القسوة اصبحت عنواني

الفصل السادس

الفصل السادس
~•~•~•~•~•~•~•~•~•~
انصرف الجميع بعد انتهاء الاجتماع الا شوقى ظل بجانب رؤيه هانم وبعد قليل قاطع الصمت صوت رؤيه وهي تقول:اتكلم ياشوقى عايز ايه
شوقي :هو شاكر عرف قرارك النهائي
رؤيه:اكيد طبعا شاكر عارف كل حاجه قبل ما يسافر وده قراري  النهائي ومش هرجع فيه شاكر تعب عشان يكبر الشركه وانا سبتك تعمل اللي انت عايزه بس من دلوقت لازم تساعد اخوك عشان عيالكم يفضلوا في ظهر بعض انا مش هافضل عايشه لكم كثير عشان كده قرار النهائي كلكم هتشتغلوا مع بعض و بالنسبه للجامعه تقدر تقدم على اجازه مفتوحه لغايه ما تظبط امورك و تعرف توفق بين الشركه والجامعه احنا محتاجين خبرتك  انت كمان معنا عشان عيالكم يتعلموا منكم
شوقى باستسلام:اللي حضرتك شيفاه عن إذنك

☆☆☆☆☆☆☆☆☆☆

انتهى دوام رهف وفى طريقها للمنزل رن هاتفها
رهف:الو ..اه ...ازيك
المتصل:.......
رهف:اوك وانا موافقة اساعدك عشان ظروفك الصعبة بس كل شئ له مقابل
المتصل:.......
رهف:انتي عارفة ان معنديش هزار رجعى نفسك وردى عليا
المتصل:.......
رهف:اوك تمام مطلوب منك ............
فهمتى
المتصل:........
رهف:عايزاكى بالكتير اسبوع وتقوليلى كله جاهز عشان مصلحتك ويالا سلام

بعد قليل من الوقت وصلت رهف لمنزل والدها تحت نظرات هذا الشخص البغيض فاقتربت منه بخطى ثابتة ونظرات ممزوجة بالغضب والكره وقالت:لسه زى ماانت إنسان مقرف
خالد بابتسامة مكر:وانتى لسه قمر وجمالك بيزيد
رهف بحدة:كنت فاكرة موت عاصم هيأثر فيك بس للأسف موته راح هدر أنا بكرهك واوعدك دمارك على أيدى حق عاصم وحقى هقتصه منك ياخالد يااسيوطي
خالد ببرود وهو يعض على شفاه:وانا مستعد اكون فداكى بس.....
رهف باشمئزاز من نظراته وكلامه:قذر وديوس

ثم بصقت على الأرض وتركته وهى تشتعل غضبا

وصعدت للأعلى ودلفت للمنزل لتصطدم بأخيها
نائل:مالك يارهف فى حاجة
أطالت رهف النظر إلى أخيها فكم أشتاقت لحضنه ودلاله وعطفه عليها

شعر بها شقيقها فضمها واستكانت بين ضلوعه وكأنها تلقى بهمومها فى أحضانه ولكن سرعان مالبست لباس القسوة والعند فدفشته بعيد عنها وتحولت قسمات وجهها لعتاب ونظراتها إلى اللوم

وقالت بسخرية:متأخر أوى يانائل

ثم تركته وتوجهت لغرفتها وأغلقت الباب لتسمح بأنين قلبها وفيضان الدمع بالهبوط لعلها تُهدئ من عواصف غضبها