part12
تفاجئت بيه
رواد مقعمز وداير رجل عارجل:تأخير يادكتورة
انا:شي مايعنيكش
رواد:اطلبيلي قهوة
انا:ماعندناش قهوة تفضل هات اللي عندك
رواد:تعجبيني في ثقتك جاي نبي تردي الذهب اللي دايرهولك بالك حسبتيه من ممتلكاتك
انا بملل:لما جيت لحوشك ماخديت شي الا لبسي وحاجات خدمتي برا دور من خنبه منك
رواد:سيارة
انا:مفاتيحها في درج اللي جنب السرير
رواد:حانقهرك وحبيبك اللي شادة الظهر بيه حانقتله قدامك
انا:دير اللي تبيه بينك وبين ربي 🤷♀️
رواد:مش خايفه عليه يعني
انا:وعلاش بنخاف شن امه انا 😒
رواد:اعترفي انك على علاقه بيه حتا بعد طلقتك مزال ماتبيش تقولي
انا:تعرف شي انت خايف ايه خايف اني نحب سعيد وياخدني لانك واثق تماما انه احسن منك وافضل بهلبا خايف انك تخسر لانك متعود اللي تبيه تاخده بالكيف ولا بالسيف بس ريح تفكيرك المحدود يا طليقي انا صاحبك مانشوفلاش ويوم نحب راجل رح نحكي عليه للدنيا كلها
رواد واضح من عيونه قداش اضايق وقف:تمام تحملي مايجيك يا. طليقتي وطلع
خفت منه بس هيهات مزال نضعفله ✊🔥
حضرت الاجتماع وطلعت للمكتب
رانيا:بنحكي معاك شويه
انا:تفضلي عندي خمسه دقايق فاضيه نسمعك
رانيا:ليش تخليتي عليا
شبحتلها:وعدتك بشي
رانيا:لا بس انا صاحبتك
انا:تبيني نربطه من يده ونجيبهولك تتزوجيه بالغصب
رانيا:خيرك هكا تتكلمي
انا بنرفزه:مهو كلامك يبي رد هكا انا يوم كلمتيني هنا شن قتلك خوي هدا مدمن فرح مايعرفش يعيش بلاها يضربها يعذبها وترجعله هما الزوز يموتو على بعض
رانيا:وتصالحتي معاها ورجعتيلها
انا:تبيني نقاطعها عاخاطر ردها خوي هههه قولي كلام يقتنع بيه العقل
رانيا:مفروض خديتي موقف
انا:لو كملتي كلامك انا عندي خدمه
رانيا:للدرجه هدي كارهتني ومعادش تبيني في حياتك
انا:انتي اللي بعتي حتا وقت كنت بحاجتك لقيت مكانك فاضي وانا معادش عندي استعداد ناقش حد اللي مش عاجباته ينساني
رانيا:بس
انا:تفضلي
طلعت وانا حسيت روحي مرتاحه لاني بجد معادش بنجامل فديت من الكل
طلعت مروحه لما قريب نوصل نشوف في دخان فوق قلت ان شالله خير حريقه ابصر وين كل مانقرب نشوفها لما وصلت انصدمت انه محلات امجد كلهم والعه فيهم النار والمطافي كيف وصلت بعدي قعدت واقفه مصدومه
خشيت للحوش لقيت امي وفرح يبكو
امي:شفتي يابنيتي شن صارلنا رزق وخيك كله ضاع
اناقعمزت ونتفكر في كلام رواد لين وصلتني رساله"هدي البدايه بس وهالنار اخرتها بيك انتي وحبيبك"
بعد ساعات انطفت النار وروحو بابا وامجد
امي:الحمد لله عالسلامتك يا وليدي رزق الدنيا يتعوض
امجد:الحمد لله البضاعه كلها طلعتها من امس انا والشباب وتوا وصلت الميناء انحرقو المحلات بس مافيهم شي
امي:الحمد لله
امجد:خيرك ميمي
انا:وجعوني المحلات نحساب فيهم بضاعه
امجد يضحك:لا مافيهمش امس سهران قلت نكسدو عليهم
انا ارتحت:ربي يباركلك في رزقك وخي امتا بتسافر
امجد:الاحد الجاي
انا:ان شالله خير
خشيت انا وماما نوتو في الغدا
وامجد خش بيغير
فرح:خفت عليك حبيبي
امجد:سلمها اللي تخاف على راجلها
فرح:نقولك شي بس اوعدني ماتعصبش
امجد:تعالي هنا وقولي
قعمزت جنبه:يوم مشيت مع مهاد تاخد حاجاتها رواد قلها رح ندمرلك حياتك انا حاسه انه ورا حرقه المحل لانه من لما وصلت اختك مضايقه وواضح انها خايفه
امجد:ااخ بس لو مش حالف بوي وربي لما نقتله
فرح:لا بالله عليك انا ماصدقت رجعنا حبيبي فوته حسبي الله ونعم الوكيل
امجد:اممم ومش خاطرك تجيبيلي ولد سمح زيني
فرح:ااه يعني انا مش سمحه
امجد:انتي عسل نموت فيك
كيف قرب منها قصيت عليهم 😂
انا:فرح تعالو الغدا واتي
امجد:ايح
فرح:هيا اهو جيت ههه غير والحقني
امجد:ديري في حسابك الليله بنروحو رهو معاش يساعدني الوضع هنا
تغدينا ودرنا شاهي وقعدنا نهدرزو ونضحكو
"محلاها الجمعات البسيطه اللي مش مخططلها قبل مع ناس يحبهم قلبك ويرتاحلهم تحسي ضحكاتهم تريحك ومعاهم تتنفسي بدون نفاق او كذب عن نفسي نقوللهم اهل قلبي وناسه"
الصبح ماشيه للعمل طلعت سيارة جنبي بدت ضايق فيا وترد عليا مافهمتش مشكلته بس بعد فتح الشباك ودارلي تحيه بالمسدس متعه فهمت انه رواد قاصد يخوفني 😏 ماتفهه
خديت حالاتي
سحر:ممكن نشرب معاك قهوة
انا:اكيد تعالي
سجر:شن جوك
انا:تمام
سحر:الحمد لله عاسلامت امجد امس قال بوي انحرقو محلاته
انا:سلمك
سحر:شن سبب الحريقه
انا تنهدت بقوة وسكرت عيوني نتفكر في مسجاته
سحر:ماتقوليش الحقير رواد
انا:ايه
سحر:حي عالكلب وحي
انا:واليوم الصبح باعتلي زوز قعدو يضايقو فيا في الطريق وبالسلاح
سحر:وانتي شن بتتصرفي
انا:ولا شي طز فيه يدير اللي بيديره
سحر:بس هدا ماينسكتلاش
انا:شن تبي نديرله انتي عارفه مش حانقدر نتحداه او نوقف في وجهه
سحر طارتلها:بس انا نوقف مش حانتفرج عليه وهوا قاعد يدمرك
انا:فوتيه
سحر:تحلمي نحت البالطو متعها وطلعت
انا:وين ماشيه
سحر: خليك هنا لين نجيك اعطيني سيارتك
طلعت بالسيارة ومشت للمصنع وهيا مش ناوية طيب
خشت بكل قوة:وين رواد
راجل: مش جاي اليوم
سجر:وبوه
راجل:ولا الحاج
سحر:معناها نمشو للحوش
وصلت وخشت طول:السلام عليكم
تالين:مني انتي وشن خاشه طول
سحر:وكاله بلا بواب 😏
تالين:احترمي نفسك واعرفي شن تدوي
سحر:مش جايه ليك اقلبي وجهك من قدامي ونادي خوك وبوك
طلعو رواد ومها
سحر:اهلا بالنجاسه
رواد:لفعه الزمي حدك واقصري الشر وروحي
سحر:مش جايه باش نروح قعمزت عالصالون نادولي الحاج بالله
رواد:شن تبي
سحر بصوت عالي:ياعمي فتحي
مها:عليك قلة ادب
سحر:خليك عاجنب بروحك
طلعو نوريه وفتحي:شن فيه
سحر:عندك علم بولدك المحترم يهدد في طليقته ومستحلفلها انه يدمرلها حياتها
فتحي شاف لرواد:الكلام هدا مزبوط
رواد:لا طبعا
سحر:لا مزبوط ياعمي امس حرق محلات امجد واليوم باعت وسخ زيه لمهاد يهددو فيها بالسلاح ويضايقو فيها في الطريق
فتحي:اللي تقول فيه درته
رواد:قتلك لا يابوي
سحر وهدا شنو طلعت هاتفي وورتلهم المسجات
فتحي يشوف في الرسايل ورد الهاتف لسحر
رواد:يابوي
ماكملش كلمته الا وكف لفله وجهه
فتحي:هكا ربيتك انا تاخد بنات الناس وطلق على كيفك وتهدد وين عايش انت ياكلب
رواد وجهه احمر وبيتفجر بس مستحيل يتكلم قدام بوه
فتحي:ياخسارة تربيتي ضاعت كلها
سحر:مهاد ماتقدرش تواجهك وهدا مخليك واخد راحتك بس نحذرك لاني في وجهك ونقتلك قبل تقرب منها فاهم
مها:جايه تههدي في حوشنا
سجر:ايه نهدد وكيف مابتفهمو افهمو اخر همي وزي ماضريت خوها رد بالك لانك عندك اخت 😉
تالين:شن تخرفي انتي شن علاقتي انا
سحر:حذرته بس هيا سلام سامحوني عالازعاج
رواد قعد يشوفلها
فتحي: خلي الناس في حالها يا رواد اخر مرة بنكلمك وخش لداره لحقاته نوريه وتالين
مها:اهدا حبيبي سيبهم الفتره هدي
رواد يشوف قدامه وواضح انه يخطط لشي
سحر خشت لمكتبي تصفر وتضحك
انا:شن درتي
سجر:شدي هاتفك
انا:امتا خديتيه
سحر:هه سر المهنه ياعومري
انا:قولي بلا براده
سحر تضحك:راجلك قصدي طليقك ياخده خلقت ام كف من بوه اوووه مسح على قلبي
انا شهقت وحطيت يدي على فمي:ضربه عمي
سحر:عمى الدببه من وين لوين عمك انتي طلعتي منهم العيله الوسخه هادو معاش تجيبي اسم ولا واحد فيهم عافمك
انا:شن درتي
سحر:حكيت لبوه مصايبه وريته رسايل التهديد وقتله مره ثانيه بتلقاني انا في وجهك
انا:قولي شن صار
سحر:فوتي معاش دوريه الهي بخدمتك توا وخلاص
انا ارتحت نوعا ما وفعلا رواد معاش بعتلي شي
بعد اسبوع كملت علاج لعمتي سالمه
جي سعيد جايبلي بوكس فيه ساعه ورايحه وشكلاته وسفرة بكلاوه وسفرة ترافل:تفضلي دكتورة ان شالله في ميزان حسناتك
انا:تسلم علاش متعب روحك هدا واجبي
سعيد:لولاك امي قعدا ماتقدرش تتحرك
انا:ربي يدوملها صحتها ويخليهالك
سعيد:امين يارب ويخليلك اهلك مد يده
سلمت عليه ضغط علي يدي بقوة حسيت وكأنه كهرباء في جسمي كله قعدت نشوفله مافهمتش شن اللي صار بس ابتسمت
سعيد:ردي بالك على روحك
انا:ان شالله مع السلامه ماعرفتش احساسي وقتها بس تجاهلته ورجعت لشغلي
مروج انخطبت قعدنا لاهيين معاها تجهز لعرسها لانه بتسافر طول
فات شهر وجي العرس قعدت عندها انا وسحر رانيا تجي مرات وانا نتجنب فيها
امجد سافر وبيقعد 3سنين في المغرب
سحر:والله لما تحني هي
انا:اهبلي مش رح نديرها بري ملحي
سحر:حلفت
انا:خيرك انجنيتي مطلقه وتبيني نحني حنه عرايسيه
سحر:عادي شن فيها تنسيش انك في العرس ماحنيتيش
انا:ومش رح نحني حتا توا
سحر:بهي الحنه هدي عاخاطري ميمي
انا:ووااك بهي
مشت تجري نادت البنت اللي تحني ودارتلي الحنه الهنديه طلعت حلوة كملنا وطلعنا بناخد قفطان للحفله
سحر:ااه يامهاد تعبتيني بكري ندورو
انا:بهي مالقيتش حاجه حلوة
شفنا محل شكله فاتح جديد
سحر:انزلي نشوفو هدا شكله راقي
انا درست:هي
قعدنا نشوفو حاجات كلها حلوة
سحر:والله ماتاخديش من هنا معاد طالعه معاك وحانروح في تاكسي اهو قتلك
انا نتفرج بعدين شفت قفطان ازرق ملكي يهبل 🤤😍😍:سحر شو
قابلني سعيد خاش للمحل معاه بنت تضحك وتهدرز وهوا نفس تعبير الوجه والملامح الهاديه يهز في راسه بمعنى يسمع فيها
سحر:حيي محلاه هي خشي قيسيه هييي يابنت وين تشوفي
وتلفتت منو هدا
انا:سعيد
سحر:اووه ماقلتيش انه قطعه هكا ياحليلي عاللحيه اللي زي ظلام الليل
انا:ياسر عيونك بيطلعو فيه بنخش نقيس القطان باش تشوفيه
سحر:هي بري
قسته وطلع حلو خديته ومشيت نشوف في لبس الحوش
سحر:شن رايك نمشو نسلمو عليه
انا:هني روحك
سحر:غير هيا
انا:لا
سحر ملحي اهو جنبنا بنمشي سلام
سعيد شافلها:اهلين
سحر:عرفتني
سعيد:لا والله منو حضرتك
سحر:انا دكتورة سحر صديقه مهاد نشوف فيكم في المركز انت وخالتي سالمه مرات ممكن مش متفكرني
سعيد:اهلين بيك معليشي شكلي ناسي كيف الحال
سحر:الحمد لله بخير وسلمت عالبنت مدامتك!
سعيد:لا اختي
سحر:بالجودة بيك
سعيد:كيف حال الدكتورة
سحر:اهيا معاي يا مهاد وينك
انا نسب فيها:اهلا
سلمت عليهم ولاحظت البنت مانزلتش عينها من عليا لين توترت
احم كيف حال امك توا
سعيد:الحمد لله كويسه
انا:دوم يارب هيا نستاذنكم تأخرنا
سحر:طلعت وهيا عيونها بيطلعو فيه
انا:ياسر
سحر:ماحلاه ياربي يستاهل تخوني معاه
انا:اركبي بلا دوة فاضيه
فات باقي العرس حلو
في يوم مروحين انا وسحر جيت بنفتح السياره لقيتها مفتوحه
سحر:مخليه سيارتك مفتوحه
انا:لا ابدا
سحر:هيا بهي مستعجله
روحت بيها وانا نفكر كيف سيارتي مفتوحه انا متاكدة اني سكرتها لما خشيت للمركز
بدي هاتف يرن بس مش هاتفي قعدت ندور لقيته في الدرج والرقم برايفت رديت
شخص:.......
انا. شديت فرين بقوة ووقفت 😱😱 يتبع
