و شديت التيليفون و بديت نتصور و نضحك في روحي نحاول نخرج من الكآبة حتى جا من ورايا و شدني من شعري و حكمني من وجهي قالي اعطيني البورطابل دوكا كان منارفي قتله واش بيك؟ قالي اعطيني قسامو خير مانقتلك ... عطيتو البورطال و بدا يقول معامن كنتي تحكي ليمن كنتي تضحكي و تبعتي التصاور و يطبع فيا .. كي فتش البورطالبل مليح شاف بلي معنديش كونيكسيو و كنت غير نصور و نتمهبل وحدي قعد شادني من ذراعي و انا نبكي و نرعش .. حتا قالي انتي جبتي الشك لروحك و ديجا واش هاذ الحالة مكياج و لابسا القصير قوتلو انت دخلت عليا للشمبرة ماشي انا جيت ليك حتى حسيته عرف بلي غلط و انا بغيت نختبره قوتله شوف علابالي بلي راني نبانلك قح** مين مالقيتنيش عذرا بصح هاذا ميعنيش انك تدخل لشمبرتي وانا مش ساترة روحي عيب قالي وشنو؟ مهبولة نتي؟ انتي مرتي ندخل عليك كيما نحب ... خزرت فيه مليح حسيته حشم مور ما قال هاذ الهدرة حسيتها خرجت من قلبو حسيت بوحد الأمان حسيت روحي بلي نقدر نكون مرت راجل يحبني و يغير عليا ماشي غير قح*ة فلان... و خرج من الشمبرة و قالي تصبحي بخير ...و جاز شهر و نهار لي تفاهنا بش يطلقني جا ... رجعنا للعاصمة و دخلنا لدارنا لبست قشي تع الخرجة قولته ماشي نورمالمو ليوم نطلقو ؟ قالي واش راكي تحسبي فيها بالدقيقة ؟ راني مشغول ريح نخدم ممبعد نحكو قوتله اوكي ايا انا نروح نشوف دارنا و لعشية نرجع قالي لا لا .. مكانش خرجة قولتو اوكي مي خصني شوية كوسميتيك خزر فيا و اضحك لأول مرة معايا قالي شوف اسيدي مكفاكش المكياج ليعندك قوتلو لا لا قالي ارواحي نديك و نشريلك مبعد قلب وجهو و قال لا غير اقعدي كنت نتمسخر حسيتو بدا يوالفني بصح محبش يبين . العشية جا سكران خلعني دخل يحكي و لسانو ثقيل ..و قالي اووو تعرفي وحد الزلات راهم يدورو دوكا فسونتر فيل ... حاب نتزوج ... حاب نزها ... قوتلو الله يهديك و روحي للشمبرة شفتو جا تابعني قالي واش مامي؟ واااش الزين وينتا نتحي الشنوفة ؟ بلعت الباب فوجهو قريب يكسرو بدقديق فتحتلو قوتلو روح بعدني جا رقد فوق فراشي قالي ارقدي بحذايا و بلعي فمك !! مور زوج دقايق رقد ديراكت و ثلت ياك ماشي راجلي ؟ مقدرتش نرقد.باينة نشوف فوجهو طول الليل اول مرة نركز فالملامحو كان وجو بريء راقد حاط ذراعو تحت راسو لون حواجبو كيما لون تع شعرو يتنفس غير بشوي فيه خانة تحت وذنو اليسرى تحسرت وقولت يااا حسرا كون جيت كيما كامل المتزوجات كون راني معنقاتو و كون راني موجدتلو قش تع الخدمة و موكلاتو من طيابي و متهليا فيه ايييه يا دنيا ... حتى ناض فجأة و قالي وش هاذا ! واش راكي ديري هنا؟
