💫 ❄ إمـام الجن❄ ّ 💫(كرونيك باللهجة التونسية )

★ 3 : " لا َ تُشْمِتْ بِي الأَعْدَاءَ"★

❄💠💠❄

دز الباب ودخل لقاهم يحضرو في الطاولة ،دخل غسل يدو وقعد من غير مايستنى جبد ڨدمة خبز وبدا ياكل
"تعلم استنى الكل يقعدو الساعة وينك نهار كامل "
"هاني هوني يامي"
قعدت وبدات تنادي لاحمد ايلي دخل هز خوه وحطو " وين غبرت نهار كامل "
"،برا عاد ماتفدوش منو ها السؤال"
"احكي مع خوك بلڨدا ويزي بلا قلة تربية متاعك " كمل ياكل وماعلى بالو ،احمد باقي يخزرلو ،جبد الخبز ،حطو بين صوابعو ايلي دوب ما حركهم ،ثبت فيه جهاد لقاه بالرسمي دوب مايحرك يدو
"شنوة الموضوع ايلي لميتنا على جالو " سألتو خديجة
"باش نرجعو للبلاد " شرقت امو جرالها احمد بكاس ماء ،استناها لين ارتاحت "لاباس"
نجمة"شنوة ها الكلام فاش قام نرجعو للبلاد"
احمد "امي هوني ماعندنا ما نعملو كراء ومصروف ولا خدمة ولا ڨدمة ،غادي بارضنا بدارنا باهلنا"
ضربت على الطاولة بغل"رد بالك تقول عايلة ،رد بااااالك ،نهار ايلي خرجو بوك في نعشو وينهم ،حتى واحد ما طل "
احمد "بالكي مافيبالهمش"
نجمة " انت بيدك طلبت و علق عليك وبعد.سكر التاليفون ،هذا عمك ايلي ناوي ترجع تتحكم معاه في الرزق"
"يامي حقنا هاكي ورزقنا ليوم والا غدوة باش نتلهاو بيه يعيشك ماتتعرضلناش "
سكتت امو ،قام جهاد "وانا مانيش راجع ،انت تقرر وتجي هوني تعطي اوامرك "
جاء خارج "وين ماشي"
جها
"قالب منظري"
نجمة"قتلك الف مرة احكي بتربية مع خوك،اذا بوك كسرتلو كلمتو و خليتو يموت بغصتو تعاودش نفس الشي توا مع خوك فهمتني"
فكرتو في وجيعتو ايلي ماتتنساش ،بوه مات وموش راضي عليه،خرج وصرفڨ الباب معاه ،ايه مات موش راضي مات وخلاني هكا محروق ،خلط عليه أحمد "جهاد وين ماشي"
جهاد"قالب منظري ،وتحب ترجع للبلاد برا انا احسبني موش موجود "
احمد"وين باش تقعد "
جهاد"حاجة ماتخصكش"
احمد"جديدة هاذي انا خوك الكبير"
جهاد "ولد امو وبوه اما انا ولد حرام عبارة ،قليل تربية "
تعداه"وين ماشي"
"ماشي خذا الاولاد ،ماشي نشرب"
قالها يغيض فيه

احمد "مفماش مشية "
شدو من يدو وكركرو وراه ،دزو جهاد بقوة "قتلك خليني"

احمد " مانيش مخليك ،وتوا شترجع للدار معايا تحرك "

كانو يحكاو بصوت عالي لم عليهم الجيران ايلي ينسنسو "جهاد امشي الناس تتفرج"

جهاد " حاشم بخوك ،ولد الحاج بكر سكارجي صفا هكا"

احمد"اذا تقدم خطوة للحومة اللوطانية نمرمدك هوني قدامهم "

جهاد"باش بايدك ايلي ماتتخركش"

جاه كف لا يقرى لا يكتب ،خزر موش مصدق ايلي خوه ضربو ،كتم غشو ومشى اما أحمد قعد حابس في بلاصتو بعمرو ماهز يدو على خوه ،حبس بكلو مخو بدنو الوقت عندو ،وينك يابابا ها الحمل ياسر كبير عليا "

🌺💚🌺
باسم الله الرحمان الرحيم "

"وَلَمَّا رَجَعَ مُوسَى إِلَى قَوْمِهِ غَضْبَانَ أَسِفًا قَالَ بِئْسَمَا خَلَفْتُمُونِي مِنْ بَعْدِي أَعَجِلْتُمْ أَمْرَ رَبِّكُمْ وَأَلْقَى الْأَلْوَاحَ وَأَخَذَ بِرَأْسِ أَخِيهِ يَجُرُّهُ إِلَيْهِ قَالَ ابْنَ أُمَّ إِنَّ الْقَوْمَ اسْتَضْعَفُونِي وَكَادُوا يَقْتُلُونَنِي فَلَا تُشْمِتْ بِيَ الْأَعْدَاءَ وَلَا تَجْعَلْنِي مَعَ الْقَوْمِ الظَّالِمِينَ (150) قَالَ رَبِّ" اغْفِرْ لِي وَلِأَخِي وَأَدْخِلْنَا فِي رَحْمَتِكَ وَأَنْتَ أَرْحَمُ الرَّاحِمِينَ (151) "