💫 ❄ إمـام الجن❄ ّ 💫(كرونيك باللهجة التونسية )

★7 : 🌺ماهوش رزقنا🌺 ★

🌺❄🌺

هو صحيح اليوم نهار الكل صدمات و حكايات ماتتصدقش اما موش لدرجة يسمع ايلي قالتو ،حل فمو وماردو ،ضحكت غادة اصلا كانت تستنى في ردة الفعل هاذي بالذات "تتدخلش بعضك ،انت تعرف ايلي فمة حاجز يمنع العين البشرية من انها ترى الكائنات والمخلوقات كيما الجان ،وهاذي نعمة عاطيها ربي سبحانو لعبادو لانو الشي ايلي يراه ينجم يهبلو ويدخلو ويخرجو في الحلة ،انا تولدت هكا ،في عيني ماعنديش ها الحاجز " تلفت على جنابو و ريقو شاح بالسيف يتنفس،ضحكت بطريقة خلاتو يزيد يتنرفز "ياخا نفذلك "
"لا اما انت تتفقد في جنابك ،هههه شو تنجم تلقاهم فوقك والا تحتك زادا "
وقف "لازم نروح "
"باهي نوصلك "
"لا لالالا "
حطت يدها في ذراعو " بون نسيت ماقتلكش انا نفهم لغتهم و اشاراتهم وعندي بارشا اصحاب منهم "
دزها بعيد عليه"اذا تعدي في وقيت نقلك لا حالتي ولا وضعيتي تسمح "
"والله لا ،ايلي نحكي فيه الكل صحيح "
"باهي وتوا فمة جنون معايا"
"أحمد تتفكر اول ماريتك ،كيفاه تقلب وجهي "
"وي تقول ريت ابليس"
"وقتها ريتهم دايرين بيك موش زوز وموش تلاثة ،كانو مسلسلين يدك وكانو باش يسلسلو ساقيك ورقبتك وهكاكا تدخل في حبسهم  وتتنفى ،انت تخوفهم بارشا يا أحمد وماكش عارف"
قعد باهت فيها يستوعب في كلامها يحاول يصدق الساعة يفهم و يدخل لمخو ها الكلام "انا لازم نمشي،على خير"
"على خير "
جوجمة في راسو مرمة كبيرة ،تقول مطرقة وتدق في مسمار في راسو ،يمشي وموش عارف وين يعفس ،لقى روحو قدام باب دارهم ،دخل جهامة وجهو شاحب بصيفة غريبة ،فيقتو امو من عالمو " ياولدي شنوة ها الحالة ،نستنى فيك عندي قده ،يا أحمد تسمع فيا !؟؟؟ " نزلت على كتفو "لاباس!؟"
"لاباس...اه...شنوة شبيك فمة حاجة "
"فمة حاجاااات ،الساعة ايجا نحطلك اتعشى"
"شبعانة ،احكي"
"وقتاش تعشيت ،لاااا تقليش عند اك السحارة ،شوف ليوم جارتنا ايلي ورانا حكاتلي حاجات توقف المخ،شفت سعاد هاكي وحدة سحاااارة و متاع خروزات وبنتها خلي واسكت ،تحكيلي قتلي حتى راجل ماقرب منها قالك شنعمل بوخدة متاع بخورات "
"ياخا انت ماتعرفش سعاد ،راجلها ماتعرفهوش"
"وه منين شنعرفهم "
"غريبة بابا وراجلها كانو من خيرة الاصحاب كيفاه ماتعرفهوش"
"بوك ماكانش يقلي على اصحابو "
"أمي نحب نسألك " قالها متردد" جدي كيفاه مرض ومنين جاه الورث هذا"
"اما ورث ،هذا ملك عمك ،احنا مادخلنا شي هكا بوك الله يرحمو ديما يقلي ،اما بما انو عمك لا اولاد لا تلاد ،هذا الكل ملكم انتوما "
"ياريت كان عندو "
"مثبت لاباس" قالتهاو هي حاسة ولدها موش طبيعي جملة "يعيش ولدي ابعد.على بنتهم ،جارتنا شافتك واقف معاها،انت راجل مصلي و موش متاع نساء وموش عادتك ،تلقاها هي رامية روحها واكيد وكلتك حاجة في هاك الكسكسي كان جيت نعرف والله لا نقبلو "
دخلت خديجة وسمعت اخر كلمات "شكون ايلي وكلو حاجة ،سحرو احمد " قالتها برميان معنى ،قام ناحيتها ملهوف ،جاء كلام سعاد وغادة بين عينيه ،اذا ماتحلش ها العقد وتفسخ اول خسارة يخسرها هي "اختي المزيانة ،انا معاك وواقف وراك وجنبك "
"هههه لا عاد شبيك احمد شنوة ها الحنية "
دمعت عينو فيسع ما خباها و رجع قعد "إسمع احمد ،حكيت مع راجل قال يرقي البيوت وحكيتلي علي صار مع خديجة،قالي نجي قبل لازم نذبحولو دجاجة كحلة مافيها حتى ريشة بيضاء و نبلولو ورق حنة ...."
قص على كلامها "دجاجة ...يا امي هذا ظاهر دجال ،خليها عليا انا تو نتصرف ،ماشي نرقد تو " لازم يرتح مخو و يحطو على مخدة ،تفكر حاجة مهمة "امي ،تعرف واحد اسمو البابلي "
"بابلي!؟ شنوة هذا اسم راجل !؟ "
"ليلتك زينة "
بهتت امو وتلفتت لبنتها تستفسر بعينيها ،هزت خديجة اكتافها ماتعرفش ومايهمش.
💚💠💚