اسكريبتاتي

اسكريبت جديد💙🌸

_"يا بنتي سيبي الفون شوية"
_"حاضر يا ماما والله"
سبت الفون وروحتلها كانت واقفة في المطبخ وعايزاني أغسل المواعين ، غسلتهم وطلعت قعدت معاها برة ، كنت سرحانة فسألتني
_"في اي؟! سرحانة في اي؟!"
_"ها ولا حاجة يا ماما"
_"عليا بردو ، قولي في إيه؟!"
_"والله مفيش إنت اللي قلقانة زيادة"
_"طيب"
ماما إنسانة حساسة وطيبة جدا بس عصبية شوية أنا وهي أصحاب اكتر من ام وبنتها بتعرف امتى بكون متضايقة وساعات بتخمن أي حاجة ضايقتني وتخمينها بيطلع صح!!

أنا سلمى محمود عندي ١٥ سنة ولبست النقاب من سنة ، معنديش اخوات خالص ، ماما هي أقرب صاحبة واخت ليا ، كنت دايما بعامل الجنس الآخر بحدود ،او أصلا مش بتعامل معاهم، وخصوصا من ساعة مالبست النقاب، وفي يوم وانا بقلب في الفيس كالعادة لقيت بوست مكتوب فيه إن صاحب الاكونت ده ولد مش بنت وكان باسم نور ، وفعلا نور ده اسم ولد وبنت ينفع ، احترمت صاحب الاكونت جدا على صراحته ، حبيت الخواطر اللي كان بينزلها وبقيت بتابع في صمت أو بعمل لايك وخلاص.

بفتح الماسنجر مرة لقيت رسالة من نور ده
_"لو سمحت"
_"نعم، اتفضل"
_"ممكن تبدلي الريأكت على آخر بوست؟!"
_"ابدله لإيه حضرتك؟!"
_"لاف"
الصراحة اول ما سمعت لاف دي اتضايقت ، مش بحب أكون في مواطن شبهة ،حتى لو الكل بيعمل لاف أنا مش هعمل، كتبتله رسالة اوضح وجهة نظري وكانت
_"حضرتك مينفعش اعمل لاف لسببين أول حاجة إني على فكرة مش معنى اللايك إني محبتش البوست أو اني بجامل لا خالص ده اولا ثانيا اللاف ده رغم إنه سهل يتعمل إلا إنه شبهه وسيدنا محمد صلى الله عليه وسلم قال"فمن أتقى الشبهات فقد استبرأ لدينه وعرضه ومن وقع في الشبهات وقع في الحرام "في ناس بتفتكر إني لو عملت لاف هيبقى لصاحب البوست مش للبوست ودي ناس عقولها مريضة ،وبس دي وجهة نظري"
هو تقريبا اتفاجئ من كلامي فسكت شوية وبعدين بعت
_"طيب حضرتك شيلي اللايك خالص"
_"طيب لو هو مضايق حضرتك أوي كده"
_"آه مضايقني بصراحة ياريت تشيليه من فضلك"
استغربت بصراحة إيه اللي بيضايق في اللايك ، أنا يعني مش بتفرق معايا أوي كده زي ماهي مضايقاه!!
_"حاضر"
_"شكرا على زوقك"
_"الشكر لله وحده"
_"الشكر لله والناس أما الحمد فلله فقط"
سكت شوية استوعب كلامه او افكر فيه وروحت قايلة
_"طيب ماشي الشكر لله يا فندم"
وقفلت الماسينجر خالص ، بعدها سمعت صوت رسالة روحت فتحته تاني لقيته عاملي لم يعجبني على وجهة نظري في موضوع اللاف!!!، حاجة غريبة جدا ، مقدرتش أمسك نفسي وروحت بعتاله
_"لو سمحت ممكن أسأل سؤال؟"
_"اتفضلي"
_"ليه حضرتك عملت لم يعجبني على رسالتي قولت لحضرتك دي وجهة نظري ولو عند حضرتك راي تاني فده شيء يرجعلك"
_"لأ هوا مش موضوع رأيي والله أنا شايف إنك فسرتي الحديث بطريقه مختلفه تماماً عن موضعه!!،وبعدين ال لاف ده شده إعجاب بالبوست أو الصوره مش بالشخص واللي يقول غير كده إنسان مريض!!
لكن دايماً علينا نحسن الظن ومنمشيش بكلام الناس"
_"اي هو تعريف الشبهة من وجهة نظر حضرتك؟!"
_"الشبهه هي إنك تعملي حاجه مش عارفه هي حلال ولا حرام.... هي موضع الظن مع مخالفه الاعتقاد"
_"أيوة بس مش كل الناس بتحسن الظن"
_"جميل جدا ، بس احنا مش هنمشي بكلام الناس طالما احنا عارفين بنعمل اي كويس"
_"الله المستعان ، حضرتك أنا لما عرفت أنك ولد عشان أنا قبلت طلب الصداقة من غير ما ابص على الاكونت ، كنت هلغي الادد في حالة إن لو حضرتك دخلت كلمتني خاص زي ما بيحصل من ناس كتير ، فانا بس بحب الخواطر ومش مجبورة أتفاعل مع كل البوستات دي الفكرة"
_"والله حضرتك لو عايزه تلغي الأدد عادي مش هتفرق..... أنا مش بضيف بنات عشان أكلمهم حضرتك الأكونت للإفاده يعني متخافيش مش بكلم حد اصلاً "
_"مانا عارفة وده اللي قولته"
_"تمام،بالنسبه للتفاعل أنا مقولتش لحضرتك اتفاعلي لكن مش تضايقيني باللايك"
_"هو اللايك بقا بيضايق اليومين دول! حاضر مش هعمل لايك"
_"لأ ممكن ميكنش بيضايق غيري لكن أنا بتكلم عن نفسي وأعتقد انا حر"
_"حضرتك حر يافندم ، وهبقى أفكر في موضوع اللاف ده وفي رأيك"
_"تمام يا مدام شكرا"
اتصدمت في اللحظة دي صدمة عمري ،مدام!!! مش للدرجة يعني!
_"مدام!!!!، طيب"
_"هو مش حضرتك مدام بردو؟ ولا أنا غلطان؟!"
يا لهوي أنا هصوت وألم عليا الناس كده أقسم بالله
_"لا والله حضرتك أنا ١٥ سنة"
ساعتها تقريبا اتخرس شوية من الصدمة وقالي
_"كل ده و١٥ سنة اومال لو ٢٥ كنتي عملتي فيا إيه؟"
_"عملت إيه انا؟"
_"لا ولا حاجة"
_"دي كانت مناقشة بسيطة يعني"
_"اتشرفت بيها يا آنسة"
_"الشرف ليا حضرتك"
_"شكرا على زوقك"
_"الشكر لله ، آسفة على الازعاج"
_"لا ولا يهمك"