💫 ❄ إمـام الجن❄ ّ 💫(كرونيك باللهجة التونسية )

★10 ☔: القرآن هو معجزة نبينا ★

❄🍓🍓❄

هذا ايلي حاجتو ، كيفاه يفسخ العقد "قلي كيفاه "
كاينو هبط من السماء ، لقاه قدامو واقف بهركتو بالبيضاء كاينو انسي ، ومعاه ظهرو الرجال الاخرين لكن ها المرة معاهم الراجل ايلي راه في جنازة بوه " هذا منكم "
"هذا من الخدمة ايلي كانو عند بو غادة "
"بابا كان معاكم ...بابا كان يعرف ايلي انتوما من الجان "
"بوك دخل لها الداموس من سنين ، لزوز اسباب ، باش بوه يعيش وباش انتوما تعيشو "
"بابا دخل لهوني "
"الداموس كان هو البلاصة ايلي تعقد فيها العقد واحنا دمرناه و نظفناه و عملنا منو ارض ونقطة تجمع بين الانس والجان ، الانس يتنازل على سلطتو ويقبل يشوف الجان والجان يتمثل في احسن صورة يكونها ،لانو لو انسي شاف واحد منا  على صورتو الاصلية  يا يهبل يا يموت"
جاء لبالو غادة عاود تلفتلها "غادة ترانا هكا حتى انت ماتراناش "
مخو تجوجم ، غادة تقول ايلي تخلقت عينها بلا غشاوة تنجم تشوف ااجان ، يعني هو تناحتلو ها الغشاوة وولى كيفها
" لا اما احنا تمثلنا كيما قتلك ، غادة ترانا من غير مانتمثلو "
"على صورتكم الحقيقية"
"ايه "
"انت قلت اي انسي يراكم يهبل والا يموت "
"اي انسي موش ايلي شطرو انسي"
هوني عقلو وقف ، هوني طاقة تحملو كملت ، طاح دايخ بين يديهم ، مايعرفش شنوة صار في هاك الغيبوبة ، وقت ايلي فاق لقى روحو مازال في الداموس لكن وحدو مع غادة، حاول يبعدها عليه وياقف ،شاف عينيها مليانة بالدموع ، وعاجزة تحكي و الا تتحرك
"انت زادا من الجان ...انت جان ...يا الله ،امك جان بوك جان "
"امي انسية وبابا جان "
"انت واعية فاش تحكي ، مستحيل جان ياخو انسية ، من سابع مستحيل "
"الجان كيفكم ، يعرس و يجيب ويتكاثر ، والجان كيفكم ...يحب ويعشق "
قالتها وهي تحاول مانخزلوش" غادة انت موش جان ،انت بشر كيفي "
"شطر بشر "
"شمعناها هاذي "
"يعني هيأتي كيفكم ،ونعيش كيفكم بدني كيفكم "
"وشنوة تشبه الجان "
"اني نراهم ونحكي معاهم ....ونحارب معاهم "
حط راسو وكبس عليه ملا كلام ملا حاجات يسمع فيهم "كل مرة نكتشف حقيقة، شنوة اخر مانعرفوش عليك "
"انا باش نخليك هوني  ونمشي "
وقفت وشافها خارجة "غادة وين ماشية انا كيفاه باش نعمل "
"انتي شتقعد هوني يا أحمد شتقعد هوني باش  تمنع اختك "

🌺💞🌺

قام كيف كل يوم يستنى في احمد يرجع  من الجامع لكن احمد وخر ، مشالو قال بالكي نسى روحو ويقرى في شوي قرآن ، لكن قالولو ماجاش ليوم يصلي ،شنوة الحكاية في الدار مافماش في الجامع مافماش ، بلعتو الارض ، رجع هايم على وجهو يخمم في خوه ، قلبو ماقايلو خير وربي يستر ، دخل للدار لقى امو تنوح وتتخبط ،جاء لبالو احمد صارتلو حاجة "امي شبيك ،شفمة "
"اجريلي يا جهاد ، اختك اختك "
"خديجة شبيها "
"اختك بين الحيوط "
"شنوة "
في هاك اللحظة سمع بكاء اختو و نحيبها ،سمع صوتها وهي تعيطلو ، جرى لبيتها مالقاهاش ، دخل لكل بيت في الدار مالقاهاش ،يسمع في صوتها وهي مافماش"،جهاد ، خرجني ، احمد خرجني " تعيط وصوتها يقطع القلب ، هبل في راسو رجع لامو ،رجها وهو حاسس روحو يحلم "
"ويني يامي ،خديجة ويني " مع سؤالو دخلت سعاد ومعاها غادة "جهاااد " هز راسو لسعاد ايلي عيطتطلو ، تنطر جاء قدامها"انت تعرف كل شي ، صوتها في وذني وهي مافماااش، اختي وين "
"اختك بين يدين الجان الاحمر "
ترخفت يدو ووخر خطوتين ، ثبت فيها "اخرج ، اخرج عليا، ياخا تستبهل فيا ، اختي بين يدين جان احمر ، مازال شكون يصدق ها الحكايات "
كايني فاقت من منامة ، كايني تحلت عينها على حقيقة جديدة ، ورجع عقلها لاعوام لتالي "سعاد " قالتها كايني واحد رجعتلو ذاكرتو ،خزرتلها وخزرت لولدها" اي سعاد ، كنت شاكة ايلي انت زادا عاملينالك حاجة ، نسيت كل شي يخصنا"
وتفكرت بارشا حكايات فرد وقت شريط قدام عينها عرسها ببكر ،اول صغير احمد  بعد جهاد ، خدمة الفلاحة ، حموها ،خو راجلها ،.......اول طفلة في العايلة....ايه اول طفلة في العايلة ... حالة بكر كي تولدت خديجة ...كل ليلة وهو يبكي ويقلها بنتنا امانة في يدك....اخر ايامو كان يقلها أحمد لازم يرجع للبلاد " توا فهمت ....الجان الاحمر المتسلط على بنتها والشيطان ايلي عاقد عليها " عقد الشيطان " قالتها وترمات على الحيط تضرب فيه "رجعلي بنتي ، رجعلي خديجة ، بنتي ماعملت حتى ذنب ، هاتلي بنتي يا ظالم يا كافر " كانت تضرب في الحيط بيديها ،جهاد في هذا الكل باهت وجهو شاحب تقول قطرة دم فيه لا ،جاه صوت اختو من الحيط "أمي ، خرجني من هنى ، يخوفو يا امي، يخوفو ووجوهم حمراء ، ريحتهم منتنة " حطت خدها عليه و حلت يدها وحطتها عليه "ياروح امك ،انا ماانجمش ، ماانجمش" تحرق القلب وحالتها تبكي وتسخف ، جاتها سعاد وبعدتها ع الحيط و غادة تلهات بجهاد ، بالسيف باش هدوهم وخلوهم يسمعوهم ، لازم يحكو كل شي ،يفهموهم شنوة الحكاية وكيفاه حلها ،ماكان عندهم حتى ادنى شك فيلي حكاووه ، ممكن جهاد من الاول ماحبش يصدق لكن وقت مخو حللو كل شي صار و فكرو في الكف وراجل بو هركة ، ايد خوه ، الضو الاحمر و ايلي راتو عينو توا ، صوت اختو ايلي يجيه من الحيط، وهوني جاء وقتو باش يعاون اختو ، يد وحدة ما تصفقش وهوني فهمتو غادة شنوة لازم يعمل .