part13
رديت عالهاتف ومستغربه:الو
صوت راجل يضحك:دكتورة مهاد
انا:تفضل
راجل:الامانه اللي خنبتيها من رواد تخصني وعيب جدا اللي درتيه
انا:امانه شنو مافيش عندي شي يخص رواد
راجل:بتنكري يعني بهي يا حلوة البضاعه اللي عندك تخصني وتوقفي تعطيهالنا ولا حاناخدها وناخد معاها روحك 😡
انا انصدمت وقلبي بيوقف:بضاعه شنو
راجل:الحبوب اللي مشطيهم من رواد اوقفي يا ...$&%**&%
انا معاش قدرت نتكلم ودموعي بدو ينزلو ووقفت السيارة بقوة
انفتح الباب وركب معاي:ماتوقفيش ولعي سيارتك وامشي
انا شفتله:انت ك كيف
سعيد معصب:ولعي الهم واطلعي بسرعه
انا ولعت السيارة ومشيت:سيارتي فيها مخدرات!
سعيد:هكا الباين ولد &&&@%& بيعلقك معاهم
انا بديت نبكي بقوة ووقفت السيارة ثاني:علاش بس يعني بيقتلوني خلاص
سعيد:مستحيل وانا حي مش مايصيرلك شي ولا يقدر كلب يحط عليك ايده
قعدت نشوفله وعيوني ضببو من الدموع ونفسي ناخد فيه بالقوة:ساعدني
سعيد:روحي ليك بس ولعي وامشي وسيارتك ماتوقفش مهما صار وبسرعه
انا:مانقدرش نجري
سعيد شد يدي: تقدري عارف بس مهما يصير ماتوقفيش لو وقفتي رح نموتو انا وياك
انا هزيت راسي وولعت شفت في المرايا وراي زوز سيارات كحل ومظلمات:ورانا ه هما 😨
سعيد حط يده على ايدي:ماتشوفيلهمش بكل زيدي السرعه بس
جبد سلاحه من ورا الجاكيت متعه وقعد يفتش في السيارة
انا: وين نمشي
سعيد:تعرفي منطقه .....
انا:ايه شويه بس هيا بعيده
سعيد: امشيلها وزيدي السرعه يامهاد
انا اول مره في حياتي نجري بالطريقه هدي والخوف خلاص نحس في جسمي كله تجمد
سعيدحط يده ورا الكرسي متعي:انتي مخيطه الكرسي?
انا استغربت:اي خياطه
سعيد: مخيطا ولا لا
انا:لا
سعيد جبد الغلاف متع الكرسي بقوة طاحو عليه اكياس
انا:شن لقيت
قام كيس ووراهولي
انا عيطت:مخدرات 😱😱
سعيد:ماا شن كنتي تحسابيها حبوب راس 🙄 خشي من الطريق الفرعيه
خشيت طريق ترابيه فاضيه والسيارات مزال وراي والهاتف بدي يرن ثاني
سعيد رد:نعم
راجل:وقفو السياره احسن مانبوش رصاص
سعيد:انا خاطري نشوفه وسكر الهاتف
انا:بهي نوقفو ونعطوهم كل شي
سعيد:ياريته تفكيرهم بريئ زيك خشي يمين
خشيت لطريق ثانيه تخوف فاضيه بكل بدو السيارات يردو عليا ونسمع في رصاص
سعيد:زيدي سرعه واطلعي يمين بناخد نسوق انا
انا:وعلا
ماكملتش كلمتي الا ورصاصه خاشه من الشباك وضربت سعيد:ااه
انا:ياربي وبديت نبكي بقوه حسبي الله ونعم الوكيل فيك يارواد
سعيد:خشي يمين ودرسي تحت الشجرة اللي بتقابلك
مشينا مسافه ودرست السيارة
انا:مش حاتقدر تسوق
سعيد:لا بنقدر لو قعدنا عاسرعتك بنموتو حولي بسرعه
نزلت نجري ركبت في مكانه وهوا نقز لكرسي السواق
انا:كتفك
سعيد:مادوريشي ولع السيارة وطلع
انا:خليني نربطهالك عالاقل يوقف النزيف
سعيد:اربطي هي
قعدت ندور مالقيتش حاجه طويله لازم نساعده حولت وشاحي وربطه على يده بقوة ودموعي ماوقفوش
سعيد:امسحي دموعك ياسر من البكي
انا:شن بيصير فينا توا
سعيد:خايفه
انا:هلبا 💔
سعيد:وانا موجود في الدنيا ماتخافيش
حسيت انه السيارة طير من كثر السرعه والسيارات اختفو واخيرا بعد عشرة دقايق وصلنا لاستراحه في حوازه كبيرة وعليها سور
سعيد:عادي تفتحي الباب
انا:اي ونزلت نجري فتحتله وخش وسكرت الباب
سعيد بدي يدوخ معاش قدر ينزل
توترت معاش عرفت شن ندير نزله ولا كيف
طلعلي مفاتيح من جيبه واشرلي على واحد:افتحي بيه بسرعه
مشيت فتحت الاستراحه وهوا نزل بالسيف وخشينا
انا نرعش:ياربي ساعدنا
سعيد:اهدي خلاص مادام قدرنا نهربو منهم الباقي محلول
انابعياط:كيف محلول كيف سيارتي معبيه مخدرات. ومانعرفش من الناس اللي تلحق فيا احتمال نموت بعد شويه
وقف وجي قدامي:قلت محلوله خلاص بري اغسلي وجهك واهوا المطبخ اشربي
مشيت وانا رجليا خلاص معاش حامليني شربت وخشيت الحمام انهرت قعدت نبكي بقوة معقولة ناس للدرجه هدي ماتخافش ربي عاخاطر كذبه كان بيقتلني مادارش حساب لولا شي منظر السيارات وراي والرصاصه اللي كسرت الشباك بين عيوني غسلت وجهي وطلعت لقيته فاقد الوعي
قعدت ندور لين لقيت صندوق اسعافات والحمد لله فيه هلبا حجات بصعوبه قدرت نجيله الجاكيت والسوريه
طبعا خبرتي في الجراحه 20% قعدت نذكر في شويه معلومات وشفتله الجرح لقيت الرصاصه طالعه نضفتله وربطتله ايده ساويته عالصالون وغطيته ومشيت نغسل في اللبس من الدم ايديا مزال يرعشو ونافورة الدموع الباين فسدت 💔
مافكرتش نطلع من المكان او حتا نجيب هاتفي
بعد ساعتين بد يفيق ويتوجع من ايده
انا قربت منه:توجع فيك
سعيد هز راسه وحاول ينوض:من امتا راقد
انا:ساعتين
قعمز: نتعبك تجيبيلي اي تيشرت من الدولاب داخل
انا مشيت جبتله:خود الحبوب هادو مسكنات
سعيد:شكرا
انا بنتكلم وتحشمت هوا يتوجع وانا بنسأله شن بنديرو ماصح وجهي
سعيد: مش حايصير شي خودي نفس
انا مابيتش نرد عليه
سعيد:نجيبلك هاتفك كلمي اهلك وقوليلهم مش مروحه
انا:علاش ووين بنقعد
سعيد: بتقعدي هنا
انا:لا طبعا نبي نروح توا
سعيد:تمام هي اطلعي خودي سيارتك وروحي وسلميلي عالجماعه لما تتلاقي معاهم
انا تفكرت انهم اكيد رح يقعدو يدورو عليا 🤦♀️ ماغباني
هوا خدي دخانه من عالطاوله وماعادش كلمني
فاتت ساعه ثانيه وجت 4
انا:بهي تو نكلمهم
وقف وطلع جابلي شنطي ومشي
اتصلت بماما:الو
امي:وينك يابنيتي خيرك عطلتي
انا:ماما سحر تعبت شويه وبنقعد عندها اليوم
امي:ااه بهي غير انشغلنا انا وبوك سلمي عليها وردي بالك على روحك وسكرت
رجعت نبكي ثاني
خش سعيد: دموعك ماتموش
انا:انت مش فاهم موقفي
سعيد:فاهم وزابط اسكتي راسي بيتفجر
انا مسحت دموعي وسكتت
قعمز جنبي: وفتح الهاتف اللي لقيته في السياره اتصل
شخص:اهلا بدكتورتنا
سعيد:صلوحه
شخص:سعيد
رد عليه:بشحمه ولحمه
شخص:انت خانب بضاعتي
سعيد:شن رايك
شخص:مانعرفكش هكا لكن الدوة اللي سمعتها من رواد هلبا
سعيد:بضاعتك عندي وغدوة توصل والباقي مش ليك
شخص:تم ي معلم
سكر الهاتف وتكا راسه عالصالون
انا:نسالك
سعيد:تو نحكيلك لما تهدي
انا:احكيلي توا
رن هاتفه:ايوا.....ايه معاي .....في مكان بعيد شوي عالمنطقه مش حاتقدري تجي بروحك.......الموضوع محلول وغدوة تروح......تمام
مدلي الهاتف:كلمي صاحبتك
خديت منه نستغربه من صاحبتي:الو
سحر تبكي:ميمي حبي انتي كويسه
انا:الحمد لله تمام انتي ليش تكلمي فيه
سحر:تو يحكيلك كل شي بس الحمد لله انتي ماصارلك شي
انا:بس هوا انضرب
سحر:بسيطه نخليك ترتاحي واطمني مش رح نسمحو للكلب رواد يضرك نهائي باي توا وسكرت
رديتله هاتفه ومصدومة سحر وهوا كيف مع بعض ولا شنو
سعيد:شن تمام توا
انا:ايه ايدك قعدا توجع
سعيد:لا
انا:يعني تقدر تحكيلي
سعيد:ايه
وقف وقعمز قدامي عالطاولة كان قريب مني هلبا
انا واطيت راسي:نسمع فيك
سعيد:انا ورواد كنا ناخدو في حبوب ونوزعو فيهم على اكثر من منطقه يعني تقدري تقولي خط وصل بين اللي يبعتو فيهم من برا وبين اللي ياخدو فيهم داخل رواد وانا عندنا هلبا معارف فا ندخلو فيهم بسهولة من الميناء ونوزعو وناخدو في عمولتنا انا من سنين مسيب. وعااساس حتا هوا بس الواضح انه مستمر ماكانش عندي علم بتهديده ليك صاحبتك خدت رقمي من ملف امي وكلمتني حكتلي عاكل شي وطلبت اني نساعدها في حمايتك بروحها ماتقدرش وليا شهر ونص دايرلك حمايه من بعيد بدون ماتحسي واليوم الصبح كنت ماشيله نبي نحكيله ونقنعه يبعد عليك لما وصلت سمعته يحكي عالهاتف وقاللهم انك خنبتي منه البضاعه واللي يكلم فيك هدا الراس الكبير اللي نبعتوله في اابضاعه رواد عطاهم مكانك والوقت اللي تطلعي فيه وهما من المركز وراك وانا من بعيد نشوف فيك ولما وقفتي جيتك والباقي عندك
انا انجلطت:وشن بدير في المخدرات
سعيد:غدوة بنمشي نسلمهاله وتمت
انا:حاسه روحي طحت من على جبل
شد يديا بقوة:مش انتي بس خايفه حتا اني خفت اليوم
انا:شفت مالا علاش تقولي ماتخافيش
سعيد:خفت اني نفقدك وتضيعي مني خفت نعيش في دنيا مافيهاش نفسك وروحك
انا:شن تقول
سعيد:نحبك مهاد
قعدت نشوفله وقلت اكيد انا نتخيل مادرتش اي ردة فعل
سعيد:نحبك فوق ماتتصوري نحبك بطريقه مستحيل يتخيلها عقلك
انا:لو سمحت بعد عليا راك تصدق الكذبه اللي قالوها
سعيد:انتي شايفه في عيوني ذرة كذب
واطيت راسي
قامهولي:شوفي لعيوني وقوليلي انت تكذب
قعدت نشوفله عيونه يحكو هلبا كلام كبير عليا وعلى قلبي رفضت اني نصدقه
سعيد:تكلمي
انا:معادش عندي ثقه في حد
سعيد:حقك اليوم كان ممكن نخسرك لو تاخرت دقيقه وحدا هالشي خلاني نحكيلك كل مشاعري واللي داسه في قلبي من سنين
انا:سنين ?
سعيد:سنين يامهاد انا نحبك من لما كنتي في الثانوي بس لما شفت رفيقي يحبك بعدت لانك تعلقتي بيه هلبا يوم سيبك وشفت الكسرة في عيونك سيبت كل شي وسافرت ماقدرتش نتحمل نشوفك تتعذبي بحب حد ثاني كرهت حياتي باللي فيها بطلت خدمة الحبوب قعدت في المانيا مانطلعش من الحوش طول الوقت ندخن ونتخايل فيك في كل مكان ماتعرفيش كيف كان شعوري لما كلمني رواد وقلي دبر ملعوب وتزوجك لما رجعت وشفت الضحكه وانتي جنبه شفتك مرته شفتك ضعتي مني وخلاااص راح كل شي
وقف ولع دخانه وعطاني بالظهر
انا:امتا بتروح بيا
تلفتلي:بعد نتم شغلي نروح بيك
معاش قدرت نزيد حتا كلمه معاه عقلي مااستوعبش اللي حكاه يحبني من سنين يعني قبل رواد وسكت لاني حبيت صاحبه صبر وتحمل الوقت هدا كله وتوا اعترفلي
خش للمطبخ وطلع:المطبخ فيه بضاعه تعرفي طيبي
انا:ايه
سعيد:تقدري ديريلنا شي ناكلوه جعان بكل
انا:تمام وخشيت طيبت مالقيتش الا المكرونه درتها وحطيتها
سعيد:يسلمو ايديك سامحيني تعبتك
انا:لا عادي ان شالله تعجبك
سعيد:شن ماتبيش تاكلي
انا:ماخاطريش
سعيد:بتقعدي بلا ماكله
انا:لما نجوع تو ناكل
سعيد:تبي حاجه ثانيه نجيبهالك
انا:لالا كول انت صحتين
تعشى وغسل الصونيه وقعمز قدام الباب يدخن
فتحت التلفزيون بنتفرج بس كلامه يرن في وذاني خلاني مانركز في شي حتا اللي صار الصبح كله نسيته قعدت عالحال هدا لين خداني النوم ومعاش حسيت بشي
عند رواد:ها شن صار يامعلم حصلت امانتك.....كيف.....سعيد شن عرفه باللي حكيناه......ااه يعني معقوله يكونو متفقين......بيردهالك تمام تمام وسكر الخط يعني بديت حارسها وبتحميها مني ماشي يا رفيقي الحساب بينا كبر هلبا
فتحت عيوني لقيته مقابلني نضت قعمزت:شن جابني هنا
سعيد:صباح الخير انا دخلتك باش ترتاحي في النوم
انا:شكرا انت رقدت
سعيد:لا
انا:علاش
سعيد:وجهك اريح من النوم
ماعرفتش شن نقوله:شن يدك اليوم
سعيد:تمام
انا:احم بنروحو توا
سعيد:لا نوضي نفطرو لانك رقدتي بلا ماكله وبعدين بنطلع انا ولما نجي نروحو اتفقنا
انا:تمام خشيت غسلت وجهي وطلعت لقيته جايب بضاعه الفطور وخبزة وبريوش
سعيد:قعمزي
انا جعانه الحق معاش قدرت نكابر كليت
هوا طول الوقت يشوفلي عقدني
انا:بتمشي توا
سعيد:ايه سكري الباب كويس وماتخافيش مايوصلك حد هنا
انا:بتعطل
سعيد:لا
طلع وانا خفت هلبا بروحي وخفت عليه
مشي لمكان متفقين عليه خش في يده شنطه:حبيبنا
صلاح:يااهلين بالزعيم
سعيد:زعلتنا هلبا
صلاح:مانعرفش انها تخصك
سعيد:اهو عرفت بس تفكيرك ماعجبنيش
صلاح:ياراجل قالي خنبتها مني وانت عارفني في الشغل مانعرفش امي
سعيد:حصل خير وهدي عليها ضريبه واشر على يده مكان الرصاصه
صلاح يضحك:عيونا لسعيدنا 😅
سعيد:ماشي توصي شي
صلاح:مش مفكر ترجع صاحبك تعبنا
سعيد:لالا غسلت ايديا ونضفتهم 😉
صلاح:منور والله
سعيد:في الخدمه هيا سلامتك وطلع
عندي كسدت ومالقيتش شي باش نطيب قعدت نتفرج وخلاص كلمت سحر وقتلها بعدين بنروح وانا نهدرز نسمع فيه فتح الحوش وخش
سعيد:جبت غدا من برا تعالي كولي
انا:شن صار معاك
سعيد:حليتها اطمني معاش حد يجي جيهتك
انا:ورواد
سعيد شافلي نظره مافهمتش شن يقصد بيها:عيني عليك والحمايه قعدا زي قبل
انا ارتحت هلبا وواثقه فيه يمكن لانه انقضني وعرض حياته للخطر عاخاطري قعمزت تغدينا كل مايقرب وقت المرواحه نحس روحي وكأني ظالماته او غالطه في حقه
رن هاتفه:ايوا اهلين امي. ايه بنروح اليوم. تمام ان شالله. راك تنسي دواك. ادعيلي بس. سلامتك
انا:كيف حالها
سعيد:كويسه
لاحظته من لما روح يتجاهل يشوفلي وكل حكيه معاي باختصار
انا:شكرا عاكل شي درتهولي
سعيد:معادش تشكريني تمام
انا خفت منه:اوك نمشو
سعيد:اطلعي هي
loleخلو سعيد يحكيلكم على احساسه
ردة فعلها عاكلامي متع وحدا رافضه الفكرة نهائي وماتبيش حتى تتناقش فيا اضايقت وتأكدت انه حبي ليها مستحيل يكمل طول الليل مقعمز نتفرج عليها ونحفظ في ادق تفصيل في ملامحها تفاصيل تكفيني باقي حياتي لما كنت في الجامعه مافيش بنت لفتت نظري كلهم عندي شي عادي مش مهم نسمع بناس تحب ناس تتزوج نستغرب في روحي خيره قلبي ماتحركش لبنت لدرجه اقتنعت اني مانحسش بس معاها تفجرت كل ذرة مشاعر عندي الادمان انا تخطيت حدوده نحبها نبيها ونتمناها بس بكيفها بقلبها وبرضاها نرتاح لما نشوفها تضحك يفوت باقي يومي عسل وننخنق لما نشوف دموعها لما حسيت اني ممكن نفقدها خوف الدنيا كله تجمع في قلبي كنت مستعد نموت على خاطرها نعطيها عمري وتعيش مهما صار بيني انا ورواد نعتبر فيه رفيقي بس لما قرر انه يأذي نبضي بدي عدوي ورح يشوف مني اللي عمره ماشافه بعد شويه بنوصلها لعيلتها ونرجع لحياتي البائسه بدونها اااه ياربي كون في عوني 💔
lole:خلاص انا بنكمل 🤗
طلعو مهاد وسعيد من الاستراحه ومشو للشركه متعه خدي سيارته
سعيد:امشي وانا وراك
مهاد:بنوقف عامحل ناخد وشاح
سعيد:تو نوقف ناخدلك انا ماتنزليش من السيارة
وقفو قدام محل شرالها وشاح وروحت
فتحتلها امها:اهلين بنتي
مهاد:شن جوكم
خديجه:الحمد لله كيف حال سحر
مهاد:تحسنت
دوشت ورقدت طول من التعب والارهاق قعدت يومين ماتمشيش للمركز خايفه من رواد 😢
امي:ميمي تعالي صاحبتك
طلعت:اهلين
سحر:كيف حالك
مهاد:كويسه تعالي نخشو للدار
سحر:ماحكيتيلي شي ياكلبه
مهاد:شن تبي تعرفي
سحر:كل شي صار من لما طلعتي من المركز لليوم
قعدت مهاد تحكيلها بالتفصيل
سحر:بهي وانتي شن رديتي عليه
مهاد:قتله امتا بنروح
سحر:غبيه يعني ببساطه فوتني وماتفكرش فيا
مهاد:شن تبيني نقوله يعني هوا عطاني مشاعره كلها دفعه وحدا صدمني
سحر:بس هوا صادق وماكذبش في شي والدليل انه كان حايموت باش يحميك وطول الوقت عينه عليك
مهاد:خايفه
سحر:خليني نقولك سر سعيد افضل شخص ممكن تقعدي معاه باقي حياتك
مهاد:ليش
سحر لانه......يتبع
