💫 ❄ إمـام الجن❄ ّ 💫(كرونيك باللهجة التونسية )

★🌺 2 : لازمك حل !🌺★

تحل الباب و شعل الضو وبان جهاد ووراه احمد ،وساعت عين خديجة من الصدمة ،اذا جهاد جاء تو شكون ايلي كان فوقها تو !؟
بلعت ريقها بصعوبة
"شبيك "
ترعش بكلها
"نجمش نرقد وحدي ،لازم نرقد حذى ماما"
"ايجا بنتي ارقد حذايا ،ايجا"

احمد ماقال حتى كلمة جهاد موش فاهم ،خديجة هربت تجري لبيت نوم امها ،ايلي صار معاها موش طبيعي جملة ،عنقت امها وحاولت ترقد لكن شي مازالت في بالها الفازة ،باش تهبل شكون ايلي يشبه لخوها ،زعمة جهاد هو بيدو ،لكن جهاد جاء من بعد راتو حل الباب و دخل وشعل الضو مالا لاهر شكون نفس الصوت ونفس الوجه ،اوووف ياربي ،ماجاهاش النوم جملة ،جاها اذان الفجر "الصلااة خير من النوم ،الصلاااة خير من النوم ،الصلاة خير من النوم " بعدت الغطاء عليها و خرجت باش تدوش وتصلي  في العادة ماتصليش هي ،تصادفت مع احمد خارج يصلي "صباح الخير"
"لاباس،شبيك فايقة"
"قايمة نصلي "

قعد باهت وفي نفس الوقت موش مصدق وفرحان
"دوش وانوي الصلاة وربي يثبتك "

تبسملها وعدى يدو على شعرها ،دار خارج وهي دخلت تدوش وتتوضى،كملت ولوجت بين دبش امها جلباب وخمار ولبستهم ،جبدت سجادة بوها ،وجعها قلبها وهي تتفكر فيه يسجد وصوتو المبحوح وهو يقول "الله اكبر" ،فرشتها للقبلة و استوت "اللهم اني نويت صلاة راتبة الفجر"

بدات بالفاتحة وبعد الكافرون ،ركعت وسجدت وفي سجدتها بكات ،وسالت دموعها ،حبتش تاقف ،ريحة بوها و قلبها يدق خوف ورهبة ،مااصعبها الصلاة ؟!

كملت صلاتها وخرجت للصالة ،حلت الشباك ،شوي ضربتها نسمة الفجر الباردة قعدت اكاكا لين طل احمد ،دخل يلقى وجها اصفر ليمونة "شبيك ياطفلة لبارح تحلم وتعيط وتو وجهك اصفر "

"شي ،اه...باش نمشي نحضر الفطور "
"من تو "
"طار عليا النوم ،وماعندي مانعمل "
"ايجا بجنبي"

قعدت كي الطفلة الصغيرة ،تبسملها وهو ياخذ صوابعها الصغار "سبحان الله وبحمده ،سبحان الله وبحمده سبحان الله وبحمده "

تعدى لصبعها لاخر"سبحان الله وبحمده ،سبحان الله وبحمده ،سبحان الله وبحمده "

تعدى لصبعها الثالث ولت تقول معاه وتسبح ،قلبها يدق ونفسها موش منظم ،رغم انو صوتهم بالكاد مسموع الا انو جهاد وقف وراء الباب يسمع ودموعو غالبتو ولحمو بكلو مقشعر "

                          ❄🌺❄

حاول يحرك صوابعو ويسكر بونيتو ،شي نجمش دوب ما يحركها اكاهاو ،دخل للكوجينة باش يصب كاس ماء،يلقى امو متلفتة وتقص قي حاجة "امي،صبلي كاس ماء امان "
ماجاوبتهوش ،قرب منها وشافها قاش تقص ،تقول ضربو الضو بعد عليها ،كانت تقص في يدها ،تقطع فيها تقول جزار ،وموش حاسة "ياللله " غمض عينو وحلها مالقى حد ،شنوة ايلي قاعد يصير ،الهلوسة هاذي باش تهبلو لازم يلقى حل ،دخلت اختو
"احمد شتعمل عقاب الليل "