ما لا نراه
/ 11 /
كنت مريضة في الليل قلت خنرقد خير ..
لما فقت الصبح لقيت روحي احسن مشيت مع رحمة حضرت اول محاضرة وبعدها عندي بريك طويل قلت نمشي نفاجأ رزان عارفتها وين تقعمز ماعندهاش غيره المكان .. مشيت وياريتني مامشيت لأن مشيتي والي ريته فتح عليا أبواب في حياتي ماتخيلت وجودها .. والي ريته عبدو مع رزان ويضحكو ويهدرزو .. وقفت نصعقت في مكاني اخر شي توقعته 😨
وقفت نشوفلهم ونتأكد الي شفته صح ولا نتخايل 😨 لا صح هذا عبدو وهذه رزان صاحبتي ..
كنت نبي نمشيلهم ونوقف قدامهم مهما كان حتى لو صاحبتي ياربي ..
وقفت نراقب والدموع متجمعة في عيوني .. كلمتها في التليفون .. نشوف فيها تفرفش وشكله قاللها ماترديش .. ماعاودتش وقعدت نراقب ..
بعدها نشوف في عبدو ناض من جنبها ومشي وقف مع زوز ولاد.. اتصلت بيا وقتي وانا من الربكة والي شفته قعدت نوخر بالتالي وبعدها هربت .. ماشية والدنيا مشوشة في عيوني صاحبتي تتآمر عليا مع ولاد ؟ علاش باهي ؟ شن درتلها انا ؟
الشريط كله يمر قدام عيوني من أول يوم كلمني فيه عبدو .. كيف تعرفت عليه ؟
يوقف قدام مدرستنا وعطاني رقمه وكلمته ..
مشيتها معاه بصارة في الأول وعادي جوي كان هكي مش معدلة ومانحسبش فيها ..
كيف وصل في رزان ؟
لما شدني زين نكلم فيه ونكرت وخدي مني تليفوني كلمته من رقم رزان وقتله مايجيش جيهة المدرسة ولا يتصل على رقمي ..
وقعدت الأحداث تتجمع في عقلي وترتبط ببعضها .. سألني اكثر من مرة رزان مرتبطة ولالا ؟ وديما يسأل فيا على تفاصيلها وانا زي الحمارة نرد بنيتي ومادراش الخُبث وكنت واثقة في رزان وماتوقعتهاش تبيعني ..
ياودي كان باعتني وكلماته وحبو بعض بس والله مسامحتها بالرغم من قرف الموضوع .. علاش باهي ؟
كيف تقبلتها على روحها ؟ انا بعد الي صار مع قيس كرهت روحي وقعدت ناكل في روحي ان خنت نفسي وماحافظت عليها للي يستحقها .. ونقول بيني وبين نفسي كيف بنتقبل نعيش مع حد ثاني نفس التجربة من غير ماننقرف من روحي ونكره روحي ؟
وهي !! هي عاشت مع عبدو وكانت شاهدة على كل شي والي صار كله وتقبلاته وتقبلت روحها !ومدايرة روحها صاحبتي وهي كل مايرن تليفونها تنوض من جنبي ونقوللها في من تكلمي تقولي متعرفة ع حد وماتعرفيهش تستغفل فيا؟
يعلم الله من امتى وهما الزوز يضحكو عليا وانا نهز في راسي ..
ليش باهي ؟ وشن يبو مني ؟
كيف مافهمتهاش قبل هكي .. مخبي ..
كيف ماقريتيش الكلام الي بين السطور ..
شغلي عقلك يازيزو كيف بإديري .. مستحيل تتقبلي رزان ولا تتقبلي تشوفي لوجهها بعد الي عرفتيه ..كيف بإديري بتواجهيها ولا شنو ؟
لمن بنحكي؟ .. كيف بنتصرف؟ ..
لقيت روحي في مكاني الي نقعمز فيه ديما.. قعمزت واتصلت بتسنيم ..
تسنيم:دامه متصلة وتوا معناها في موضوع مهم
انا:بحداك دوشة وين انتِ؟
تسنيم:في الجامعة خيرك
انا:حولي من الدوشة قبل
تسنيم:هي *وبدت تخف الدوشة لين بديت نسمع فيها واضح * شن في ؟
انا:بتجاوبيني على الي نسأله ومن غير لف وياريت ياريت ماتستغفلينيش
تسنيم:رعشتيني شن في
انا:تعرفي حاجة على رزان ومخبيينها عليا ؟
تسنيم:قصدك عرفتي
انا:جاوبي
تسنيم:هي كانت بتقولك لكن تستنى فيك تحشمت منك وماتوقعتش روحها تحب عبدو وتصيز ببنهم احاجة عيت تصد فيه وهو شي سكر راسه عليها وقاللها زوبة عندها في شن ملاهية يعني مش ح تزعلي منها وهي قتلي في ناس خطبوك استنيتك تنكلمي ماقلتيش شي
انا:ناس خطبوني ؟ وعندي في شن ملاهية؟
تسنيم:اي قبل مانجوك صار الكلام هذا واستنيتك تحكيلنا ماحكيتيش
انا:اما ناس ؟؟ انتِ عارفة بابا مستحيل يعطينا لو مكملناش قراية وغير هكي لو جوني علاش بندسها عليك
تسنيم:نعرفش قلت يمكن بما انك ورزان مع بعض قراب اكثر وماجتش فرصة نهدرزو وغير هكي الفترة الأخيرة متغيرة هلبا ومعاش نهدرزو
انا:اها بس انا ماقلتهااش بكل ولا في حد جاني
تسنيم:غريبة وعلاش رزان تقولي حاجة زي هكي
انا:علمي علمك
تسنيم:تبي نواجهوها؟؟
انا:لالا وياريت ماتعرفش انك كلمتك ولا سألتك ولا اصلا عرفت بعبدو
تسنيم:علاش في بالك شي
انا:لالا غير هكي خليها براحتها
تسنيم:عادي تبي نكلمها ونعرف منها عادي راه
انا:لا قتلك ماتتدخليش خلاص الزبدة خديتها خليها براحتها امتى مايخطرلها تو تتكلم وهي باي
تسنيم:بس اسـ..
انا:*قصيت عليها* بااااي
أنت تقرأ
ما لم نراه ( روايات ليبية )
Romanceيوجد اشياء لا نراها الا بعد فوات الاوان و لكن الخطاء ليس مننا الخطاء ان هذه الاشياء لم تعترف الا بعد ان فقدت الامل ؟ كلام معقد ستفهمه في رواية تجمل اجمل صدف الحب ؟ للكاتبة : ميرا رواية من داخل المجتمع الليبي
