 غبارتي كان مايكون زابطني 😨 درتله بلوك من غير مانرد ورجّعت الباسورد وفتحت ايميلي وسكرت الأون لاين وقعدت نهدرز على خالد خير من البلاش يعني 💁🏻‍♀️

شوية ورن تليفوني وكان عبدو شن يبي الهم هذا سكرت عليه وفتته مستمتعة بتهدريزي مع خالد مطير عليا الكساد واصلا مليت من عبدو .. وزي الي عجبني خالد فيه مواصفات قنينه .. قالي نحكو مكالمة لكن الهم طه قاعد مقعمزلي مش ح نقدر ضيع عليا فرصة وخلاص ..

رزان:اكيد تبصر انت
عبدو:والله مانبصر قصدي من الأخير انتِ عارفة الموجود زوبه موضوعها فاشل وواضح ماتحبنيش واني ماننكرش نعجبت بيها وبالك حبيتها لكن انتِ غير انتِ متأكد حبيتك
رزان:تي تحشم زوبه صاحبتي مش اني الي نخون صاحبتي
عبدو:ماهيش خيانة توا كلمتها بننهيها معاها سكرت عليا ومبكزي فتحت النت وماقرتش رسايلي شن معناها هذا
رزان:نقولك البنت طايحة في مشكلة تقولي ماردتش اصلا كيف تتصل بيها والتليفون مقيوم منها وحتى لو مش مبرر هذا للي قاعد تقول فيه ولو علاقتك مانححتش معاها ماتخربش صداقتنا واخطانا ثلاثتنا
عبدو:من ثلاتتكم؟
رزان:وتسنيم معانا عارفاتك تكلم فيها حتى هي
عبدو:اه انتي هذا علاش رافضة تي تسنيم نكلمها لما معاش نعرف نوصل فيكم الزوز
رزان:الي عندي قلته
عبدو:غير فكري في الموضوع قصدي اني نيتي بيضة معاك ومن لما شفتك عجبتيني واني نبي وحدة زيك هكي اما زوبه لا تنجح ولا اسلوب ولا مهتمة بيا اصلا
رزان:مشكلتك ومعاش تكلمني *وسكرت عليه *

وقتي دارتله بلوك ع المكالمات والمسجات والفيس  وقالت بينها وبين روحها محقره بعد ماشافاته بعيونها ميف يتعامل مع زيزو جاي يتدحنس عليها ومفروض تنبّه زيزو منّه ..