part14
من يومها سعيد اختفى من حياة مهاد معادش شافت وجهه حتا امه تجي مراجعه مع السواق
سحر:عندي رقمه كان تبي تكلميه
مهاد:رقم من
سحر:حلاتك وانت عامل عبيط 😂 بلاش استهبال سعيد طبعا
مهاد:لا
سحر:اخس عافكرة انتي حياتك ليه
مهاد:نعم ?
سحر:ايه هوا انقضك ياحلوة
مهاد:دخلكش
سحر تتصل:طالما تبيشي بناخده انا واهو بنكلمه
مهاد:مجنونه انتي
سحر:ايوا سعيد..... كييف........امتا هدا......ان شالله خير وين هوا .......تمام وسكرت
مهاد:خيرك
سحر:يهمك هلبا
مهاد:خيرك تحكي هكا بس استغربت
سحر:اها يعني مايهمكش تعرفي
مهاد:لا مايهمنيش
سحر:تمام
مهاد:وين ماشيه
سحر:عندي مشوار ومروحه تبي شي
مهاد:لا سلامتك قعدت مستغربه من تصرفات سحر
بعد تم الدوام كيف بتطلع وقفت قدامها بنت
ريم:كيف حالك يادكتورة
مهاد اذكرتها كويس:اهلين كويسه وانتي
ريم:مش كويسه بكل
مهاد:ان شالله خير
ريم:انتي ماعندكش قلب احساسك ميت خوي بسببك في المستشفى مانعرفوش يعيش ولا يموت ليه سنين متعذب بحبك وبعد حكالك على كل شي ترفضيه تعرفي انه ماياكلش طول الوقت دخان ويتفرج عاصورك بس
مهاد عيونها دموع:انا ماكنتش
ريم:ماتقوليش مش قصدي بنات وفاهمين بعضنا كويس خوي ماعنداش اي مانع لو كنتي مطلقه او حتا ارمله يتبع فيك ليل نهار زي المجنون وانتي شايفه روحك عاشنو حطي في بالك شي لو سعيد يموت مش حايصيرلك طيب ومشت وخلتها
مهاد تبكي وعارفه انها السبب في اللي صار طلعت لسيارتها واتصلت
سحر:نعم
مهاد:وينه
سحر:في عياده.....
مهاد:كيف حاله
سحر:تعبان هلبا
مشت مهاد للعياده لقت امه تبكي:سلامته
سالمه:ااه يابنيتي وليدي بنترزاه ونشتاقه
مهاد:ادعيله ربي يشفيه
سالمه:يارب خود من عمري واعطيه
خشت ريم شافتلها بكره ومشت قعمزت بعيد
مهاد كلمت الممرضه وقاتلها انها دكتورة وتبي تشوفه
دخلوها شافتله وجهه مضروب وايده مربوطه كلها ورجله مكسوره وفيه جرح في بطنه الذنب بيقتلها انها بعد حس عنده امل كسراته ودمراته
طلعت مشت للدكتور المسؤول عليه:السلام عليكم
د:اهلين تفضلي
مهاد:نبي نعرف شن وضع سعيد
د:منو حضرتك
مهاد:انا الدكتورة مهاد حميد علاج طبيعي
د:اها يعني انتي اللي بعتوك من المركز
مهاد:علاش!
د:شوفي حانكون معاك واضح ونحكيلك عاوضع المريض سبب الحادث انهيار عصبي ادى لفقدان الوعي وهوا يسوق بسرعه يعني واضح فيه شي مأثر عليه رجله مكسورة وايده محصله ضربه قويه لما فاق الصبح ماقدرش يحركها بكل هيا سليمه بس تبي علاج فتره كان عنده نزيف داخلي بس وقف الحمد لله
مهاد مصدومه:انا
د:لما يفيق ويتحسن تقدري تبدي معاه دكتورة توا مافيش داعي لوجودك الاحسن تروحي
مهاد:انا قريبه المريض
د:ااه اسف جدا
طلعت روحت وثاني يوم من الصبح خديت اذن ومشيت للعياده لقيته فايق ومعاه امه واخته قعدت برا سألت عليه قالو احسن بس يده قاعد مايحركش فيها
سالمه:مهاد
انا:صباح الخير كيف حاله اليوم
سالمه:كويس غير ايده قال مش قادر نقيمها
انا:محصل ضربه قويه انا بنشوفه
ريم:ماتعبيش روحك يادكتورة تو نجيبوله حد ثاني
سالمه:اسكتي هيا عارفه شغلها
ريم:بس ياامي
سالمه:خلاص خشي بنيتي
انا خشيت لقيته راقد قعمزت عالكرسي جنبه:سعيد
فتح عيونه بتعب وابتسم:ياروحه
انا بنموت من تأنيب ضميري:شن تحس توا
سعيد:ولا شي مدام انتي جنبي انا كويس
انا:وايدك
سعيد:مش عارف نحركها
انا:فتره بسيطه وترجع تمام
سعيد:ان شالله
انا:اسفه كل شي بسببي انت راقد هنا بسببي 😢
سعيد:معادش تتأسفي
انا:جبتلك غير الوجع
سعيد:وانا نحبه الوجع هدا لانه منك
انا:كيف قادر تحبني هكا تعرف اني لليوم مش قادرة نستوعب الكلام اللي قلتهولي
ابتسم واول مرة نشوفه هكا محلا ضحكته وغمازاته صارت ربكه لقلبي ونفسي طلع بصعوبه
سعيد:هاتي يدك
بدون تردد عطيته يدي حطها عاقلبه وقلي شوفي شن صايرله وانتي جنبه حسيته بيطلع من مكانه وفي ايده رعشه وعرقان
انا:انت
سعيد:نحب كل شي فيك ماحبيتش قبلك ومش رح نحب بعدك مهاد انا حافظك اكثر من روحك ادق تفصيل فيك
انا:للدرجه هدي
زاد ضغط عايدي:واكثر السلسله اللي جابهالك امجد لما تخرجتي من الثانوي ماتنحيش فيها من رقبتك وهدا الخاتم من سحر لما تضايقي او تزعلي من حد ترقدي ماتحبيش تبكي قدام الناس لما تتوتري معادش تتكلمي عندك حساسيه من القرفه و الخوخ مدمنه شكلاته البندق
انا مصدومة:مافيش حد حافضني هكا
سعيد:حافظ نفسك
انا:خايفه
سعيد:من
انا:رواد مش حايخليك في حالك معادش نبي نسببلك مشاكل كارهة روحي لانك هنا
سعيد:يعني
انا:افهمني ارجوك
سعيد:تبي نطلع من حياتك
سكتت ودموعي بدو ينزلو
سعيد:قولي تبيني نختفي ومعاش تشوفي وجهي ولا حتا تسمعي اسمي
ماقدرتش نرد عليه شي مانبيشي يتوجع بسببي بس شي منعني نقوله ايه نبيك تطلع من حياتي
سعيد سيب ايدي:تمام جوابك واضح روحي للحوش وماعادش تجي مانبيش علاج
انا:بس
سعيد:اطلعي
طلعت من الغرفه نمسح في دموعي
ريم:شن قلتيله
انا:انتي علاش كارهتني
ريم:لانك توجعي في قلبه
انا:اسفه
ريم:ربي يهديك ومشت
روحت للحوش تعبانه مخنوقه كارهه كل شي علاش انا حياتي هكا مش مكتوبلي نرتاح معقوله بنقعد نعاني هكا ياربي مش رح تعطيني يوم نضحك فيه من قلبي بدون مانخاف من شي فديت خلاص توضيت وصليت وخشيت سريري
العشيه جتني سحر:نوضي كلميني
انا:ماعنديش نيه نحكي
سحر:وعلاش ان شالله
انا بعياط:لاني تعبت من الكلام من تفسير تصرفاتي من وجع قلبي
سحر:انتي سبب وجعه قلبك
انا قعدت نبكي بقوة لين معاش قدرت نتنفس
ضربتني سحر كف:هدا باش تفيقي لروحك لامتا بتقعدي هكا لين تموتي ولا تبدي مريضه نفسيا اصحي لروحك مهاد رهو مافيش حد تهميه مافيش حد بيجيبلك سعادتك لبين يديك كل حد لاهي بحياته انتي قادرة تنسي وتفتحي صفحه جديدة انتي حابسه روحك وسط الكآبه هدي ماتبيش تطلعي من قصه رواد الزفت تي انسيه واعتبريه ماضي كوني انانيه دوري على اللي يسعدك وطز في الباقي معادش تهتمي لحد هاداكا يزعل يملح هداكا يحب الحاجه اللي عندك طز فيه ربي قال اسعى ياعبدي وانا نسعى معاك ماقالش ابكي واندبي حظك لاك اول ولا اخر وحدا تطلق احمدي ربي طلعتي من عيلتهم سعيد فرصتك الاخيرة الراجل ميت عليك خوديه الحب مش للاول لا ياصاحبتي الحب للافضل وللاحسن اسمحي لروحك تحبيه وتتعرفي عليه وقتها رح تكتشفي انه رواد غلطه قوي روحك راك لو بتقعدي هكا حاتموتي
انا ساكته ونشوفلها
سحر:نشفتيلي ريقي ان شالله تفهمي وديري حل لروحك لانه لو ماخديتيشي رح نسحره ونتزوجه انا باي توا وطلعت روحت
قعدت نفكر في كلامها معاها حق في كل حرف بس خايفه رواد وصلت بيه يحاول يقتلني يعني مش حايتراجع انه يقتله مش قادرة ناخد قرار
نضت اتصلت بفرح:اهلا ميمي
انا:شن الجو
فرح:مليح خيرك كنتي تبكي
انا:امجد معاك
فرح:لالا راقد احكي خيرك
انا قعدت نحكيلها ونبيها تعطيني رايها"من قال بعد الكره نبدو صاحبات فرح ندمت وانوجعت هلبا ربي عطاها درس في نفس الشخص اللي كسراته وتغيرت بجد وبدت انسانه كويسه ليش مانسامحهاش كان ربي يغفر ويسامح في النهايه خوي يحبها وانا مش رح نوقف في وجه سعادته"
فرح:انتي شن تبي مهاد
انا:اممم واثقه فيه ومصدقه كلامه بس
فرح:مافيش بس اسمعي انا بعد اطلقت من خوك كنت ناويه نطلع من حياته ونعاقب روحي بيه لانه حبيته بجد بس بعدين لما شفت رانيا تحاول معاه قلت علاش نحرم روحي وننقهر نخلي وحدا ثانيه في مكاني انا متاكده انه امجد يحبني ولهذا حانرجعله وناخده ولو عاحساب الدنيا كله مايهمنيش حد الا هوا ورجعت وخليته مايشوف حد غيري حتا رانيا يشوفها انا
انا:يعني
فرح:يعني خودي قرار انتي تبيه وماتخلي حد يأثر عليك حتا لو فيه عقبه في طريقك خليك واثقه انك حاتتخطيها
انا ارتحت هلبا لكلامها:شكرا
فرح:ان شالله عرس قريبا 😅
انا ضحكت وسكرت رقدت وانا واخده قراري ومتاكدة منه خلاص شكرا سحر ماحلاك ياصاحبتي 😍
lole"الصديق نعمه واحلى نعمه ممكن تكون عند الانسان كلنا عندنا هلبا اصحاب بس فيه بينهم هداكا الصاحب اللي تحسه روحك مرايتك تكون معاه عاطبيعتك تحكيله كل شي تفرح معاه تزعل معاه يومك مايفوتش بدونه لما يغيب تحس انك ناقص وتفضله على الف حبيب وديما من بين الكل تختاره ولما تجي سيره الراحه تتفكره وقت الصح معاك ووقت الغلط يردك ولو عالموت وراك وامنيتي ليها ديما ربي مايحرمنيش وجودها في حياتي #قرعتي 😘"
فقت الصبح لبست احلى شي عندي وطلعت فطرت والابتسامه مش مفارقه وجهي
امي:ان شالله ديما تضحكي ومرتاحه بنيتي
انا:ارضي عليا بس
امي:راضيه عليك دنيا واخره بنيتي ربي يحفظك ويرعاك
ركبت سيارتي واتصلت:صباحك ورد وفل وياسمين ياحظي الحلو
سحر:ان شالله خير
انا:توا نبي منك خدمه يا وجه الخير
سحر:تفضلي
انا:وين يسكن سعيد
سحر:عاشن ناويه
انا:هيا قولي وبعدين تو نجيك للحوش نحكيلك كل شي
سحر:في ...%*$... حوش عادورين لونه ازرق
انا:تمام هي وجهك وانطلقت
وصلت بعد جهد رنيت الجرس فتحتلي الشغاله:عمتي سالمه موجوده
الشغاله:موجود تفضل
خشيت شويه ونزلت سلمت عليها وقتلها اني جايه بنديرله علاج في الحوش
سالمه:تعالي يا بنت ركبيها لدار سعيد
انا:بالك راقد
سالمه:لا فاق بكري غير عاخاطر رجله قتله ماتنزلش
انا:اها
ركبت مع الشغاله
ريم عالدروج:شن فيه ثاني
انا:هالمره مش حانزعله ابدا وعد
ابتسمت:حلو تفضلي
خبطت عالباب جاني صوته:خشي يمى
خشيت:صباحو
بدون مايشوفلي:اهلين دكتورة
انا اضايقت من رده بس حقه:كيف صحتك
سعيد:الحمد لله
قعمزت عاكرسي جنب سريره:بنديرلك الجلسات هنا
سعيد:قتلك مانبيش
انا:وايدك
سعيد:حتا هكا باهيه معاش نبيها تتحرك
انا بزعل:ماتبيش تشوفلي 🥺
قام عيونه فيا وعيونه ووه جلطه:لشن تبي توصلي مهاد
انا وقفت وقعمزت قدامه:لهدا واشرت عاقلبه
سعيد:هدا ملكك من زمان
انا:وتوا نبيه
سعيد:مافهمتش
انا عرفته يبيني نحكي كل شي وجهي بدي احمر وسخنت:اني صح خايفه بس معادش يهمني حد نبي نرتاح ونعيش بسعادة مع اللي نبيه ويختاره قلبي وسعادتي معاك انت قلبي واثق فيك واختارك نبي نضحك ونفرح ونزعل وانت جنبي نبي نحبك زي ماتحبني انت واكثر نبي ندير معاك عيله نبيك ليا انا وبس
قعد يشوفلي بدون رده فعل عيونه مارمشوش مافيش على وجهه اي تعبير لين حسيته معاش يبيني
سعيد:متأكده
انا:ايه 200% ومافيش تراجع على قراري بكل بكل
ضحك وخدي قلبي معاه 🤤:نموت فيك
انا:يعني مزال تحبني
سعيد:ولاخر عمري حانحبك انتي بس
انا:بنتزوجو
سعيد:مالا بنلعبو
انا:بس قبل ايدك بترجع تحركها
سعيد:حاضر انتي تأمري تعالي
حضنته بقوة هلباا كميه الراحه اللي حسيتها بقربه كميه مشاعر خلوني مانبيش نبعد عليه نبي نقعد ديما في حضنه وجنبه
انا:اسفه لاني ضايقتك امس
سعيد:انسي اللي فات قبل بنبدو من اليوم ماتعرفيش قداش فرحتيني وريحتي قلبي
انا: ان شالله ديما مرتاح
سعيد:فيه حد مغير رايك
انا ضحكت:ايه فيه حد وراني الحقيقه
سعيد:ياودي مش عارف كيف نكافيها سحر
انا:كيف عرفتها
سعيد:مش قتلك حافظك احكيلي شن قالتلك
قعدت نحكيله شن صار
سعيد:البنت هدي مافيش زيها حظك حلو بصحبتها
انا:هلبا قداش نحبها
سعيد:معاش تقولي نحبها 😒غيرتي مش حلوة بكل
انا:بهي حاضر
سعيد:محلاك 😍 تعرفي كل الناس فاهمه اني نحبك الا انتي
انا:بجديات
سعيد:اي حتا صاحبتك من يوم شافتني في المحل زبطت كل شي تعرفي يوم اتصلت بيا وطلبت مني نساعدك سألتها سؤال قلتلها شن علاقتي انا بمهاد ردت عليا لو تحبها بجديات احميها
قتلي عيونك فاضحينك لكن الله غالب صاحبتي ماتفهمش
انا:خزي عليها
سعيد:مالاحظتيش ولا مره
انا:والله ماركزت انا كانو لقائاتي بيك معدودة ومافيش مرة انتبهت بصراحه كنت نخاف منك
اتكى عالسرير وهوا شاد يدي:علاش
انا:ديما ساكت وتحكي بهدوء ماتعطيش للشخص اي ردة فعل نحسك قنبله في اي وقت بتتفجر
ضحك: مانحبش كثرة الكلام لانه مافيشي فايده اعطيني المفيد بس وفيه حد يكره الهدوء هدا شي يميزك عالباقي وانا مانحبش نتشبه بحد ولا نحب كثرة الخلطه ووقت صبري ينفذ معادش نعرف حد ووقتها حاتقولي هدا مستحيل سعيد
انا:شفت يعني عندي حق نخاف
سعيد:لا ياقلبي انتي الوحيده ماتخافيش انتي عندك في حياتي صلاحيات ماخداهاش حد مسموحلك بكل شي ليك في قلبي اللي ماعطيته لاي شخص
ابتسمت:ربي يخليك ليا
سغيد:هلبا الكلام هدا في يوم واحد مش حايصير طيب ره
انا ضحكت ووقفت:هي نبدو ياسر بكري نهدرزو
سعيد:هي تفضلي دكتورتي
بعد ساعه وقفت لانه تعب
انا:خلاص غدوة نكملو خود الحبوب هادو عطيته الحبه وحطيت الشريط جنبه
سعيد:خليك شويه
انا:مفروض ترقد توا
سعيد:غير قعمزي اصلا حاس روحي نعست
قعدت جنبه لين خداه النوم غطيته وطلعت
ريم تلقح:احم ان شالله تحسن
انا:ايه احسن
سالمه:بارك فيك يابنيتي ان شالله نردهولك في الافراح
ريم:لا بنردوه اكيد وغمزتلي
انا:نستاذنكم توا
مشيت لسحر اول مافتحت الباب حضنتها بقوه وقعدت نبوس فيها:محلاك انتي حظي الحلو بفضلك رجعت نضحك
سحر:ان شالله اللي في زماغي صار
انا:صار وحياتك وصاحبتك بتتزوج قريبا
عيطت سحر وبدت تنقز:بتتزوجي الحلو. حي عليا
انا:تخيلي ضحك محلاه ياربي
سحر:ماشالله 😂
قعدت نهدرز عندها للمغرب بعدين روحت
امي:اتصل خوك يسأل عليك
انا:تو نكلمه
بوي:شن خدمتك
انا:كويسه
خشيت لداري غيرت وكلمت امجد قعدنا ساعه نهدرزو بعدين سمعت صوت مكالمه في الانتظار سكرت معاه لقيته رقم
وعاود ثاني رديت:الو
سعيد:معادش تفكري تردي عالارقام
انا:مهو حسيت بيك انت
ضحك:وكيف حسيتي
انا:قلبي قالي
سعيد:ياحليلي من قلبك قداش نحبه
انا سكتت:بنقولك شي
سعيد:قولي
انا: مرتاحه معاك وحاسه بأمان جنبك بس نبيك ماتزعلش وقت مانردش عليك بنفس كلامك
سعيد:عارف وفاهم انك مزال ماتحبينيش وانا مانبيش منك رد. بس نبيك واثقه في قرارك انك تبي تكوني جنبي
انا:ايه والله متاكدة
سعيد:تمام احكيلي هي
انا:شن تبي نحكيلك
سعيد:كل شي نبي نعرف كل يوم في حياتك كيف كان
قعدنا نهدرزو لين رقدت والخط مفتوح
الصبح مشيت للمركز وبعدها عند سعيد بنديرله الجلسه
في حوش ريم جايتها حماتها
مها:ماسمعتش انكم روحتو تعرفي الا الجمعه لما مشيت لماما
ريم:ايه لينا اسبوعين مروحين لهينا في سعيد دار حادث
مها:سلامته يارب شن وضعه توا
ريم:الحمد لله احسن بهلبا
مها:كويس ياريت ترجع علاقته هوا ورواد
ريم:انتي عارفه الحق وانه راجلك هوا الغالط خوي ماعمره فكر في تالين ولا لفتت نظره اصلا
مها:بس ماكانش نقص من عمره لو تزوجها
ريم:كيف يتزوج وحدا مايحبهاش ويحب غيرها مش ظلم حتا ليها
مها:خوك يحب وحدا ثانيه
ريم:ايه وقريب رح نديرو خطوبه
مها:ان شالله ربي يهنيه شن اسمها
ريم فكرت تقول هكا باش تغيض مها وتحرقلها دمها لانها عارفه انه هيا اللي صورت سعيد ومهاد وسببتلها مشكله بس ماتعرفش انها بالكلام اللي قالاته رح تسبب مشكله اكبر لمهاد وخوها
مها:شنو
ريم:سعيد بيتزوج مهاد
مها بصدمه:منوو ماتقوليش مهاد ضرتي
ريم:اللي كانت ضرتك
مها:ايه ايه يحبو بعض صار
ريم:ربي يهنيهم ويجمعهم ❤️
مها:امين 😏
هدرزت شويه وطلعت روحت وهيا تفكر رغم كل المشاكل مهاد قدرت تختار لروحها حياة جديدة بعيد عليهم ارتاحت من رواد وهمه وبعدت عالعيله كذبه تحققت وبتخليها سعيده ارتاحت بجد
فاتو اسابيع وسعيد صحته تحسنت فك الجبس من رجله وبدي يحرك في ايده ومستمر بالعلاج
مهاد زادت تعلقت بيه اكثر ويوم عن يوم تكتشف انه احساسها مع رواد عمره ماكان حب وفرق بينهم زي الفرق بين السما والارض سعيد يهتم بيها بطريقه حلوة في ايام خليها تدمن قربه ووجوده نظرته ليها زرعت وسط قلبها ثقه صعب تنكسر وتمسكه بيها خليها تتأكد انه امانها
سعيد:هدا اخر يوم
انا:ايه انت تحسنت هلبا
سعيد:تعودت عليك
انا:معليشي اهو بنتزوجو ونقعد معاك لين تفد مني
سعيد وقف وبدي يقرب:انا نفد منك عارفه قداش استنيت باش يوصل اليوم اللي تكوني فيه ملكي
انا نوخر:عارفه
سعيد:بنجي نشوفك كل يوم لين نقرا فاتحتك
انا:بهي
لصقت في الحيط
سعيد:نحبك
انا:بهي غير ابعد يخش حد يفهمنا غلط
سعيد:ويخشو بلكي يجبروني نقرا الفاتحه اليوم
انا:ارجوك
سعيد قرب اكثر:لا
انا حطيت يديا عاصدره:حبيبي 🥺
كنت نحساب هكا بيقتنع بس بنكحلها عميتها
سعيد:انتي اخترتي
انا:شن
قبل نكمل كلامي كان مداهمني بقبلة 🤤😍😍😍لن انساها طول حياتي ❤️❤️
سعيد:نموت فيك
انا:ب بنروح
قعد يضحك عليا:تفضلي دكتورة وقولي لعيلتك جايينكم غدوة بنخطبو
طلعت وانا وجهي احمر بيتفجر
ريم تضحك:خيرك دكتورة
انا:اه لا شي
ريم:تزعليش منه خوي سخيف شويه
انا:سلام توا تأخرت
طلعت روحت وانا مقرره اني بنحكي لماما وبابا على سعيد واللي صار معانا
بعد العشا
بابا:خيرك بكزي دوري
انا:امم نبي نحكيلكم حاجه
امي:بهي قعمزي واهدي
قعمزت وبالسيف نطلع في الكلام حكيتلهم انه رواد بعتلي ولاد حاولو يخطفوني وسعيد ساعدني ووقف معاي طبعا مستحيل نحكيلهم القصه الحقيقيه لانه رح يرفضوه
بابا:بارك الله فيه مش عارف شن خلطه على رواد هالمغضوب
امي:حسبي الله ونعم الوكيل
انا:و فيه شي ثاني بنقوله
امي:قولي خيرك
انا:هوا اخته كلمتني وقالت يبو يجو غدوة
بابا:اهلا وسهلا بيهم
انا:يبو
امي:خيرك تكلمي
انا:يبو يخطبو
بابا ضحك:اشيه
امي:وانتي شن رايك يابنتي
انا:اللي بديروه انتم يمشي عليا
بابا:لكن الواضح انتي موافقه
انا خشيت لدار لانه حسيت روحي حانموت
اتصلت بسعيد وقعدنا نهدرزو للفجر
تسريع الاحداث
جو سعيد وامه واخته وراجلها خطبوني وبعد ايام بابا رد عليهم بالموافقه ومش حانطولو بالعرس درنا تلبيسه بسيطه بين العيلتين والعرس بعد شهر وسعيد مسكر راسه الا يديره كامل وماينقصه شي
في حوش رواد:تعالي خودي فرخك
مها:جايباته من حوش بوي احترم نفسك
رواد:اقلبي عليا وجهك
مها:ماتفهك
ضربها كف
مها:تعرف ارتاحت منك مهاد ربي فكها من سجنك
رواد شدها من شعرها بقوة:سكري فمك ماتجيبيش سيرتها الخامرة هدي
مها بدت تضحك:لامش خامرة. انت خامر
ضربها لين طاحت: اسكتي افضل
مها:مهاد ماخانتكش ولا فكرت حتا
رواد:بلا تخريف
مها:ايه هدا الحق انا اللي صورتهم وكذبت الكذبه هدي باش طلقها
رواد خنقها:تبصري
مها:لا نحكيلك في الحق نبي نحرقلك قلبك زي ماعذبتني من يوم خديتك كرهت روحي نادمه اشد ندم عاليوم اللي كلمتك فيه وخديت رقمك ياريتني ماشفتك
رواد:توا خطرلك تندمي
مها:ايه توا بعد عرفت انه هدا عقاب نيتي السيئه عمرك ماكنت فرصه حلوة انت عقاب وغضب والدين مهاد كويسه ونيتها بيضا هدا علاش ربي بعدها عليك وخلاها ماتحملش منك. انت كابوس هم
رواد قعمز عالصالون وحط ايديه عاراسه
مها:لانه نيتك سودا مهاد غدوة خطوبتها للانسان اللي حبها وصانها اللي بعتهولها ربي باش ترتاح معاه كذبتنا بدت حقيقه 😏
رواد بصدمه:كذبة شنو
مها:حبيبت قلبك بتتزوج صاحبك ههههههه سعيد بياخدها حاتموت بالقهرة لما تفكر انها راقده بين ايديه مرتك مع صاحبك
رواد:مستحيل انتي تقولي هكا تستفزي فيا بس
مها:اييي ياسرك من الوهم اللي عايش فيه راك مش بالاهميه هدي العالم مايدورش عليك سيد رواد مصدق انه اي وحدا تشوفك بطيح فيك وتقعد باقي حياتها تحبك هه ياروحي عليك
رواد كسر الطاوله وحدف هاتفه عالحيط:وربي لما نشرب من دمهم ورحمه امي ماهو قاري فاتحتها الكلب
مها وقفت:حط في راسك حاطلقني ورح ناخد ولدي مش حانعيش معاك اكثر بنسافر لخوي واقعد فيها انت اي وهاك الاخيره هديه مني ليك اختك الحلوة تكدب عليك سعيد مااعتداش عليها ولا حاول حتا هيا تصنعت هكا باش تجبره يتزوجها هه نفس السم اللي يجري في عروقك يجري في عروقها خسرت صاحب عمرك لانك حقير وماتستاهلش يقعد معاك حد عيش بروحك انت واختك المريضه
خدت ولدها ولبسها ومشت لحوش بوها
قعد رواد منهار ويتفكر لما سعيد قاله انت مصدق فيا ولما مهاد قتله انت مصدق هوا خسر صاحبه ومرته بغبائه وبعدم ثقته فيهم
نزل لتالين:تعالي
طلعت جنبه:خيرك رودي
رواد:بنسألك وجاوبيني بالحق احسن مانوريك وجه عمرك ماشفتيه
تالين خافت:بهي
رواد:سعيد اعتدا عليك ولا انتي تكدبي
تالين بدت تبكي:انا نكذب وكذبت في كل شي انا نحبه ليا سنين نحاول معاه بس هوا ولا تحركتله شعره اخر شي قلي نحب وحدا ثانيه قهرني وكذبت لانه عارفاتك بتصدقني وتجبره ياخدني لكن كل شي انقلب
رواد:تعرفي انه بيتزوج مهاد
تالين:كييف مش كذب
رواد:هه حتا انتي عارفه انه الصور كذب
تالين سكتت وخشت لدارها تجري
رواد وقف وقعد يتفرج عالسما
صباح يوم جديد جايب معاه وجع لبعض ابطالنا وفرح للبعض الثاني 💔
مهاد تسوق وتحكي عالهاتف:خلاص
سعيد:شن هوا الخلاص قتلك نبي نرفعك مشوار
مهاد:بس
سعيد:مابسش قلت لبوك وقلي تمام
مهاد:خلاص نستناك الساعه1:30
سعيد:تم ياروحي وصلتي
مهاد:ايه
سعيد:نحبك
مهاد:حتا اني
سعيد:ترا احلفي
مهاد:خلاص عاد
سعيد:تو نتفاهمو بعدين
خشت مهاد للمركز تبتسم فتحت باب المكتب وو 😱😱😱😱يتبع
اكيد رواد مش حايسكت وبينتقم منهم ياترى شن بيدير!
مهاد وسعيد بتنتهي قصتهم ولا بتكمل ?
الحلقه الاخيرة تتوقعو نهايتها حلوة تفرحكم ولا تنتهي بفراق المحبين وتزعلو ?
استنوني في الحلقه الاخيرة
